Ephesiami 2 - Sümi Tiqhelimi Bible

Khristo lono Aküxü shive keu

¹ Nongu ye nongu hekibide eno nongu xiné lo thive no acheke.

² Tiye nongu no kughou hipau yeghi laghiqo ngò amlhü kükaphu yekipe khikhi itehi khunoqo no agholu chemo keno tipaqo gholo mülà akeu ghungu pape chekeu küxü lo xüache keu hu ke.

³ Ningu kümtsü ghuthu lakhi lo ye panongu gholo xüche ke, tiye ningu shi-aji no mine keu ghapiqi ghi eno tipau no shinishi keu ngò tipau kükümsü pape keu vechewo xüache ke.

⁴ Ikemu paw kikimiye kijè ningu ghenguno akeu vechewo Alhou khuu kimiyeqhiyi keu lo kinikülü keno,

⁵ pa no ningu no hebideve keu lono thive no ake ghuloki lono Khristo gholo no ningu xüputhu ke—nongu ye küpükini vechewo xaluvae.

⁶ Eno Alhou no Khristo gholo no ningu xüputhu no Khristo Jisü vechewo kungugha kükaqha lo pa gholo iqalupe ke,

⁷ tishi keu vechewo ighi nikeu tiqheli lo pa no paw kimghi müla keu küpükini kiní khikhi Khristo Jisü vechewo paw küpüqhiyi keu ningu lau pephe-piyevea keno tipau pìye niye ke.

⁸ Kughengu nongu ye küpükini lono aküpülü vechewo xaluvae—eno hiye nongu likhi nongu no shilu ke kumoe, hiye Alhou’w aghò ke—

⁹ akümlà vechewo kumoe, tishianguno khuu pelomu qheza pemo niye ke.

¹⁰ Kughengu ningu ye Alhou no azüu no ningu ghenguno akümlà kivi kutò pe qhipüakeqo mülà peniye Khristo Jisü vechewo lhophe ke. Eno ningu ye Alhou’w au no mülà keqo ke.

Khristo Vechewo Jewmi eno Jewkumomi Külashilu keu

¹¹ Tighenguno, nongu khunoqo no atüghi lo ajì lono Jewkumomi keno eno “aphighüyiko ghave kemi” (tiye timi u vechewo aphimpi lo ghave keu) ipi panongu likhi panongu ku chekemiqo no nongu vilo “aphighüyiko ghamo kemi” ipi ku cheni keno tipau kümsülulo—

¹² tipau ghuloki lo nongu ye Khristo lau no kütüta shipe acheke, Israel lo aghakütsami lono kopheve ke eno pikiqhiw puloshoqhiqo lau no tüsümi shi acheke, tiye hipau yeghiqha lo lajupu küha eno Alhou küha no ache ipi kümsülulo.

¹³ Ikemu nongu khunoqo ghuthu lakhi lo ye putosü pe ache keno itehi ye Khristo Jisü gholo xü kimepe keu lono Khristo jì vechewo punukhoi sasü ighivae.

¹⁴ Kughengu pa ampeu no ninguw külakishi ke, pa no amqo kini pesü lakhi shive tsüke eno kimthi kilé keu vechewo kijetha keu kuputu khipau no lakükha shi ache keno tipau kütsave tsüke,

¹⁵ tiye pa phimpi lo ayeza eno tipau yeza zakütsü ngò yezashiqo kümtsü qhive keu vechewo no ke. Pa kimiji ye pa likhi pa vechewo timi jeli kini akeu lono timi jeli kithé lakhi lhophe niye ke, eno tishi keu lono külashiluve,

¹⁶ eno aphimpi lakhi lono kros vechewo pama kinikujo Alhou lau külashilu peniye ke. Hitoi shiluve keu vechewo pa no panongu dolo kimthikile keu shipühave tsüke.

¹⁷ Pa no ighino putosü lo akemiqo eno akupunu lo akemiqo lau külakishi pesü kütsü ke.

¹⁸ Kughengu pa vechewo nongu ghí eno ni ghí Aghungu lakhi vechewo Apù lau wu kulupu shi cheni ke.

¹⁹ Tishiaye, nongu ye tüsümi eno inamiqo kumovae, ikemu Alhou’w timiqo gholo aghakütsamiqo eno pa kibo lo kihiküsümiqo ghí ke,

²⁰ tiye Khristo Jisü ampi no aboqha-tu atou toi shi no apostolmi eno tungkupumiqo shou aboqha shipuku ke.

²¹ Aki kuchopu pa no aqó shi kimepe püani eno tipau pelo Ampeu lau akimthe chineki lakhi shilu penike thuwulu pe ani.

²² Khristo gholo kimepe akeu lono nongu ghí Alhou no pa Ghungu vechewo ngo chekeu-a tipau aqó shi shiqhepukulu anike.