Ephesiami 6 - Sümi Tiqhelimi Bible

¹ Anuliqo, nongu pù-aza gholulo kughengu hiye Ampeu’w timiqo kümlapù saje ke eno tishi keu no achipi ke.

² “Nongu pù-aza gihu lo,” hiye tushokiqhi gholo azakütsü atüghiu ke.

³ “Tishianguno O pelo akivishi apenike eno O pelo ayeghi lo axükushu shilu penike.”

⁴ Apù-azanoqo, nongu nuliqo mlo shikighide tsü kevilo; tishini ke züqhulo Khristomi no qophe eno shika chekeu ghola lono panongu saputhulo.

⁵ Aqüaxemiqo, nongu no Khristo gholu chekeu toi agigihu eno sükümsa gholo amikucho mlo xapusü ayeghi lo nongu mpemiqo ghokulu shilo.

⁶ Panongu no nongu ju akelo panongu mlo chulu nikeu ghengu likhi no aghokulu shi kevilo, ikemu Khristo qüaxemiqo toi, nongu mlo kuchou no Alhou pulou shi alo.

⁷ Timi qe akeu kumo no Ampeu qe akeshi, amlo kuchopu tsü no nongu kümlà shilo,

⁸ kughengu panongu no aqüaxemi shi aghina momu kuqhopheve kemi shi aghí namu Ampeu ye panongu no kiu akivishi keno tipau ghenguno timi lakhi-khi qesaxu tsü nani kepi nongu no ithi anie.

⁹ Eno ampemiqo, nongu ghí tipau tho lono nongu qüaxemiqo peitha lo. Panongu kichi kevilo, kughengu nongu Lhou khuu kungugha lo ani keno, pa ye ampemi eno aqemi kinikujo Mpeu ke ipi nongu no ithi ani, eno pa ye agikuju shichemoe.

Alhou Ghünanu

¹⁰ Ashekha shi hi ithilo: Ampeu kughushu küká lono akumto shi alo.

¹¹ Alhou ghünanu kümtsü pepulo, tishianguno nongu ye tüghami müqümgha lhoküsaqo zülo puthugholu kepu shi nani.

¹² Kughengu ningu ye timi sasü küpüghǘ anike kumoe, ikemu ayekipemi, kükagha pe akemi, àküzǘ yeghiqha hipau ayekipemi eno kungugha kükaqha yekipe lo küsakügha ghawu kükaqo sasü küpüghǘ anike.

¹³ Tishiaye Alhou ghünanu kümtsü pepulo, tishianguno kughou küsakügha tsalà ighini keno nongu pelo ithamo no puthugholu peniye ke, eno nongu ye küpüghǘ keu ashekha shive kethiu ghí akumto shi puthugho aghílu peniye ke.

¹⁴ Tighenguno ithamo no puthugholu lo, amikucho pesü nongu pokha shi pulo; achipiumikucho pesü amla küküzüpu shi pulo;

¹⁵ eno aloino keu tsakiviu pikülha nike kutò pe akeu pesü nongu pukhukuqho shi qhopu lo.

¹⁶ Hipaqo kümtsü gholo, aküpülü züto pepulu lo, hipau pesü nongu no küsakügha miküyiqü pijí vepuwu keu kümtsü ghapinhelu nani.

¹⁷ Xakulu pesü ayikütsüqho shi pulo eno Alhou tsa pesü Aghungu lo akihizüta shi ikhilulo.

¹⁸ Ado aghuloki kümtsü lo Aghungu lono qhüiniju eno inikhu achelo. Amlo lo hipau qhi no kutokughoi alo eno pülhapuju Ampeu’w timiqo kümtsü ghenguno tamo no inikhu achelo.

¹⁹ I ghenguno ghí inikhu tsü alo. Tishianguno kugho-kughomu I no atsa pìní kelo I pelo msàmo no atsakiviuw tuqhou ithilu pe kepu tsaqo I tsüpe niye ke,

²⁰ kughengu ni ye atsakiviu ghenguno ayikichhe no tshüpe akemi lashikami lakhi ke. I pelo msàmo no I no pi moayesa keu toi piphelu apenike inikhu tsü alo.

Kishekha Petha

²¹ Ampeu lono pichebekulu qeu eno kimiye chekeu athiküzüu Tychicus no nongu vilo kümtsü pi nani, tishianguno nongu ghí ni ye kíshi ani eno ni ye kiu shi ani keno ithilu peniye ke.

²² Hipau vehu kimji ghenguno ni ye pa pesü nongu lau puwu ani, tishianguno nongu pelo ningu ye kíshi ani keno ithilu pe, eno pa pelo nongu shikumto tsüpe niye ke.

²³ Athiküzümi eno achelimiqo kümtsü lau aloino keu gholo Apù Alhou eno Ampeu Jisü Khristo lau no ighi keu küpülü eno kikimiye apeniu.

²⁴ Khunoqo thivemo nikeu kikimiye pesü ningu Mpeu Jisü Khristo kimiye acheni keno panongu kümtsü lau küpükini apeniu.