FILIPIAMI 4 - Sümi Tiqhelimi Bible

Mutotoi eno Küqhakulu shi apenike Qhüiniju keu

¹ Tighenguno, I thiküzümi eno I chelimi I no kimiye, kümsü eno sholu nishi chekemi shompamiqo, I lokiqi eno I kijuvilei shitsü chekeqo, hipau ghola lono Ampeu lono ithamo no puthugho lo!

² Ampeu lono akükümsü lakhi shilu penike I no Euodia vilo qhüiniju ani eno titoi Syntyche vilo ghí qhüiniju ani.

³ Iyei, I küsàmi kuchouqo, ni ye nongu vilo totimi hipaqo kuphulo ipi qhüiniju ani kughengu panongu ye Clement gholo eno I gholo mülà küqha chekemi kümtsü gholo küqha püzü atsakiviu ghenguno I gholo kutubo no mülà ache kemiqo ke, eno panongu je ye aküxüpu kaku lo anie.

Ashekuho Hakuthokütsü

⁴ Alhokuthu Ampeu lono alovishelo. I no itaghi piani: Alovishelo!

⁵ Timi kümtsü pelo nonguw iqüighai keu ithulu pelo. Ampeu ye kupunukhoi ani.

⁶ Kiu ghengu nomu amlo kütakihi kevilo, ikemu atüqhüdo kümtsü lo akighini eno qhüiniju keu gholo shikimthikütsü vechewo nongu vehupu pesü Alhou vilo pilo.

⁷ Tishiaye Alhou’w aloino keu khikhi timi no ithikuthulu keu nguno alau ani keno, tipau no Khristo Jisü lono nongu mlo eno nongu kükümsü khekuto anani.

⁸ Athiküzümi eno achelimiqo, ashekha shi kiu no kuchou, kiu no xüpivi, kiu no achipiu, kiu no akimthe, kiu no alo keu, kiu no jupe amloqilu cheni—kiu-kiumu akighiché momu sheqhe küzüpu aghí aye—thime tipaqo shou kümsüpuku alo.

⁹ Nongu no kiu shikalu momu ithulu momu I lau no chilu, momu I lolo ithulu keno akümlà lono pephe-piye lo. Tishiaye Alhou’w aloino keu nongu gholo anani.

Aghòqo ghenguno Shikimthi

¹⁰ Nongu no I ghenguno alokümsü akeu ashekha láu no shi aghí namu küyiqü kithe akeu ghenguno ni ye Ampeu lono shishe alovi ani. Kuchou lo ye nongu ye I ghenguno alokümsü ake, ikemu nongu ye alokümsü pephe nikeu adokivi ithumla no ake.

¹¹ I no hi piakeu ye ni ye avehupu shi akeu ghenguno pi anike kumoe, kughengu ni ye kiu-kiu tüqhüdo lomu aloqilu nikeu shikaluvae.

¹² Akumlho ye kíshive cheni keno I no ithi ani, eno nibonilei akeu ye kíshive cheni keno tighi I no ithi ani. Ni ye khile-khile na kiu-kiu tüqhüdo lo shi aghí namu alokiqi shini keu ghola tuqhou shikaluvae. Tiye nibonilei chu aghí na müzüthi aghí namu, kupukuno shi xü aghí na aveküsa shi xü aghí namu alokiqishi aní keu ke.

¹³ Khristo no I shikumto tsü keu vechewo ni ye thowkha shikulupu küká anie.

¹⁴ Ikeghi nongu no I veküsa lo küsaje tsüke alovae.

¹⁵ Tinguno alau no, nongu Philippiamiqo no ithi akeu toi, atüghi lo nongu no atsakiviu ithilu kelo, kughou I no Macedonia qhive no wuche keno, nongu likhi no thono akukuhou lakhimu I sasü küsaje keu eno ni ikhilu keu shimoe,

¹⁶ kughengu I no Thessalonica lo akelo ghi, I no avehupu shi akelo nongu no ghuthu lakhi nguno akichiù akukuphu I tsüpuwu ke.

¹⁷ Ni ye nongu ghò lunishi anike kumoe; ikemu I no shipe nishi akeu ye nonguw tsükini ghenguno nongu pelo aghò ithulu penishi anie.

¹⁸ Ni ye I jume kuchopu ithuluvea eno lukümkhapu shi ani. Nongu no Epaphroditus lau no aghò I tsüpuwu keu hu ithulu no ni ye kupukuno shi anie. Tipaqo ye axokütsüngü kümlagho, Alhou mlokiqipu eno pa lau ikhikulupu aghakishi lakhi ke.

¹⁹ Eno I Lhou no pa juküvü kiní Khristo Jisü lolo akeu kiqi lono nongu no avehupu shi akeu kümtsü tsü nani.

²⁰ Ningu Papù Alhou lau alhokupuju lono alhokupuju kutólo ajuküvü ache pelo. Amen.

Ashekha Petha

²¹ Khristo Jisü lono Alhou’w timiqo kümtsü vilo petha tsülo. Athiküzümi eno achelimi I gholo akemiqo no petha tsü ani.

²² Hilau Alhou’w timi akemiqo kümtsü no petha nongu tsü ani, akhotoshi Caesar kükaki lo mülà akemi akibolomiqo no petha nongu tsü ani.

²³ Ampeu Jisü Khristo’w küpükini no nongu nguagha gholo apeniu. Amen.