IBRIMI 1 - Sümi Tiqhelimi Bible

Alhou’w Ashekhau Tsa: Pa Nu

¹ Wove keu lo Alhou no tungkupumiqo vechewo ghuthu kutomo eno alaghi jeli lono ningu pù-asünoqo pütsa cheke,

² ikemu hi ashekha tsalaqo lo ye pa ye pa Nu, khuu thime kümtsü mheghi kiyighiu shipe niye pa no süküsü shi, eno khuu vechewo pa no ayeghiqha lhosü keno, pa vechewo ningu pütsa ke.

³ Anu ye Alhou juküvü yebide akeu eno Alhou lhoaye athoshi pephe-piye akeu ke. Eno pa tsa küká vechewo thowkha kümtsü puqhe pe acheni. Pa no ningu xinéqo shikimtheve kethiu, pa ye kungugha lo Akughushu Lhou u ajeu küdau iqave ke.

⁴ Ikehu pa ye kungumiqo nguno ighono akiqheu shive ke kughengu pa no aje amheghi shi ighílu keu ye kungumiqo je nguno akiqheu ke.

Anu ye Kungumiqo Nguno Akiqheu Ke

⁵ Kughengu Alhou ye kungumiqo khuu vilo kughou no hitoi pipüani kea, “No ye I nu ke; ishí no I no O pù shiluvae” Momu itaghi, “Ni ye Papù shive nani, eno pa no I nu shive nani.”

⁶ Eno itaghi, kughou Alhou no pa Nu amsüu ayeghi lo süghi keno, pa no hitoi pi, “Alhou’w kungumiqo kümtsü pelo pa mülá pelo.”

⁷ Kungumiqo tsa lo pa no hitoi pi, “Pa no paw kungumiqo pesü aghungu shitsü, eno pa qemiqo pesü ami miliqo shitsü.”

⁸ Ikemu Anu vehu lo pa no hitoi pi, “O Alhou, ow aküka lakhü ye alhokupuju eno alhokupuju ghenguno ache nani; amikucho yiküsü no O kükaphu yiküsü shi nani,

⁹ Nono achipiumikucho kimiye ke eno küsakügha mithi ke; Tighenguno Alhou, O Lhou, no alokiqi thazü pesü O nukishe no O pesü O küsàmiqo shou qhike.”

¹⁰ Pa no hi ghí pi, “Ampeu, abothu lono nono ayeghi lhophe ke, eno kungugha ye O u no mülà keqo ke.

¹¹ Panongu ye kühave nani, ikemu no ye anani; panongu ye kümtsü tiphimini toi aqa-agha shive nani.

¹² Nono chijeboboi-phi toi panongu liküzü nani; tiphimini toi panongu ye kilive nani. Ikemu no ye athoshi anani, eno O mpeqo ye khilemu ashekha shivemo nani.”

¹³ Alhou ye kungumiqo khiu vilo kughou no ishi pipüani kea, “I no O ghümi pesü O pukhu kibepu shitsümo ke kutólo I u ajeu küdau iqalo.”

¹⁴ Kungumi kümtsü pichebekümlà ghunguqo püzü panongu ye xakulu mheghi ighílu niye shi akemiqo huthu pe nikeu ghenguno puwu ke kumo keshea?