Galatiami 1 - Sümi Tiqhelimi Bible

¹ Ni Paul, apostolmi lakhi—timi lau no momu timi vechewo no puwu keu kumoe, ikemu Jisü Khristo khuu Apù Alhou no akithí lono Jisü xüputhu keno, pa no puwu ke—

² eno I gholo athiküzümi eno achelimi akemiqo kümtsü lau no, Galatia lo akukuhoqo lau yèlu ani:

³ Ningu papù Alhou eno Ampeu Jisü Khristo lau no ighi keu küpükini eno alokiqi nongu gholo apeniu,

⁴ ningu papù eno Alhou pulou kiqi lono Ampeu Jisü Khristo ye hipau tiqheliw küsakügha lono ningu xaphe nike ningu xinéqo ghenguno pa küxü tsüve ke,

⁵ pa lau alhokupuju lono alhokupuju kutólo ajuküvü ache pelo. Amen!

Atsakiviu Kütau Küha

⁶ Ni ye nongu pelo Khristo’w küpükini gholo xü penike kulù keu paikhavi lono qhive no atsakiviu ke ipi akeu kütau lakhi küdau tsüghüsü wuve akeu ithulu no akümzavae—

⁷ tiye khilemu atsakiviu kumoe. Mütsüqhei no timi khami ye nongu pesü kübangü keu lo sǘ ani eno Khristo tsakiviu lakha nike pükapütsa ani.

⁸ Ikemu ningu no shi aghina momu kungugha lo kungumi no shi aghí namu, ningu no nongu lau atsakiviu kütsü keu nguno kütau kütsü aye Alhou ngusü panongu shou apeniu!

⁹ Ningu no pive keu toi, itehi I no pikithe ani: Khuala no nongu no ikhiluve keu nguno kütau nongu lau atsakiviu kütau kütsü aghí aye, Alhou ngusü panongu shou apeniu!

¹⁰ Hitoi pi kelo ni ye timiw puloza lu niye keo Alhou’w puloza lu niye pükapütsa ani kea? Ikeo ni ye timi pulou shi niye pükapütsa ani kea? I no timi pulou shi niye pükapütsa aghí ke aye, ni ye Khristo qeu lakhi shi aghíni chemo ke.

Paul ye Alhou no Kulù

¹¹ Athiküzümi eno achelimiqo, ni ye I no atsakiviu kütsü chekeu ye timi lau no ighimo kepi nongu pelo ithi penishi ani.

¹² Ni ye timi khuu lau nomu hipau ithulumoe, momu hipau I shikamoe; ikemu, ni ye Jisü Khristo lau no piyesü keu vechewo ithulu ke.

¹³ Kughengu nongu ye I no azüu Jewmi chineye lo kíshi xüche keno tipau ghola ghili chiluvae, ni ye Alhou kukuhou shishe pishi-puju no tipau kütsakungo niye pükapütsa cheke.

¹⁴ Jewmi chineye lo I qhesho kutomo akeu dolo ni ye atüghiu shi cheche ke eno I pù noqo kukhuayeqo ghenguno ni ye ighono amlotsüqhiyi cheke.

¹⁵ Ikemu kughou Alhou khuu I zá po lono I kütashi qhivetsü eno paw küpükini vechewo I kulù keno, pa ye

¹⁶ I lau pa Nu pìye nikeu lo amlokiqi shike tishi keu vechewo I pelo Jewkumomiqo gholo pa ghili kütsükulupu shipe niye ke. Ikehu ni ye paikhavi timi khuu vilomu kighinikile keu shimoe.

¹⁷ Ni ye khunoqo no I züu apostolmi shi ache keno ju nike ghenguno Jerusalem lo iqhomoe, ikemu ni ye Arabia lo wuve ke. Tithiu no ni ye Damascus lo ideghive ke.

¹⁸ Tisheno ampe küthü thiu, ni ye Cephas sasü kilethi nike ghenguno Jerusalem lo iqho eno pa gholo atsala chighipungu ngove ke.

¹⁹ Ni ye Ampeu thiküzüu James nguno alau ye apostolmi kütamiqo khumu ithumlae.

²⁰ I no nongu lau kiu yè ani keno tiye akimiki kumo kepi I no Alhou zülo no nongu lau piqhi ani.

²¹ Tisheno ni ye Syria ngò Cilicia ghakhu lo wuke.

²² Khristo lono Judea lo akukuhou akeqo ye lüthü shi ni mthae.

²³ Panongu ye pithikütsü hipau likhi chilu ke: “Timi khuu wove keu lo ningu pishi-puju che keno itehi pa ye pa no ghuthu lakhi aküpülü kütsakungove niye pükapütsa chekeu hu kütsü anie.”

²⁴ Tisheno I ghenguno panongu no Alhou sheqhe ke.