Apostolmi 8 - Sümi Tiqhelimi Bible

¹ Eno Saul ye timiqo no Stephen pìthíve keu lo puloküqha tsüe. Tipau ghuloki lo Jerusalem lo akukuho shou shishe pishi-puju keu kijè lakhi ipeghive, eno tile apostolmiqo thono küpülümi kütamiqo ye Judea ngò Samaria qha kümtsü lo apanagha khave.

Akukuhou Pishi-puju no Apanaghave

² Alhou’w timiqo no Stephen sükumo qhovetsü eno pa ghenguno shishe mloqae.

³ Ikemu Saul no akukuhoki kütsa thuve. Pa no aki-aki kümtsü lo ilo no küpülümi kipitimi ngò totimi kinikujo süqosü akughuki lo sükhave.

Philip no Samaria lo Wu

⁴ Khunoqo apanagha wukhave keno panongu no khile wu keno tilehi Alhou tsa pesü kütsü.

⁵ Philip no Samaria lo mishighüna lakhi lo iqi eno tile Messiah ghili pesü asheshue.

⁶ Kughou timi aqokitikhi no Philip no pikeu tsa chilu eno pa no amichipu kümlà shikeu ithulu keno panongu kümtsü pa no kiu tsa pi akeno tipau lo amlotsüqhiyi shi ini ae.

⁷ Kughengu mithekumo ghungu no ighamuku ghi timi kutomo phi lono ipeghi, eno aphimpi ithamlave kemi ngò apukhu kinitave kemi kutomo shipivi ke.

⁸ Ikehu mishighüna tipau lo alokivi kijè shiae.

Tuumi Simon

⁹ Tipau mishighüna lo timi lakhi Simon ipikeu ache eno pa ye ado hami züu tumu che püzü Samaria lo timiqo kümtsü kichiqhi ache. Pa ye ajekipimi lakhi ke ipi aqheküza shi ache,

¹⁰ ike akuu-amighiu lono akiqheu kutólo timi kümtsü no Simon lau panongu mlo tsüqhiyi shi no hitoi ighae, “Timi hipau vilo Alhou’w Aküka Akijeu ipi ku chekeu ye achipi lono ku chenei.”

¹¹ Panongu ye Simon no ado kushuwa lono tuumi kümlà shi no panongu kümza chekeu ghenguno pa pape cheke.

¹² Ikemu kughou Philip no Alhou kükaphu eno Jisü Khristo je lono atsakiviu pe kütsü keu panongu no pülüluve keno, kipitimi ngò totimi kümtsü baptiz shiluve.

¹³ Simon ampi ghí pülüluve no baptiz shiluve. Eno Simon ye Philip no amichipu eno akümzapu kümlà shikeu ithulu no pa kümzave keu vechewo aqha kümtsü lo Philip papesü wuve.

¹⁴ Kughou Jerusalem lo apostolmiqo no Samariamiqo no Alhou tsa ikhiluvea ipikeu chiluve keno, panongu no Peter ngò John pama Samaria lo puwu.

¹⁵ Kughou pama no wo toluve keno, anileshi pülüluve kemiqo pelo Aghungu Kimthe ithulu penike ghenguno akighini shitsü,

¹⁶ kughengu Aghungu Kimthe ye panongu khiu shoumu ikughimo no ae; panongu ye Ampeu Jisü je lo likhi no baptiz shive no ake.

¹⁷ Tisheno Peter ngò John pama no pama u pesü panongu shou be, eno panongu no Aghungu Kimthe ithulue.

¹⁸ Kughou apostolmi no au bekeu vechewo Aghungu Kimthe tsü keu Simon no ithulu keno, pa no pisa pesü apostolmi pama tsü

¹⁹ no ishi pi, “Hipau shilu kepu küká ni ghí tsülo, tishianguno I no I u be kemiqo pelo Aghungu Kimthe ithulu penike.”

²⁰ Peter no khochile: “Ow pisa ghí O gholo no pühave peniu, kughengu nono pisa pesü Alhou lau no ighi keu ghò qhülu nani küghashike.

²¹ No ye hipau kümlà lo O vehupu momu O saje kühae, kughengu O mlo ye Alhou zülo achipi shi amoke.

²² Küsakügha hipau lono xaideghivelo eno nono hitoi keu kükümsü O lolo akeu kipimí pevetsü penike ghenguno Ampeu lau lajupu qhi no inikhulo.

²³ Kughengu no ye khumtsai keu no O lolo chhitoi akeu eno axiné no O tshüpe akeu I no ithulu anie.”

²⁴ Simon no khochile, “Nono pive keqo I lau shikupu pemo nike ghenguno Ampeu lau inikhu tsülo.”

²⁵ Ampeu tsa pesü asheshu eno Jisü shepe shive kethiu, Peter ngò John pama ye Jerusalem lo idewove, eno woche kelo Samariami phu kutomo lo atsakiviu pesü kütsüe.

Philip eno Ethiopiami

²⁶ Ampeu’w kungumi no Philip vilo pi, “Apéu küdau asàye laghi lo ti Jerusalem lono Gaza lo iqi chekeu laghi lo wulo.”

²⁷ Ike Philip no alà cheve, eno alà lo che kelo pa no Ethiopiami shoko lakhi kusholu, pa ye Ethiopiamiqo shou Akükaliu Kandake’w akinikhuki jukütsü chekemi kijemi akhotomi lakhi ke. Timi hipau ye Jerusalem lo Alhou mülá niye wue,

²⁸ eno pa ye paw khurkulu lo iqa no tungkupu Isaiah Kaku phi ghi aki lo ide woche.

²⁹ Aghungu Kimthe no Philip vilo pi, “Khurkulu lo wulo eno tipau phivilo ngo lo.”

³⁰ Tisheno Philip no khurkulu küdau posüsü wu eno pa no timi hu no Isaiah tungkupu Kaku phi aghí keu chilue. Philip no pa vilo iniju, “No ye nono phi akeu vethalu anima?”

³¹ Ethiopiami hu no khochile, “Timi khami no I vilo hepho-piyemo aye ni ye kíshi no vethaluni kea?” Ike pa no Philip vilo ikughi püzü pa gholo iqalo ipi.

³² Shokou hu no Kuchoyesü phi akeu ye hike: “Pa ye ambe lakhi ghiqhi niye sawuve ketoi, eno ambeti lakhi no amhi gholu nike zülo iqüighai ngo chekeu toi, pa ye pa kichí xukhomoe.

³³ Pa thogha keu lono achipiu xakütha ghí pa tsümoe. Khuu no pa tikughuko ghili pilu nani kea? Kughengu ayeghi lono pa küxü luve tsüke.”

³⁴ Shokou hu no Philip vilo iniju, “O shikimthi, I vilo pitsülo, tungkupu hu ye khuu ghili piani kea, pa likhi pa ghili piani keo kütami khuala ghili piani kea?”

³⁵ Tisheno Philip no Kuchoyesü tipau kiyedo lono huthu püzü Jisü ghili tsakiviu pesü shokou vilo pi.

³⁶ Pama no alà lo kicheghüzü shiche kelo, azü akeu-a lo ighi eno shokou no ishi pi, “Julo, hile azü ani. I no baptiz shini keu lo kiu no lakha kepu ani kea?”

³⁷ Philip no pi, “Tsalá nono O mlo kümtsü pesü pülü aye tishilo.” Shokou no khochile, “Jisü Khristo ye Alhou Nu kepi I no pülü ani.”

³⁸ Shokou no khurkulu vilo ngo lo pi azah tsü. Tisheno Philip ngò shokou pama kinikujo azü ake küdau iqi püzü Philip no shokou baptiz shive tsü.

³⁹ Kughou pama no azü lono ashou ipeghi keno, Ampeu Ghungu no paikhavi lono Philip sasü wuve, eno shokou ye Philip ithulu kithemove, ikemu pa ye alokivishi pa no wuche keu là lo wuve.

⁴⁰ Ikemu Philip ye Azotus lo ipeghi, eno pa ye kicheghüzü shisü Caesarea tomo ke kutólo atsakiviu pe mishiphuqo kümtsü lo kütsüe.