Galatiami 6 - Sümi Tiqhelimi Bible

Kümtsü lau Akivi Shini keu

¹ Athiküzümi eno achelimiqo, khuala no axiné shi aghí keu ithulu aye, nongu Aghungu küxü lo akemiqo no agholau no timi tipau shikümzü tsü moayesae. Ikemu nongu likhi nongu jukuto lo, tishimo aye nongu ghí ghuju kepu shiluvi ke.

² Lakhi no lakhi makho putsü kilé lo, eno tishi keu lono nongu ye Khristo yeza shikupulu nani.

³ Khuala no panongu ye kiumu kumomu panongu ye kiuala küghashi kümsü aghí aye, panongu ye panongu likhi panongu pishiqhi anie.

⁴ Kümtsü no pütüta likhi pütüta kümlàqo peju moayesae. Tishiaye panongu ye panongu pesü kütami lau kimighimo no pano likhi panongu jupe qhezalu nani,

⁵ kughengu kümtsü no pano likhi pano makho xapu moayesa nani.

⁶ Tishimu, timi khuu no Alhou tsa shikakütsü ithuluni keno panongu ye thime kivi kümtsü pesü panonguw shikakütsüu gholo küsaje moayesae.

⁷ O likhi O pishiqhi kevilo: Khuu nomu Alhou phimovemlae. Timi lakhi ye pano kiu xusüni keno tipau xolu cheni.

⁸ Khuno no axiné pulou shi niye xusü cheni keno tipau lono kütsakungo keu xolu nani; khuno no Aghungu pulou shi niye xusü cheni keno tipau lono lhokta küxü xolu nani.

⁹ Ningu ye akivi kümlà shini keu lo aghüthisüve moni nolo, kughengu ningu no aghüthisümo no mülà aye ado achipi lono ghile kivi hulu nani.

¹⁰ Tishiaye, ningu adokivi ithulu keu lo, timi kümtsü lau akivi kümlà shi aní nolo, eno akhotoshi khunoqo aküpülü lono abolomi shiluvea keno panoqo lau mülà aní nolo.

Aphighüyiko-küghá kumo ikemu Lhoxü Kithe

¹¹ I likhi I u no kiyethi kijè shi peitha no nongu lau kiu yè ani keno julo!

¹² Khunoqo no timi lhoaye vechewo timi kütami pulou shinishi cheni keno panongu ye nongu pelo tsümomo aphighüyiko ghave peniye pükapütsa anie. Panongu no hipau shi akeu ye Khristo’w kros ghenguno pishi-puju keu lono müxüve nikeu ghengu likhi no ke.

¹³ Aphighüyiko-küghá saphu chekemi kutólo ghí ayeza pape chemoe, tishimu panongu ye nongu pelo aphighüyiko ghave penishi ani, tishianguno nongu no ashi lono aphighüyiko ghave keu vechewo panongu ye aqheküza shi niye ke.

¹⁴ Ningu Mpeu Jisü Khristo’w kros nguno alau ye I pelo kütau thime shou qheza pemo peniu, kughengu pa yeda pìthíve keu vechewo I no ayeghiqha lhoaye shinishi chekeu yedapithivae eno I lolo ayeghiqha lhoaye no shinishi chekeu yedapithivae.

¹⁵ Aphighüyiko ghave keu momu aphighüyiko ghamo keu nomu akhoto kumoe; kiu no akhoto kepi aye, lhoxü kithé shiluve keu no ke.

¹⁶ Ayeza hipau papelu kemi eno Alhou’w timi Israelmi kümtsü lau alokiqi eno kimiyekini apeniu.

¹⁷ Hinguno hilau ye, khumu I pünaqhi pe kevilo, kughengu I phimpi lo Jisü zakuqo xapu anike.

¹⁸ Athiküzümi eno achelimiqo, ningu Mpeu Jisü Khristo’w küpükini no nongu nguagha gholo apeniu. Amen.