FILIPIAMI 3 - Sümi Tiqhelimi Bible

Khristo Shou Pükhübeluve keu

¹ I thiküzümi eno I chelimiqo, tinguno alau no Ampeu lono alovishelo! I no pive keqo itaghi atho nongu lau yè kithe aní keu I ghenguno kushokütsü kumoe, eno tiye nongu ghenguno sükushopu lakhi ke.

² Ti atsǜqo, küsakügha kümlà shi chekeqo, eno aphighüyiko ghamasa ipi chekemiqo jukuto lo.

³ Kughengu ningu ye kuchou no aphighüyiko ghave kemiqo ke, Aghungu lono Alhou qe chekemi, Khristo Jisü lono agijivilei chekemi, eno timi lhoaye shou pülükibe qhichemo kemiqo ke,

⁴ tishiaghimu I likhi ni ye hitoi keu pülükibe akeu lo akiqi anie. Kütami khuala no timi lhoaye shou pülükibe qhi keu lo akiqi ani kepi kümsü aghí aye, ni ye akiqi kutomo anie:

⁵ ni ye atsala akütacheu lono aphighüyiko ghave, Israelmi lakhi shi punú kemi, Benjamin laghami, ajì lono Hebrewmi shi ighi kemi lakhi; ayeza pape chekeu lono pìní aye Phariseemi lakhi;

⁶ aküxü kütsü shi akukuhou pishi-puju chekemi lakhi; ayeza papelu keu lono achipiumikucho shilu cheghi aye, ni ye tukutiye kühae.

⁷ Ikemu I no kiu alá shilu püaghi namu Khristo ghenguno tipaqo ye adou kepi I no kümsüluvae.

⁸ Tilikhi kumo no, Khristo Jisü ye I Mpeu kepi I no ithilu keu hu no amekushou shilu keu ghenguno, kütau kümtsü adou kepi I no kihivae. Ni ye pa ghenguno kümtsü phevae eno thime kütauqo ye xinexigha kepi kihivae, tishianguno ni ye Khristo pesü I lá shilu

⁹ eno pa gholo küqhaluve niye ke. Ayeza papelu keu vechewo I likhi I chipiumikucho shilu keu kumo kemu Khristo shou pülülu keu lono achipiumikucho akeu hu ke—achipiumikucho tiye aküpülü vechewo Alhou lau no ighi cheni.

¹⁰ Iyei, ni ye Khristo ithinishi ani, tiye paw xülekuthu küká ithi nikeu eno pa ghime gholo küsaje nikeu, pa kithí ghola lono pa kimihi shiwuve nikeu,

¹¹ eno tishilu keu vechewo kíshi kela shimu akithí lono xülekuthu shilu peniye ke.

¹² Ni ye hipaqo kümtsü ithuluve ake kumoe, momu I kimiji toluvea ke kumoe, ikemu ni ye hipaqo pesü iw shiluve nike pükapütsa cheni, kughengu Khristo Jisü no I pesü paw shiluvea ke.

¹³ Athiküzümi eno achelimiqo, I likhi ni ye tipau toluva kepi kümsü chemoe. Ikemu thime lakhi I no shi cheni: tiye, I thiu kiu ani keno kümsümave no azüu kiu ani keno ti küdau pükapütsa sü wucheni,

¹⁴ ni ye akimiji küdau asaxu qelu niye vejoi pokive wucheni kughengu hi ghenguno Khristo Jisü vechewo Alhou no kungugha küxü lo I kulù ke.

Paul toi Shini keu

¹⁵ Tishiaye, ningu khunoqo no aküpülü küxü lo tekhoiva keno kümtsü hitoi kümsü moayesa ke. Eno atüqhüdo hami lo nongu kümsü kütüqüve aghí aye tipau ghí Alhou no nongu pelo mütsümishei vethalu pe nani.

¹⁶ Tishiaghi namu ningu ye ningu no kiu ithuluva keno tipau qhemi xüni nolo.

¹⁷ Athiküzümi eno achelimiqo, nongu kümtsü I no shi chekeu toi shilo, eno nongu no ningu pesü akühapu shi akeu toi, khunoqo no ningu toi xü cheni keno tsaqüi panongu jukuto lo.

¹⁸ Kughengu I no azüu nongu vilo müamzü pi acheke toi eno itehi ghí nongu vilo anhezü kutólo ipeghino itaghi piani, ike tiye timi kutomo no Khristo’w kros ghümi shi xü anike.

¹⁹ Pano küxü shekha ye kütsakungo keu ke, panongu kive kichhipu no panongu lhou shi acheni, eno panongu ye akukujopu pesü pano jekipi shi acheni ke. Panongu kükümsü ye hipau yeghi lo thimeqo shou kümsüpuku pe acheni.

²⁰ Ikemu ninguw aghakütsa hu ye kungugha lo anike. Eno ningu ye tilau no Xakuluu ighi nikeu khekulhoshi ani, tiye Ampeu Jisü Khristo

²¹ khuu thowkha kümtsü paw ghaküsü qholo qhikulupu küká ani keno, pa no ningu phimpi kilive tsü nani eno tishi keu vechewo ningu phimpi ye pa juküvü phimpi toi pekilive tsü nani.