IBRIMI 10 - Sümi Tiqhelimi Bible

Khristo’w Aghakishi ye Ghuthukhavi eno Alhokupuju Ghenguno

¹ Ayeza ye akivi thime ighi niye shi akeu yekükhü likhi ke—ayeza likhi ye kuchou kühae. Hi ghenguno ayeza ye khunoqo no ampe atsütsǜ lo ide-ide tamo no aghakishi athoshi pesü Alhou mülá nike kupunú ighi acheni keno panongu pelo khilemu kupukülailu pe müla nani.

² Tishimo aye, panongu ye Alhou mülá akeu taveni cheke kumo keshea? Kughengu akümlámiqo ye ghuthukhavi lono alhokupuju ghenguno mitheluve aghíni cheke, eno panongu ye panongu xinéqo ghenguno akipimí shi kümsümoni cheke.

³ Ikemu aghakishi tipaqo ye ampe lo xinéqo kümsükithelu pe cheni ke.

⁴ Amishitsü eno anetsüqo jì no axinéqo ikhipe wuve tsüní keu ye shikümlapu ke.

⁵ Tighenguno kughou Khristo no ayeghi lo ighi keno pa no ishi pi: “No ye aghakishi eno akümlagho lunishi chemoe, ikemu nono aphimpi lakhi I ghenguno kutò pe qhitsü ke;

⁶ akipti kümlagho eno axiné shikimthe keu kümlaghoqo ye nono amloqi chemo ke.

⁷ Tisheno I no pi, ‘Ni hile ani—liküküzü kaku lo I ghili yèpüani— I Lhou, ni ye O pulou shini ke ighi ani.’ ”

⁸ Atüghishi pa no ishi pi, “Panongu no ayeza kiqi lono akümlagho mülá aghí namu no ye aghakishi ngò akümlaghoqo, akipti kümlagho eno axiné shikimthe keu kümlaghoqo lunishi chemoe, momu no ye tipaqo shou amloqi chemo ke.”

⁹ Tisheno pa no pi, “Ni hile ani, ni ye O pulou shini ke ighi ani.” Pa no akiniù shiqhepuku nike ghenguno atüghiu ye akou qhive ke.

¹⁰ Eno Alhou pulou vechewo ningu ye Jisü Khristo phimpi pe ghuthukhavi lono alhokupuju ghenguno aghakishi shive keu vechewo akimthe shiluvae.

¹¹ Atsala kipetsü achineu lakhi ye puthugho no achineye kümlàpuqo shi acheni; anguno-anguno pa ye aghakishi atho khikhi khilemu axinéqo ikhipe wuvelu chemo keno tipau pesü mülá acheni.

¹² Ikemu kughou achineu hipau no alhokupuju ghenguno axinéqo ghakishi lakhi pe Alhou mülá keno, pa ye Alhou u ajeu küdau iqave ke,

¹³ eno tipau ghuloki lono pa ye pa ghümiqo pe pa pukhu kibepu shitsü nike khe acheke.

¹⁴ Kughengu pa ye aghakishi lakhi vechewo khunoqo pe akimthe shivea keno panongu ghenguno alhokupuju ghenguno kupukülaive tsüke.

¹⁵ Hipau ghili ye Aghungu Kimthe ghí ningu lau thopi shike. Atüghishi pa no ishi pi:

¹⁶ “Atsala tipau thiu I no panongu gholo puloshoqhi hipau shi nani, ipi Ampeu no pi. I no panongu mlo lo I yezaqo sǘtsü nani eno panongu kükümsü lo tipaqo yèpuku nani.”

¹⁷ Tisheno pa no hitoi piqabe: “I no panongu xiné eno ayeza hekibide kümlàqo khilemu kümsüchilemo nani.”

¹⁸ Eno khilehi no hipaqo kipimí qhivetsü keno, axiné ghenguno aghakishi ye khilemu avehupu shimae.

Aküpülü Tsükhoi shipe nike Ghutu keu

¹⁹ Tighenguno, athiküzümi eno achelimiqo, ningu ye Akimthe Nguno Akimthe-a lo ilolu nikeu pülübe ani, tiye Jisü jì vechewo,

²⁰ eno nhaqhiphi, tiye pa phimpi, vechewo ningu ghenguno akithé eno aküxü laghi khaqhi tsü keu,

²¹ eno ningu ye Alhou ki lo achinetomiqo shou akijeu lakhi anike ghenguno,

²² ningu Alhou lau amikucho mlo eno aküpülü vechewo pülüqhiyi süghi chekeu pesü kupunú wuni nolo, kughengu ningu mlo ye alolo kighithi shikipimi lono shikimthevea ke eno ningu phimpi ye azü kütsüghǘ no küzüteve no qhukimthevea ke.

²³ Ningu ye khilemu iqemo no ningu no piche keu lajupu tsüqüpeni nolo, kughengu Alhou ye pa no piqhipüa keu lo pükhükulu shi cheni ke.

²⁴ Eno ningu ye kíshi no lakhi no lakhi shikumto ghi kikimiye eno akümlà kiviqo shiluni keno tipaqo kümsüni nolo,

²⁵ kümtsa kusho chekeu phevemoni, kughengu timi khami ye alhoaye shi ighi chemo ke, ikemu lakhi no lakhi shikumto kileni—eno tinguno alau nongu no ithulu akeu toi Ampeu Tsalá hu ye kupunú wochae.

²⁶ Tsalá ningu no kuchou kighithi ithuluve kethiu ghí ithithai axiné shiauve aye, axiné shikimthe nikeu ghenguno aghakishi kühavae,

²⁷ ikemu küghathabe nikeu eno ami küyiqü no Alhou ghümiqo kütsave nikeu msàqhiyi akeu likhi khe aniae.

²⁸ Khukhumu Moses yeza milive kemiqo ye kimiyekini ithumla no thopimi kini momu küthü no thopi shikeu vechewo thivae.

²⁹ Khuu no apukhu pesü Alhou Nu qodani, khuu no panongu shikimtheve keu puloshoqhi jì pesü mithemo ketoi kihini, eno khuu no küpükini Ghungu thaighani keno, panongu ye aghime kitikhi khijehi alau ithulu nani kepi nongu ye kümsü ani kea?

³⁰ Kughengu ningu ye khuu no, “Amkhü ye I no lunani; I no lochile nani,” eno itaghi, “Ampeu no paw timiqo shou küghathabe nani,” ipi keno pa ithi ani.

³¹ Xü akeu Lhou u lo ikiqive nikeu ye kümsakimshipu lakhi ke.

³² Püzüu tsalaqo lo nongu no Jisü ithiluve kethiu, nongu no aghime chhitoi keu küküpüna kijè puqhe keqo hu kümsülulo.

³³ Khani lo nongu ye mìshí zülo no nongu thaigha no pishi-puju ke; eno khani lo ye timi no hitoi khunoqo peithapüsa keno tipaqo sasü nongu no aghime küsaje ke.

³⁴ Nongu ye akughuki lo akemiqo gholo imeküqha ke eno nonguw tinhemüghaqo ikhiluve tsü kelo alokivishi ke, kughengu nongu ye nolikhi no ghenguno tinguno amheghi akiviu eno pepushu nikeu ani kepi ithi ake.

³⁵ Tighenguno nonguw pülükibe pheve kevilo; tiye kinikülü shi qesaxu tsü nani ke.

³⁶ Nongu ye tsükhoi shini keu avehupu shi ani, tishianguno kughou nono Alhou pulou shini keno no ye kiu piqhipüa keno tipau ithulu nani.

³⁷ Kughengu, “Ado kushuwa kumo lo, pa khuu ighi niye ani keno ighive nani eno munumo nani.”

³⁸ Ikemu, “Iw amikuchou timi hu ye aküpülü vechewo xülu nani. Eno ni ye khuu no athiu idewove cheni keno tipau jupe amloqilumo nani.”

³⁹ Ikemu ningu ye khunoqo no athiu idewove no kütsave cheni keno tipaqo laumi kumoe, ikemu ningu ye aküpülü aghí no xaluve kemiqo ke.