FILIPIAMI 2 - Sümi Tiqhelimi Bible

Khristo Qhokighe toi Shini keu

¹ Tighenguno nongu no Khristo gholo küqha pe akeu vechewo kiuala shikumtolu aghí, paw kikimiye vechewo alokughuno kiuala ithulu aghí, Aghungu lono kiuala aqǘ shi küsajelu aghí, kuloniküghüvüi keu eno kimiyeqhiyi keu aghí aye,

² akükümsü aphiphi shikeu, kikimiye aphiphi shikeu, aghungu lono lakhi shikeu eno akükümsü lakhi shikeu vechewo I lokiqi kupu tsülo.

³ Alakimine momu alikhi asüqhe keu pesü kiu-kiumu shi kevilo. Tishini ke züqhulo, aqhokigheu shi püzü kütami no O nguno akiviu kepi kihi lo.

⁴ O likhi O pulou shini keu jukuto kevilo ikemu nongu lakhi-khi no kütami pulou shi kilé nikeu jukuto lo.

⁵ Nongu lakhi no lakhi sasü kütshükime akeu lo Khristo Jisü kükümsü toi xapu lo:

⁶ Pa ye Alhou lhoaye qhemi lo anamu pa pesü Alhou qhemi lo amasa kepi kümsümoe;

⁷ tishini ke züqhulo, pa likhi pa pesü kiumu kumo keu shive eno aqemi lakhi lhoaye pepuve, ningu toi timi lakhi shi pa punú.

⁸ Pa ye pa likhi pa pesü aqhokigheu shikeu vechewo kros lo thike kutólo ghí aghokulu shike!

⁹ Tighenguno Alhou no pa pesü akiqheu-a lo süqhe tsüke eno aje kütau kümtsü nguno akiqheu je pesü pa tsüe,

¹⁰ tishianguno kungugha lo eno ayeghi shou eno ayeghi qholo kümtsü no Jisü je gihu ghi qhoqhünhe nani,

¹¹ eno Apù Alhou juküvü shi ghi timi kümtsü no Jisü Khristo ye Ampeu kepi ikhilu no asheshu nani.

Nhenheshimo no Mülà lo

¹² Tighenguno, I no kimiye chekemi shompamiqo, I no akelo nguno alau no I no küha kelo nongu no alhokuthu aghokulu shi acheke toi msà khokhoshi nonguw xakulu xathi pìyelo,

¹³ kughengu Alhou no pa kimiji kivi shikupulu penike eno pulolu penike ghenguno nongu lolo mülà acheni.

¹⁴ Nhenheshimo momu kütsalamo no thowkha shilo,

¹⁵ tishianguno nongu pelo tukutiye küha no akimthe shi püzü, “tuchighi keu eno küsakügha tiqheli lo Alhou nuli akipimí küha keqo,” shilu pe nani. Tisheno nongu ye panongu gholo atsütsǘ lo ayepuqo toi vüipeghi nani.

¹⁶ Tiye nongu no ithamo no aküxüpu tsa pelu keu lono shilu nani ke. Tishilu keu vechewo ni ye adou lono pokive püamo momu mülà pe püamo kepi Khristo tsalà lo agijivileilu nani.

¹⁷ Ikemu tsalá nongu kümlagho eno akümlà lono nongu küpülü vechewo ni ye atsaiji leqhipe mülá nikeu lakhi toi akipti-a lo ikhiphe pe tsüve kepu shi namu, ni ye alokivishi nani eno nongu kümtsü gholo alovi küqha nani.

¹⁸ Ikehu nongu ghí alokivishi no I gholo alovi küqha moayesae.

Timothy ngò Epaphroditus

¹⁹ Ampeu Jisü shou lajukibe shi no ni ye kighithe no nongu lau Timothy puwu niye shi ani, tishianguno nongu ghili sütsa chilu no ni ghí alovilu niye ke.

²⁰ I ghengu ye, pa toi nongu kivipu ghenguno kuchou no alomsü tsüní kemi kütami khiumu kühae.

²¹ Kughengu Jisü Khristo ghenguno kumo no timi kümtsü pano likhi pano ghenguno alokümsü shi akhani ke.

²² Ikemu nongu no ithi akeu toi Timothy ye pa likhi pa ye khuu keno kimichivae, kughengu anu lakhi no apù gholo mülà küqha ake toi pa ye atsakiviu kümlapù lo I gholo mülà küqha ighivae.

²³ Tighenguno, I lau kiu shive nani keno ithive kemtsa ni ye pa puwu nike kümsü ani.

²⁴ Eno ni ampi ghí kighithe no ighi nike ni ye Ampeu lau pülükibe shi ani.

²⁵ Ikemu I no kümsüju kelo I thiküzüu, I gholo mülà küqha akeu eno Khristo tsakiviu qeu aküsàu Epaphroditus khuu nongu ghinikishiu ghí keno, nongu lau puwuve moayesa nani. Pa ye I no avehupu shi akelo tucho penike nongu no puwu keu hu ke.

²⁶ Kughengu pa ye nongu kümtsü kümsü ani eno nongu no pa no sǜ akeu ghili chiluve keu ghenguno pa ye ighono amlosa ani.

²⁷ Kuchou no pa ye sǜ ake, eno kitila kumo thiveni che ghí ke. Ikemu Alhou’w kimiyekini pa shou ake, eno pa likhi kumo no I shou ghí atsü ke. Tishi keu vechewo I mloghime shou amloghime veqabe pemo ke.

²⁸ Tighenguno ni ye pa puwu nike alau shi khekulhoshi ani, tishianguno kughou nongu no itaghi pa ithulu keno alovilu pe eno ni ghí amloküsa kümghülu niye ke.

²⁹ Tishiaye, Ampeu lono alokivi kijè shi no pa sasǘ lo, eno timi pa toi kemi gihu lo,

³⁰ kughengu pa ye Khristo kümlapù ghenguno kitila kumo thiveni cheghi ke. Pa ye nongu no I kuphu müla no akeu lo I kuphu niye pa küxü pesü akümsapu lo qhike.