Ephesiami 4 - Sümi Tiqhelimi Bible

Aphimpi lo Küqha pe akeu

¹ Tishiaye ni Paul, Ampeu ghenguno akughumi lakhi shi akeu no, nongu pelo nongu kulùve keu qhemi aküzüpushi xü penike nongu hakite ani.

² Alhokuthu aqhokighe eno akümtsha shilo; kheakulu shilo eno kikimiye lono lakhi no lakhi lau küsüqhikulu shilo.

³ Külakishi lono tsüghaküqha keu vechewo küqhakulu Ghungu qhilu nike ghenguno thowkha lo pükapütsalo.

⁴ Nongu kulù kelo lajupu lakhi lau kulùve keu toi, aphimpi lakhi eno Aghungu lakhi ani;

⁵ Ampeu lakhi, aküpülü lakhi, baptiz shikepu lakhi;

⁶ Alhou lakhi eno kümtsü Papù, pa ye kümtsü shou Ampeu eno kümtsü lau mülà ani eno kümtsü lolo ani.

⁷ Ikemu Khristo no küsaje tsü keu toi ningu kümtsü lau küpükini tsüpüani.

⁸ Hi ghenguno ishi pipüani: “Kughou pa no qhemghai keu lo ikuve keno, pa ye akughumi kutomo sawu eno Aghungu ghòqo pesü paw timiqo tsüke.”

⁹ (“Pa ye ikuve” ipikeu kiqi ye pa ye ayeghi qhou ghí iqi ipi ani thono kiu piani kea?

¹⁰ Pa, khuu no iqi keno pa no ayeghiqha kümtsü pichhi nike ghenguno kungughaqo kümtsü nguno qhemghai keu lo iku ke.)

¹¹ Ike Khristo no aghò pesü apostolmi, tungkupumi, tsavipemi, akhemi eno shikükamiqo tsüke,

¹² tiye hukuthu kümlapù ghenguno paw timiqo kutokughoi pe qhi niye ke, tishianguno Khristo phimpi shiqhepukulu peniye ke,

¹³ tiye ningu kümtsü aküpülü eno Alhou nu ithive keu lono küqhaluve püzü tekhoi shiluve no Khristo ye khuu keno pa ghili kuchopu ithikupu lumo ke kutólo mülà ape niye ke.

¹⁴ Tisheno ningu ye itimi shiauvemo nani. Ningu ye azü no tukucho akeshi eno shiküka zümlhü jeli kümtsü vechewo timiqo no panonguw tuqhou pishikiqhi kukughu eno müqüijo keu vechewo hula-hila fupuwuvemo nani.

¹⁵ Tishini ke züqhulo, kikimiye lono kuchou tsa pikeu lono ningu ye alaghi jeli lono Khristo khuu no akütsü keno pa phimpi lo tekhoilu ghi thuwulu nani.

¹⁶ Pa lau no aphimpi kuchopu kimepe eno tsüghaküqha pesü ani eno anhü tshüpüa keu hu no aphimpi kuchopu kimelu anipe ke. Kughou aphi-au lakhi-khi lo kiu shikepu keno shi aghí aye kimiye keu vechewo aphimpi kuchopu thuwulu cheni eno xaqhepukulu cheni.

Khristomi Küxü

¹⁷ Ikehu I no nongu vilo hi piani, eno Ampeu je lono tamo no hipau pikichi ani, ike tiye Jewkumomiqo no panonguw ameküha keu kükümsü shou bepe xü akeu toi nongu ye tishi xü kepu kumovae.

¹⁸ Panongu kükümsü ye àküzǘ lo ani eno Alhou no tsü keu küxü lono kütüta shivae, tiye panongu lolo ayekümtha akeu vechewo panongu mlo mükamüghaive tsü akeu ghenguno ke.

¹⁹ Panongu ye akukujo kiumu kühae, eno panongu ye mithekumo jeli lo chhosü aní keu ghenguno panongu likhi panongu ikhiphe pesü ashi-aji pulou lo tsüve ke, eno panongu ye alakimine no chhitoi ke.

^20-21 Tishi namu nongu no Khristo ghili chilu eno Jisü lolo kuchou akeu gholo puloküqhalu ghi pa lau no aküxü laghi ithi keu ye tishimo ke.

²² Ikemu nonguw khaghi küxü ghola vehu lo nongu vilo nongu lhoaye aqau khikhi ti pishikiqhi kükümsü no shikuchubevea keno tipau ikhiqhivelo ipi shika ke;

²³ tiye nongu kükümsü lo kümsü chekeu akithé shive tsü;

²⁴ eno nongu lhoaye akithé pepuluve moayesa, tiye Alhou toi kuchou amikucho eno akimthe shipe niye lhosü keu ke.

²⁵ Tighenguno akimiki tsa pi kevilo. Nongu lakhi-khi no nongu kisüghümi vilo kuchou tsa pilo, kughengu ningu kümtsü aphimpi lakhi lo kihiküsümi ke.

²⁶ “Amloide namu axiné shi kevilo”: Atsala kupuju amloide auve kevilo.

²⁷ Eno adokivi pesü tüghami tsü kevilo.

²⁸ Khuu no püka cheni keno pükamove moayesa, eno tishini ke züqhulo akümlà shi moayesa, pano likhi pano u peitha no kiuala akivipu kümlà shi moayesa, tishianguno panongu pelo khunoqo aveküsa shi ani keno tipaqo lau kiuala aghí keu pesü küsajelu kepu shilu pelo.

²⁹ Nongu kichí lo shiküpüsa tsa kiumu ipeghi pe kevilo, ikemu kütami no avehupu shi akeu kiqi lono kiu no panongu shiqhepukulu nani keno tilikhi pilo. Tishilu keu vechewo khunoqo nongu kükütsü ini ani keno tipaqo pelo alá shilu peniye ke.

³⁰ Eno Alhou Ghungu Kimthe shikulosü kevilo, nongu ye xachilekulu tsalá ghenguno pa gholo mekha küqhavea ke.

³¹ Kuqhumo keu, aloghukighide eno amlokighide, muqhumüza keu, pipütha keu eno axeküsü jeliqo pevelo.

³² Lakhi no lakhi lau küpüqhiyi eno kimiyeqhiyi lo, Alhou no Khristo vechewo nongu kipimí qhivetsü ketoi, nongu lakhi no lakhi kipimí qhitsüa lo.