Ephesiami 5 - Sümi Tiqhelimi Bible

¹ Tighenguno, kimiye chekemi anuliqo toi Alhou’w kiche-kipiye papelo

² eno Khristo no ningu kimiye no pa likhi pa ikhiphe pesü ningu ghenguno Alhou lau axokütsüngü kümlagho eno aghakishi lakhi shi tsüve keu toi, kikimiye lono xüche lo.

³ Ikemu nongu dolo kipito xüküpsa, momu mithekumo jeli kiu-kiumu, momu alakimine kitilamu aghí pe kepu kumoe, kughengu hipaqo ye Alhou’w akimthe timiqo ghenguno achipikumo ke.

⁴ Tike kumo no, kujomo keu tsa, nikhanigha tsa momu ghaghu-ghale zügha tsaqo ye nongu ghenguno aküzüpu kumoe. Tishini ke züqhulo shikimthi keu Alhou tsüa kepue.

⁵ Nongu ye hipau vehu lo mütsüqhei lo: Xüküpsami, mithekumomi momu alakiminemi ye ajulho kümlamí ke, timi hitoi kemi ye Khristo eno Alhou kükaphu lo amheghi ighí müla nani.

⁶ Timi khuu pelomu nikhanigha tsa pesü nongu pishiqhive pe kevilo, kughengu hitoi keu ghenguno khunoqo no hekibidemi keno panongu shou Alhou loghu ikughi cheni.

⁷ Tighenguno panongu sasü küküsü kevilo.

⁸ Kughengu ghuthu lakhi lo nongu ye àküzǘ lo acheke, ikemu itehi ye Ampeu lono nongu ye aküvü lomi shivae. Aküvü lo akemi toi xüche lo

⁹ (kughengu aküvü xathi ye kümtsü akivipu, achipiumikucho eno amikucho ke)

¹⁰ eno kiu no Ampeu pulou shilu cheni keno tipau phulo.

¹¹ Àküzǘ lo athi pithímo keu kümlàqo lo chhosü kevilo, ikemu tishini ke züqhulo tipaqo aküvü lo pephe-piye lo.

¹² Hekibidemiqo no tuqhou no shi chekeqo ghili ye pìní keu ghí akukujopu ke.

¹³ Ikemu thowkha kümtsü aküvü lo pephe-piyeve keu vechewo ithukulupu shive cheni—eno yepüvüve keu thime kümtsü aküvü shive cheni.

¹⁴ Hi ghenguno ishi pike: “Zü akemiqo, ithuvelo, kithimi gholo no ithughivelo, eno Khristo no nongu shou yepüvü tsü nani.”

¹⁵ Tishiaye, nongu ye kíshi xü acheni keno jukuto lo—nikhanighami toi xü kepu kumo ikemu alokütsümi shi xülo,

¹⁶ adokivi ithukulu kümtsü akivishi peitha lo, kughengu itodolo ye ado lhoküsa shi anike.

¹⁷ Tighenguno nikhanigha shi kevilo, ikemu Ampeu pulou ye kiu keno vethalulo.

¹⁸ Aji shomzü kevilo, tiye ghüpoghüzü küxü lo sawuve cheni ke. Tishini ke züqhulo Aghungu Kimthe pesü nongu pichhilu lo

¹⁹ nongu lakhi no lakhi lau leshele, akishé le, eno Aghungu lo le phelo. Nongu mlo lono ipeghino Ampeu lau ale phelo,

²⁰ pülhapuju ningu Mpeu Jisü Khristo je lono thowkha kümtsü ghenguno Apù Alhou shikimthi tsülo.

Khristomi Kibo ghenguno Shikakütsü

²¹ Khristo gihu akeu ghenguno lakhi no lakhi qhoqhü lo.

²² Anipuqo, nongu no Ampeu qhoqhü keu toi pütüta kimi qhoqhü lo.

²³ Kughengu Khristo no akukuhou kütsü kehu toi akimi lakhi ye anipu shou akütsü ke, eno akukuhou khikhi pa phimpi keno, Khristo no tipau Xakuluu ke.

²⁴ Ikehu akukuhou no Khristo qhoqhü cheke toi, anipuqo ghí thowkha kümtsü lo panongu kimiqo qhoqhü moayesae.

²⁵ Akiminoqo, Khristo no akukuhou kimiye püzü li ghenguno pa küxü tsüve keu toi nongu nipu kimiye lo.

²⁶ Khristo no hipau shikeu ye pa tsa vechewo azü pesü akukuhou qhukimtheve no li pelo akimthe shipe niye ke,

²⁷ eno axiné küha no momu idivemo momu kütau tukutiye kiumu küha no akimthe eno jekujeli küha no li pesü pa likhi pa lau jukighilepu kukuhou lakhi shitsü niye ke.

²⁸ Hipau tho lono, akiminoqo ghí panongu likhi panongu phimpi toi panongu nipu kimiye moayesae. Khuu no pa nipu kimiye cheni keno pa likhi pa kimiye cheni.

²⁹ Kughengu timi khumu pano likhi panongu phimpi mithi chemoe, ikemu Khristo no akukuhou lau shiche ketoi panongu ye panongu phimpi lojí eno tucho acheni—

³⁰ kughengu ningu ye pa phimpi lo kihiküsümiqo ke.

³¹ “Hi ghenguno kipitimi lakhi ye papù eno pazá qhive no pa nipu sasü kümtsa küghünauve cheni, eno pama ye aphi-ashi lakhi shive cheni.”

³² Hiye ighono tuqhou lakhi ke—ikemu ni ye Khristo eno akukuhou ghili pi anike.

³³ Tishi namu, nongu lakhi-khi no nongu likhi nongu kimiye ketoi nongu nipu kimiye moayesae, eno anipu ghí li kimi gihu moayesa ke.