Apostolmi 9 - Sümi Tiqhelimi Bible

Saul Xükithekulu

¹ Tishi ake dolo, Saul ye Ampeu’w akhopemiqo pìthíve nikeu tsaqo pesü panongu kichi kümsà ake. Pa no achinetou lau wu

² no pa vilo Damascus lo Synagogqo ghenguno yèsüqo khu, tishianguno tilau Ampeu Là püla chekemi, kipitimi na totimi namu, pa no phulu kemiqo akughumi shi sasü Jerusalem lo ighi niye ke.

³ Kughou pa no kicheghüzü shisü Damascus kupunú ighive keno paikhavi atsütsǘ lono aküvü lakhi no pa vehomxa pe yeluve.

⁴ Pa ye ayeghi lo ilu iqive eno asütsa lakhi no ishi pa vilo pikeu chilu, “Saul, Saul, no ye kushiye ni pishi-puju cheni kea?”

⁵ Saul no ishi iniju, “Ampeu, no ye khuu kea?” Pa no khochile, “Ni ye nono pishi-puju akeu Jisü ke.

⁶ Itehi ithuvelo eno mishighüna lo ilolo, eno no ye kiu shi moayesa keno O vilo pitsü nani.”

⁷ Saul gholo timi izüwu chekemiqo ye kichi-mama puthugho auve; kughengu panongu ye asütsa chilu kemu khiumu ithumla ke.

⁸ Saul no ayeghi lono ithughi, ikemu kughou pa no anhethi tsükho keno pa ye kiumu ithumlae. Ikehu panongu no pa u sünhe pesü pa sasü Damascus lo ilo.

⁹ Atsala küthü kutólo pa ye anhethi icheve, eno kiumu chu-shomove.

¹⁰ Damascus lo akhopemi lakhi pa je Ananias ipikeu ae. Ampeu no kungunhetsü lono ishi pa kue, “Ananias!” “Iyei, Ampeu,” ipi pa no khochile.

¹¹ Ampeu no pa vilo pi, “Müzüchoi ipi chekeu laghila lo Judas ki lo wulo eno Tarsusmi Saul ipikeu iniju lo, kughengu pa ye akighini shi anie.

¹² Pa ye kungunhetsü lono timi lakhi Ananias ipikeu no ighino pa pelo ithulu kitheluve penike ghenguno pa shou au bekeu ithuluvae.”

¹³ Ananias no khochile, “Ampeu, ni ye timi hipau eno pa no Jerusalem lo ow akimthe timiqo ghimeqhi keu ghiliqo kutomo chiluvae.

¹⁴ Eno pa ye achinetou lau no azah luve no hilau O je ku aghí kemi kümtsü küghaluve niye ighi anie.”

¹⁵ Ikemu Ampeu no Ananias vilo pi, “Wulo! Timi hipau ye iw küghaküsü shi Jewkumomi, kükami eno Israel timiqo lau I je pesü asheshu penike I no kisheluvae.

¹⁶ I je ghenguno pa ye khijehi ime moayesa keno I no pa pìye nani.”

¹⁷ Tipathiu Ananias no wu no aki alou ilo. Pa u pesü Saul shou be püzü ishi pi, “Athiküzüu Saul, Ampeu Jisü, khuu nono hilau wuche kelo alaghi lo O lau ipeghi keno, pa no O pelo ithulu kitheve püzü Aghungu Kimthe no chhitoilu peniye O lau I puwu ani.”

¹⁸ Paikhavi, kiuala akhayiko toi keu no Saul nhethi lono ikiqive, eno pa ye ithulu kitheve. Pa no puthughove no baptiz shiluve,

¹⁹ eno achuqupu hami chuve kethiu pa ye akumto shikitheluve. Saul ye atsala hami akhopemiqo sasü Damascus lo ngove.

Saul no Damascus eno Jerusalem lo wu keu

²⁰ Pa ye paikhavi lono synagog lo Jisü ye Alhou nu kepi kütsü thuve.

²¹ Pa tsa chilu kemi kümtsü no akümzave eno ishi iniju kilé, “Timi hipau ye Jerusalem lo Jisü je picheghi kemi thaqhü kütsakungo cheke kumo keshea? Eno pa no hilau ighi keu kimiji ye Jisü jeku chekemiqo akughumi shi achinetomiqo lau sasü wu niye ighike kumo keshea?”

²² Ikemu Saul ye alau shi mutotoi kitheve no Damascus lo Jewmi küghüna akemiqo phiküghüzü ghi Jisü ye Messiah kepi kimchitsü.

²³ Atsala kutomo wove kethiu, Jewmi dolo no Saul pìthíve nike kümqü keu ipeghi,

²⁴ ikemu panongu no kümqü pe akeu Saul no ithive. Saul pìthíve nike ghenguno panongu no putho-pucho mishighüna khagho lo kheju ache.

²⁵ Ikemu Saul papemiqo no putho lono pa sawo ashoghi lakhi lo sǘve no aliwo kighipe lono kighitipiqive.

²⁶ Kughou pa no Jerusalem lo ighi keno, pa ye Jisü khopemiqo gholo kutubo niye pükapütsae, ikemu panongu kümtsü no pa msà ae, kughengu pa ye kuchou no Jisü papemi lakhi kepi panongu ye pülü müla no ake.

²⁷ Ikemu Barnabas no pa sasü kusho eno apostolmiqo lau sasü ighi. Pa no panongu vilo Saul no kicheghüzü là lo cheke lono kíshi Ampeu ithulu püzü Ampeu no pa pütsa, eno Damascus lo pa no ighümo no kíshi Jisü je lono kütsü keno tipaqo pie.

²⁸ Ike Saul ye panoqo gholo ngove eno Jerusalem qha kümtsü lo akumto shi Ampeu je lono asheshue.

²⁹ Pa no Greek tsa kipími Jewmiqo pütsa eno akikighe shie, ikemu panongu no pa pìthíve niye pükapütsae.

³⁰ Kughou pülüluve kemiqo no hipau ghili ithive keno, panongu no Saul sasü Caesarea lo iqi no Tarsus lo pa puwuve.

³¹ Tipathiu Judea, Galilee eno Samaria qha kümtsü lo akukuhouqo ye alokughuno tüqhüdo ithulu eno panongu ye mtokitheluve. Ampeu sükümsa lono xü keu eno Aghungu Kimthe no shikumto keu vechewo panongu ye akikihi alau iko wove.

Aeneas eno Dorcas

³² Peter no aphu sükümxaqo lo kicheghüzü shiche kelo pa no Lydda lo Ampeu’w timi xüküami xuju niye wue.

³³ Tilehi pa no timi lakhi Aeneas ipikeu kusholu, pa ye aphi ithamlave no ampe tache azüa dapesü acheke.

³⁴ Peter no pa vilo ishi pi, “Aeneas, Jisü Khristo no O shipivi anie. Ithu no O züa liküzüluve lo.” Aeneas ye paikhavi ithuve.

³⁵ Lydda eno Sharon lo xüküami kümtsü no pa ithulu no Ampeu lau xaideghikhae.

³⁶ Joppa lo küpülümi lakhi Tabitha (Greek lo li je ye Dorcas) ipikeu ache; li ye alhokuthu lo akümlà kivi shi eno kumlhomiqo kuphu ache.

³⁷ Tipa ghuloki lo li ye aküsǜ küghaluve eno thive, eno li sükumo ye shikimthe pesü achebo kunguu jolha lo qhipepüa.

³⁸ Lydda ye Joppa phivilo ae; ikehu kughou akhopemiqo no Peter ye Lydda lo ani ipi chilu keno, panongu no timi kini puwu eno Peter vilo hakite ghi ishi pi, “O shikimthi mtazü ighilo!”

³⁹ Peter no panongu gholo wu, eno kughou pa no ighi keno pa sasü achebo kunguu jolha lo saiku. Chimemi kümtsü no pa sümxa pe puthugho ae, eno panongu no qa ghi Dorcas no panongu gholo ache kelo chijeboboi-phi eno tiphimini kütau ghò keqo pa pìye.

⁴⁰ Peter no panongu kümtsü achebo lono khalau ipeve pe; tisheno pa no qhoqhünhe no inikhu. Pa no thive keu totimi küdau tsüghǜ ighi püzü ishi pi, “Tabitha, ithuvelo.” Li no anhethi tsükhove, eno pishipuwo Peter ithulu kelo, li no ithu iqave.

⁴¹ Peter no pa u chhopuwo no li sünhe puthuve. Tishive no Peter no küpülümiqo eno akhotoshi chimemiqo ku püzü pa no li püxü pe panongu tsüe.

⁴² Joppa qha kümtsü lo hipau ghili ithive, eno timi kutomo no Ampeu pülüluve.

⁴³ Peter ye Joppa lo ashiyiko kümlamì Simon ipikeu gholo ado hami ngove.