Galatiami 2 - Sümi Tiqhelimi Bible

Paul ngò Apostolmi Kütamiqo

¹ Tisheno ampe chighibidi thiu, ni ye itaghi Jerusalem lo iqhoe. Ishíu lo ye Barnabas ngò Titus ghí I gholo sawue.

² Ni ye piyeküsü lakhi ghenguno eno khunoqo akukuho lo sakiphemiqo shi akeno tipaqo sasü lomo shi küptsa niye wue. Tisheno I no Jewkumomiqo gholo kütsü chekeu atsakiviu pesü panongu lau lhepiye ke. Tiye I no kiu mülà ani eno kiu mülà ighivea keno tipaqo ye adou kumo kepi mütsümishei shive nishi yé ke.

³ Tishimu Titus khuu I gholo ngoa keno pa ye Greekmi lakhi shi aghí namu pa kutólo tsükhoi aphighüyiko ghave moayesa keu shimo ke.

⁴ Hipau vehu ye kichileu küpülümiqo khami no ningu no Khristo Jisü vechewo ghoshixü akeu pukuju shi niye ninguw kushoqhe akeu lo itshüiloghi no ningu pesü aqüaxemi shive nike ghenguno ipeghi ke.

⁵ Ningu ye panongu gholo kitilamu puloküqhamo ke, tishianguno nongu ghenguno atsakiviuw kuchou qhipüalu peniye ke.

⁶ Khunoqo no akukuho lo sakiphemi shi acheni keno—panongu no kiu shi cheni keno tiye I ghenguno kiumu kütüqü keu kühae; Alhou ye agi ju chemoe—sakiphemi shi akeu ju-aje pesü I kükütsü sütsa lo kiumu süküqha akepu kühae.

⁷ Tishini ke züqhulo, Jewmiqo lau atsakiviu kütsü pe nikeu kümlà Peter pichetsü ketoi, aphighüyiko ghamo kemi lau kütsü pe nikeu kümlà I pichetsü keu panongu no ikhilu tsüke.

⁸ Kughengu Alhou khuu Peter no Jewmiqo lau apostolmi lakhi shi akelo pa gholo mülà akeno, pa ye I no Jewkumomiqo lau apostolmi lakhi shi akeu lo ghí mülà anike.

⁹ Atsükuchoqo toi gihu chekemi James, Cephas eno John noqo no kughou I lau küpükini tsüpüa keu kimchilu keno panongu no kuposhulu keu michi shi Barnabas nikujo sasü au ajeu no petha shilu. Tisheno panongu no Jewkumomiqo lau ningu no wu moayesa, eno Jewmiqo lau panongu no wuni kepi pulolue.

¹⁰ Panongu no qhüiniju keu no ningu ye tamo no athokhamiqo ghenguno inikhu moayesa ipi, tiye I no alhokuthu shinishi chekeu thime ke.

Paul no Cephas Lachile

¹¹ Kughou Cephas no Antioch lo ighi keno, I no pa gizü lono pa lachile ke, kughengu pa ye shimo kepu shike.

¹² Kughengu James no timi khami puwu keqo ighi mphi züu, pa ye Jewkumomiqo gholo chu-sho cheke. Ikemu kughou panongu ighive keno, pa ye tsüghüve no Jewkumomiqo lau no paküta shive ke, kughengu pa ye Jewmi mqo lo akemiqo msà ake.

¹³ Jewmi kütamiqo ghí paw kühakügha gholo süküqha ke, tisheno Barnabas kutólo panonguw kühakügha vechewo sà küghüzüve ke.

¹⁴ Kughou panongu no atsakiviuw kuchou kiqi lono xü aghimo keu I no ithulu keno, I no panongu kümtsü zülo no Cephas vilo ishi pi, “No ye Jewmi lakhi ke, ikemu no ye Jewmi lakhi toimo no Jewkumomi lakhi toi xü anie. Tishiaye kíshi no no ye Jewkumomiqo vilo Jewmi kukhuayeqo papelo ipi ani kea?

¹⁵ “Ningu ye ajì lono Jewmi eno axinemi Jewkumomiqo kumo ke.

¹⁶ Tishimu ningu no ithi akeu no timi lakhi ye ayeza pape keu vechewo achipikalu chemoe, ikemu Jisü Khristo shou pülü keu vechewo no ke. Ike ningu ghí ayeza pape keu vechewo kumo no Khristo shou pülü keu vechewo achipikalu penike ghenguno Khristo Jisü shou ningu küpülü qhicheni ke, kughengu ayeza papelu keu vechewo timi khumu achipikamla nani ke.

¹⁷ “Ikemu Khristo vechewo achipikalu nike phu akeu lo ningu Jewmiqo no axinemiqo dolo ningu likhi ningu phulu aye Khristo ye axiné saphu ani keshea? Khilemu tishimoe!

¹⁸ I no kiu kütsakungove keno tipau I no shiqhepuku kithe aye, ni ye kuchou no ayeza hekibidemi lakhi shiniae.

¹⁹ “Kughengu ni ye Alhou ghenguno xü anike ghenguno ayeza vechewo ni ye ayeza lo thivae.

²⁰ Ni ye Khristo gholo yedaküqhavae eno ni ye I ghò shi xü anike kumovae, ikemu Khristo no I lolo xü anie. Itehi I phimpi lo xü akeu küxü ye Alhou Nu khuu no I kimiye eno I ghenguno pa küxü tsüve keno pa shou aküpülü qhi no xüani.

²¹ Ni ye Alhou’w küpükini milive chemoe, kughengu ayeza vechewo achipiumikucho ithulu kepu shi aghí aye, Khristo ye adou lono thivae!”