Galatiami 5 - Sümi Tiqhelimi Bible

Khristo lono Kuqhokiphe

¹ Ningu pelo khaqhipheve keu küxü xü penike ghenguno Khristo no ningu kuqhophevae. Tishiaye, akumto shi puthugho lo, eno aqüaxemiw kuokhasü lo O likhi O kitime kithe kevilo.

² I tsa hipau kümsülulo! Ni Paul no nongu vilo piani, nongu no nolikhi nongu pesü aphighüyiko ghave aye, Khristo ye nongu ghenguno kiumu amekühae.

³ Khunoqo no pa likhi pa pesü aphighüyiko ghave pe ani keno pa ye ayeza kümtsü pape moayesa nani kepi itaghi I no timiqo kümtsü lau shuphe ani.

⁴ Nongu khunoqo no ayeza vechewo achipikalu niye pükapütsa ani keno nongu ye Khristo lau no kütüta shivae; nongu ye küpükini lau no ikiqivae.

⁵ Kughengu ningu ye Aghungu vechewo aküpülü lono ningu no laju achekeu achipiumikucho hu khekulhoshi anike.

⁶ Kughengu Khristo Jisü gholo ye aphighüyiko ghave keu momu aphighüyiko ghamo keu nomu akhoto kumoe. Ikemu kikimiye vechewo aküpülü pephe-piye keu likhi kihi cheni ke.

⁷ Nongu ye akivishi pokuxu ake. Khuu no nongu pelo kuchou ghokulu shi akeu lono hachileve kea?

⁸ Titoi züiza keu ye nongu kulù keu Lhou lau no ighimo ke.

⁹ “Kholaqhi kitila lakhi no asho mqo kuchopu ingú ipeghilu pe chenie.”

¹⁰ Nongu ye akükümsü kütau lumo nani kepi niye Ampeu shou pükhübe ani. Timi khuu no nongu pesü kübangü keu lo vesü ani keno, tiye khuu-khuu shi aghí namu, pa ye aghime ithulu moayesa nani.

¹¹ Athiküzümi eno achelimiqo, I no itehi kutólo aphighüyiko-küghá ghili kütsü cheghi aye, kushiye itehi kutólo I pishi-puju aní kea? Tishi aghí aye Khristo kros ghili kütsü chekeu lo khiumu küpünamoveni cheke.

¹² Ni ye timi khunoqo no shikughutho ani keno, panongu pelo pano likhi panongu phighü ghave penishi ani!

Aghungu lo Küxü

¹³ I thiküzümi eno I chelimiqo, nongu ye kuqhopheve keu küxü xüpe niye kulù ke. Ikemu nongu ye kuqhophevea kepi tino ajekukivi shive no timi lhoaye pulou lo chhosü wuve kevilo; tishini ke züqhulo kikimiye vechewo akuchunu shi püzü nongu lakhi no lakhi qe lo.

¹⁴ Kughengu azakütsü lakhi, “O likhi O toi O kisüghümi kimiye lo,” ipikeu hipau papelu keu vechewo ayeza kümtsü shikupuluve anie.

¹⁵ Nongu no tüghashi toi lakhi no lakhi mikiqhi aye, nongu lakhi no lakhi kütsaqhive monimo keno jukuto alo.

¹⁶ Tighenguno I no piani, Alhou Ghungu ghaküsü qholo xülo, eno nongu ye timi lhoaye no shinishi keqo ghapiqi tsümo nani.

¹⁷ Kughengu timi lhoaye no mine keu ye Alhou Ghungu no shipe nishi keu lau no bidelau ke, eno Alhou Ghungu no shipe nishi keqo ye timi lhoaye no mine keu lau no bidelau ke. Küma ye lakhi no lakhi sasü kichighi acheni ke, tishi keu vechewo nongu pelo nongu no kiu shinishi ani keno tipau shilupemo niye ke.

¹⁸ Ikemu Aghungu no nongu sasü che aye, nongu ye ayeza qholo kumovae.

¹⁹ Timi lhoaye no shi chekeu ye mütsüqhei no hipaqo ke: kipito xüküpsa, mithekumo eno ghüpoghüzü;

²⁰ ajulho kümlá eno atumu; akimithi, küqhakümla, axeküsü, amlokighide, alikhi asala kuphu, kotha kilé keu, amqo jeli

²¹ eno anhekushu; shokümzü, ghaghu-ghale ghulhu eno titoi keqo. I no azüu nongu vilo pikichi ketoi, ni ye itaghi pikichi ani, tiye timi khunoqo no hitoi xüni keno panongu ye Alhou kükaphu ighí müla nani.

²² Ikemu Aghungu xathi ye kikimiye, alokiqi, aloino keu, kheakulu, küpüqhiyi keu, akivi, pichebekulu,

²³ mtshaivü keu eno küsüqhikulu ke. Hitoi keqo shou ye ayeza kiumu kühae.

²⁴ Khunoqo no Khristo Jisü’w shivea keno panongu ye timi lhoaye gholo ashi no minemighei chekeu eno shinishiqhiyi chekeu kümtsü kros lono yedapithivae.

²⁵ Ningu no Aghungu lono xü cheghi aye, ningu Aghungu ghaküsü qholo no xüni nolo.

²⁶ Ningu qhezamoni momu lakhi no lakhi xukuthomoni momu lakhi no lakhi jupe anheshumoni nolo!