FILIPIAMI 1 - Sümi Tiqhelimi Bible

¹ Khristo Jisü qeu Paul ngò Timothy pama no, Khristo Jisü vechewo Philippi lo Alhou’w akimthemiqo eno panongu gholo jukükütsümi eno aghinimiqo kümtsü lau yèlu ani:

² Ningu Papù Alhou eno Ampeu Jisü Khristo vechewo küpükini eno alokiqi nongu gholo apeniu.

Shikimthikütsü eno Akighini

³ I no nongu kümsülu ke kümtsü lo I Lhou shikimthi acheni.

⁴ I no nongu kümtsü ghenguno inikhu ke kümtsü lo, ni ye alhokuthu alokiqi àghi inikhu cheni

⁵ tiye nongu no atüghiu tsalà lono ishi kutólo atsakiviu kümlapù lo kütünaküqha keu ghenguno ke.

⁶ Hitoi pülükibe akeu lo, Alhou khuu nongu lolo akümlà kivi huthuphe keno ashekha kutólo pa no nongu sasü wu nani, eno tiye Khristo Jisü tsalà ighimo ke kutólo ke.

⁷ I no nongu kümtsü ghili hipau ghola lono kümsü akeu achipi ke, kughengu nongu ye I mlo lo ani, ike I tsüghape aghina momu atsakiviu süsho eno shikumto aghí namu nongu kümtsü no I gholo Alhou’w küpükini küsaje anike.

⁸ I no Khristo Jisü’w ivüilai keu lono kíshi nongu kümtsü kümsü acheni keno Alhou no thopi shi tsülu nani.

⁹ Eno I kighini ye hipau ke: tiye nonguw kikimiye pelo akighithi eno juchhokulu kuthò lono alau shi kupukuno shilu peniye ke,

¹⁰ tishianguno nongu pelo kiu no akiviu keno jupililu pe eno Khristo tsalà ghenguno akimthe eno tukutiye küha püzü,

¹¹ Jisü Khristo lau no ighi keu achipiumikucho xathi no shepichhilu peniye ke—kughengu hino Alhou jekipipu eno shekiqhepu shilu nani.

Atsakiviu Pikülhalu keu lo Paul Lokivi

¹² Athiküzümi eno achelimiqo, kuchou lo ye I lau kiu shive keno tino atsakiviu pekholu kepu shilu kepi ni ye nongu pelo ithi penishi ani.

¹³ Eno tishi keu vechewo, kükami ki khepe akeu qha kümtsü lo eno timi kümtsü lau ni ye Khristo ghenguno akughu shi ani kepi mütsümisheivae.

¹⁴ Eno I no akughuki lo akeu ghenguno athiküzümi eno achelimiqo akichiù no Ampeu shou pülükibe qhiluvea eno akümsa küha no atsakiviu pesü asheshu nikeu lo alau amlo kumto shiluvae.

¹⁵ Kucho nomu timi khami ye anhekushu eno kumgho ke láu no Khristo ghili pesü kütsü cheni, ikemu kütamiqo ye amikucho shi Khristo ghili pesü kütsü cheni.

¹⁶ Aloke láu no kütsü chekemiqo ye ni ye atsakiviu sükusho ghenguno akughuki lo sǘ pe püakeu ithi ghi kikimiye láu no kütsü cheni.

¹⁷ Anhekushu eno kumgho ke láu no Khristo ghili pesü kütsü chekemiqo ye kuchou no kumo no alakimine ju-aje ghenguno Khristo ghili pesü kütsü cheni ke, tiye I no akughuki lo ake dolo no panongu ye I ghenguno aküküpüna xukutho phelu nani küghashi shiju ke.

¹⁸ Ikemu tiye kiu shini kea? Akhotou ye hike, kichileu kimiji lono shi aghina kuchou kimiji lono shi aghí namu, alaghi jeli lono Khristo ghili pesü kütsü anike. Eno hi ghenguno ni ye alovishe anie. Iyei, eno ni ye tamo no shishe alovi anani,

¹⁹ kughengu I no ithi akeu no nongu kighini eno Alhou no Jisü Khristo Ghungu tsüpüa keu kukuphu vechewo I lau kiu shivea keno tipau no I xaphekulupu shive nani ke.

²⁰ I no khekulhoshi laju eno huqhe akeu ye ni ye khilemu kujovemo nani, ikemu pülhapuju shiche ketoi eno itehi ghí amlo kumto no chhitoi shi ani, tishianguno, xü kepu shina thikepu shi namu I phimpi lono Khristo süqhelu pe nani.

²¹ Kughengu I no xü akepu shi aye Khristo ghenguno ke, eno thive kepu shi aye I lá ke.

²² I no xü akepu shi aye, ni ye Khristo ghenguno alá shikulupu kümlà shi anani ke. Tishiaghi namu ni ye khikhiu kisheni kea? Ni ye pi mülae!

²³ Ni ye hiküma dolo tsakibi pe anie: Ni ye aküxü hipau qhive no Khristo gholo auve nishi anie, tipau pavi kuchou ke;

²⁴ ikemu I no xü aghí keu no nongu ghenguno alau avehupu shi anike.

²⁵ Hipau lo ishi vethalu ani, I no ithi akeu no ni ye xü anani, eno nongu no ikowolu eno aküpülü lono alokivishi akeu kümtsü lo ni ye nongu gholo anani,

²⁶ tishianguno I no nongu gholo akeu vechewo itaghi nongu no Khristo Jisü lono agijivilei achekeu I vechewo kupukuno shi alu peniye ke.

Atsakiviu lo Aküzüpu Küxü

²⁷ Kiu-kiu shive namu, nongu likhi nongu pesü Khristo tsakiviu lo kiu aküzüpu keno tipau shilo. Tishianguno I no ighino nongu sasü kusholu na, I küküha lo nongu no kíshi ani keno tipau ghili likhi chilu namu, nongu no amlo lakhi shi no puthugho akeu, eno atsakiviu küpülü ghenguno akükümsü lakhi shi no pükapütsa akeu I pelo chilu pelo.

²⁸ Kiu lonomu nongu lachile akemiqo pelo nongu shikümsave pe kevilo. Hiye panongu kütsave nikeu michipu ke, ikemu nongu ye Alhou no xaluve nani.

²⁹ Kughengu nongu pelo Khristo pülülu keu likhi kumo no pa züqhu shi ime nikeu dokivi ghí kophe pe nongu tsüvea ke.

³⁰ Tishiaye I no kumjo achekeu nongu no ithulupüa keu eno ni ye tishi achephi kepi nongu no chilu akeu toi, nongu ghí kumjo keu sholu anike.