Apostolmi 6 - Sümi Tiqhelimi Bible

Timi Tsünì Kishelu keu

¹ Tipau ghuloki lo kughou küpülümiqo alau shi iko wove keno, Greek tsa kipími Jewmiqo no Hebrew tsa kipimí Jewmiqo ye tsalà kipetsü achuqupu kijé tsü akeu lo panonguw chimemiqo juzüve tsü anike ipi muchho ipeghive.

² Tighenguno pano Chighikini no küpülümiqo kümtsü aqoshi kukütsü no pi, “Ningu ye akibepu lo chuqu-kushoqo kijé tsü nikeu ghenguno Alhou tsa pichebekümlà kughuchove akeu ye achipi kumoe.

³ Athiküzümi eno achelimiqo, nongu dolo timi tsünì Aghungu no chhitoi kemi eno alokütsümi kishephe lo. Ningu no bemakho hipau panoqo pichebeve

⁴ no ningu ye akighini eno Alhou tsa pichebekümlà lo amlo tsünie.”

⁵ Akükümsü hipau kümtsü no puloluve. Panongu no aküpülü eno Aghungu Kimthe no chhitoi akeu Stephen kishelu; eno Philip Procorus, Nicanor, Timon, Parmenas eno Antioch lono ighi keu Jewmi chineye luve kemi Nicolas noqo ghí kishelu.

⁶ Panongu no timi hipaqo sasü apostolmiqo lau ighi eno apostolmiqo no panoqo shou au be no inikhu tsü.

⁷ Ikehu Alhou tsa ye veküpha wove. Jerusalem lo paikhavi lono küpülümi kikihi alau shi iko wove, eno Jewmi achinemi kutomo no atsakiviu gholuve no küpülümi shiluve.

Stephen Küghaluve

⁸ Tishi akelo, Stephen ye Alhou’w küpükini eno aküka no chhitoi shi püzü akümzapu eno amichipu kümlà kijè timiqo gholo mülà ae.

⁹ Ikemu ghochile keu ipeghive, tiye synagog lo kuqhopheve kemiqo (ishi panongu jeku cheke) Jewmi Cyrene, Alexandria eno Cilicia, Asia bocho lono ighi kemiqo no Stephen sasü kütsala thuve.

¹⁰ Ikemu panongu ye pa no Aghungu no alokütsü pa tsü no piakeu lo puthugho no ghechile mülave.

¹¹ Ikehu panongu no tuqhou no timi khami züluve no tipaqo pelo ishi pipe, “Stephen no Moses pipütha eno Alhou pipütha keu tsa pi aghí keu ningu no chilue.”

¹² Panongu no timiqo, kichimiqo eno ayeza kükütsümiqo xukuthove. Panongu no Stephen küghaluve no Jewmi Hoho zülo sasü ighi.

¹³ Panongu no kichileu thopimi sasü ighi, eno ishi pipe, “Timi hipau ye tamo no akimthe-a hipau pipüsa keu eno ayeza lachile keu tsa khilemu tavemo no pi achenie.

¹⁴ Kughengu pa no Nazareth nó ghami Jisü no a-a hipau kütsave nani eno Moses no akukhuaye ningu tsü no pekishe ighi keu kilive tsü nani ipikeu ningu no chilue.”

¹⁵ Jewmi Hoho ki lo iqa akemi kümtsü agi süküqümo no Stephen gi lo jupuku, eno panongu no kungumi gi toi pa gi ithulue.