Apostolmi 4 - Sümi Tiqhelimi Bible

Peter ngò John Pama Jewmi Hoho Zülo

¹ Achinemiqo eno achineki khemi shou captain ngò Sadduceemiqo ishi Peter ngò John pama no timiqo pütsa ake dolo no pama lau ighi.

² Apostolmi pama no timiqo vilo Jisü akithí lono xülethughive keu eno kithimi xülethughive nikeu ghili pesü asheshu akeu ghenguno panongu ye ighono amloideve.

³ Panongu no Peter ngò John pama küghaluve, eno avelau shive kehu, thoghiu tsalà tomo ke kutólo akughuki lo sǘve.

⁴ Ikemu timi khunoqo no akükütsü sütsa chilu keno pülüluve; ikehu pülüluve kemi kikihi ye qhethonhe pungu kutólo ikughive.

⁵ Tishiwo thoghiu ayekipemi, kichimi, eno ayeza kükütsümiqo Jerusalem lo kuhokumqoe.

⁶ Achinetou Annas tilehi ae, eno Caiaphas, John, Alexander ngò kütami achinetou kibolomiqo ghí tilehi ae.

⁷ Panongu no Peter ngò John panongu zülo sawo qhi no pama vilo ishi iniju: “Kiu küká momu kiu je lono nongu ye hipau shilu ani kea?”

⁸ Ikehu Peter no Aghungu Kimthe no chhitoi shi püzü panoqo vilo pi: “Timi shou ayekipemi eno kichimiqo!

⁹ Tsalá ishí küpüqhiyi keu kümlà apukhu kinitave keu lau pephe-piyeve keu eno pa ye kíshi no shipivive keno iniju nike ningu kusü aghí aye,

¹⁰ hi ithilo, nongu Israelmi kümtsü: Hiye Nazareth nó ghami Jisü Khristo khuu nongu no yedave kemu Alhou no akithí lono xüputhuve keno pa je lono timi hipau shipivive no nongu zülo puthugho ani.

¹¹ Jisü ye “ ‘nongu aki kishimiqo no atuqu milive keu no akhotou tuqu shivae.’

¹² Xakulu ye khuu lau nomu ithulu chemoe, kughengu atsütsǘ qholo ningu timi jeli pelo xakulu ithulu penike aje kütau kiumu tsüpe püamoe.”

¹³ Kughou panongu no Peter ngò John pama mlo kumto ithulu püzü pama ye akiphiki lo wujumo kemi, inapügha timiqo paphi ipikeu ithive keno panongu ye akichiqhive no pama ye Jisü gholo ache kena ipi kimchiluve.

¹⁴ Ikemu pama gholo timi shipivive keu puthugho akeu ithulu no panongu ye kiumu pimlave.

¹⁵ Ike panongu no pama pelo Jewmi Hoho zülo no ipeve penike azah tsüve, eno tisheno panongu dolo no küptsae.

¹⁶ Panongu dolo ishi iniju ae, “Ningu ye timi hi pama pesü kiu shiveni kea? Jerusalem lo xüküami kümtsü no pama no paküta keu amichipu kümlà shive keu ithivae, eno ningu ye tipau lachileve mülae.

¹⁷ Ikemu hipau vehu timiqo dolo alau veküpha pemo nike ningu ye panongu pelo hinguno hilau ye Jisü je pesü kütami pütsa pemove nike pikichivenie.”

¹⁸ Tisheno panongu no itaghi alou pama kusü eno pama vilo khilemu Jisü je lono kütsü momu shika kevilo pi azah tsüve.

¹⁹ Ikemu Peter ngò John pama no khochile, “Alhou nhethe lo khikhiu no achipi kea: Nongu gholu keu no keo, pa gholu keu no kea? Nongu no küghatha julo.

²⁰ Ningu ghengu ye ningu no kiu ithulu eno chilu keno tipau ghili pimo keu shimlae.”

²¹ Kichi kümsà kitheve kethiu panongu no pama phe puwuve. Panongu ye kíshi hi pama ghime kepu keno xakütha shimlave, kughengu kiu shive keno tipau ghenguno timi kümtsü no Alhou sheqhe ake.

²² Kughengu timi khuu akümzapushi shipivive keno pa ye ampe lhobidi shou shive no ake.

Küpülümiqo no Inikhu

²³ Peter ngò John pama ye kuqhopheve kethiu idechilesü panow timiqo lau wuve eno achinetou ngò kichimiqo no pama vilo kiu pi keno kümtsü pesü panongu vilo lhepiyeve.

²⁴ Kughou panongu no hi chilu keno, panongu küqha no ighamuku Alhou vilo akighini shi. Panongu no hitoi inikhu, “Akughushu Mpeu, atsütsǘ, ayeghi, azüghi eno tipaqo lo akeu kümtsü nono mülà ke.

²⁵ Nono Aghungu Kimthe vechewo O qeu, eno ningu papù David kichí lono ishi pi: “ ‘Kushiye shiyeqo ye muqhumüza ani kea? eno kushiye timiqo ye adou lono kuchughu cheni kea?

²⁶ Ayeghi lo kükamiqo no kutò peighi eno ayekipemiqo no kuhokumqo no Ampeu lachile eno pa no nukishe keu mjochileke.’

²⁷ Kuchou no Herod ngò Pontius Pilate pama no Jewkumomiqo ngò Israel timi hipau mishighüna lo akemiqo sasü aqoshi kusho no kuchughu püzü nono nukisheve keu Akimthe qeu Jisü mjochileke.

²⁸ Panongu no O küká eno O pulou lono azünatha ghi kiu shi moayesa keno xatha pe püakeu tipau shike.

²⁹ Ampeu, itehi panongu no ningu kichi akeu jutsülo eno O qemiqo pelo amlo kumto shi O tsa pilu pelo.

³⁰ O qeu akimtheu Jisü je vechewo shikipivi eno akümzapu ngò amichipu kümlà shilu penike ow chhopuwo tsülo.”

³¹ Panongu no akighini shive kethiu, khilehi panongu no kuho akeno tipau-a sükinie. Eno panongu kümtsü Aghungu Kimthe no chhitoive no amlo kumto shi Alhou tsape shie.

Küpülümiqo no Panonguw Küakini Pesü Küsaje

³² Küpülümiqo kümtsü amlo eno akükümsü lakhi shie. Khunomu pa no kiu pighi aghí keno tiye paw kepi pükhamoe, ikemu panongu no kiu aghí keno kümtsü pesü aqǘ shi küsaje cheke.

³³ Apostolmiqo no aküka kumto lono tamo no Ampeu Jisü xülethughive keu shepe shi. Eno Alhou’w küpükini no ighono akumto shi panongu kümtsü gholo akümlà shikeu

³⁴ vechewo panongu dolo kumlhomi khumu shivemoe. Kughengu ado kümtsü lo khunoqo no ayeghi momu aki pighi akeno tipaqo jeve eno jelu keu pisa pesü ighino

³⁵ apostolmiqo pukhuphi lo qhi, eno tiye avehupu shi akemiqo lau kijé tsü ake.

³⁶ Levi laghami Cyprus lono ighi keu Joseph khuu Apostolmi no Barnabas ipi ku cheni keno (hipau kiqi ye shikumtokütsüu nopu),

³⁷ Pa no pighi achekeu alu jeve no pisa pesü apostolmiqo pukhuphi lo qhitsüe.