Ephesiami 3 - Sümi Tiqhelimi Bible

Jewkumomiqo ghenguno Alhou’w Akichiqhipu Kukughu

¹ Hi ghenguno ni Paul ye nongu Jewkumomiqo je ghenguno Khristo Jisü’w akughumi shike.

² Nongu ghenguno Alhou’w küpükini bemakho khikhi I tsü keno, nongu ye tipau chiluvea pütsá ke,

³ tiye, I no ikhonhei shi yèpe qhipüa keu toi piyeküsü vechewo I lau Alhou’w tuqhou pìye keu ke.

⁴ Tishiaye, hipau philu keu lo nongu ye Khristo’w tuqhou hu iw juchhokulu lo vethakulupu shi nanie,

⁵ tiye tiqheli kütau lo ye timiqo pelo ithi pemo ke ikemu itehi ye Aghungu vechewo Alhou’w akimthe apostol ngò tungkupumiqo lau pephe-piyevae.

⁶ Alhou’w tuqhou hipau ye atsakiviu vechewo Jewkumomiqo no Jewmiqo gholo aqó shi amheqhi kiyighimi shikeu, aphimpi lakhi lo aqó shi kihiküsümi shikeu, eno Khristo Jisü’w pikiqhi lo aqó shi küsaje keu ke.

⁷ Ni ye pa küká kümlà vechewo Alhou’w küpükini ghò I tsü keu vechewo atsakiviu hipau qemi lakhi shilu ke.

⁸ Ni ye Ampeu’w timiqo kümtsü gholo akuu-amighiu shi aghí namu, küpükini hipau pesü I tsüke: tiye Jewkumomiqo lau Khristo’w ashekha-aghile küha keu kinikülü ghili kütsü nikeu,

⁹ eno Alhou khuu no thime kümtsü lhosü keno pa gholo wove keu tiqheliqo lo küsüpüa keu tuqhou hipau kümtsü lau mütsümishei ithikulupu shilu peniye bemakho I tsüke.

¹⁰ Pa kupulo ye itehi akukuhou vechewo kungugha kükaqhaqo lo ayekipemi eno kükagha lo akemiqo lau Alhou lokütsü jeli kümtsü ithi peniye ke,

¹¹ tiye pa no ningu Mpeu Khristo Jisü vechewo paw lhokta kimiji toluve keu kiqi lono ke.

¹² Pa gholo xüküqha pe akeu ghenguno eno pa lau aküpülü akeu vechewo ningu ye ighümo no pülükibe shi Alhou lau wulu nani.

¹³ Tighenguno I no nongu vilo piani, I no nongu ghenguno ime akeu ghenguno aghüthisüve kevilo, tiye nongu juküvüpu ke.

Ephesiamiqo ghenguno Akighini

¹⁴ Hipau ghenguno ni ye Apù Alhou gizülo qhoqhünhe acheni,

¹⁵ pa vechewo kungugha lo eno ayeghi shou thowkha kümtsü lhophe ke.

¹⁶ I no inikhu akeu ye pa juküvü kinikülü shi akeu lono pa pelo pa Ghungu küká vechewo nongu lolo shikumto tsüpe niye ke,

¹⁷ tishi keu lono aküpülü vechewo Khristo pelo nongu mlo lo pa kungo-a shilu peniye ke. Eno I no inikhu akeu ye nongu pelo kikimiye lo aboqha shiluve eno akuhu qüsüluve peniye ke,

¹⁸ eno Ampeu’w akimthemiqo gholo aqó shi Khristo’w kikimiye ye kiutoi kijè, kushuwa, qhemghai eno thonhei keno ithilu kepu küká aluve peniye ke,

¹⁹ eno kikimiye hipau ye akighithi hekiye cheni kepi ithilu peniye ke—tishianguno Alhou’w kupukulu kümtsü pesü nongu pelo chhitoilu peniye ke.

²⁰ Itehi ye Alhou khuu pa küká ningu lolo akümlà shi akeu kiqi lono ningu no khu keu momu kümsü keu nguno alau kimghi kümlapú kutólo shikulupu ani keno,

²¹ akukuhou lo eno Khristo Jisü gholo no tiqheli kümtsü lo alhokupuju lono alhokupuju kutólo pa lau ajuküvü ache pelo! Amen.