Apostolmi 3 - Sümi Tiqhelimi Bible

Peter no Apukhu Kinitave Kemi Khukuchumi Shipivi

¹ Ghulo lakhi Peter ngò John pama ye akighini do ghuloki lo achineki lo iqho che, tiye avelau ayì küthü kihe lo ke.

² Tile timi lakhi azá po lono apukhu kinitave keu khapesü achineki khagho Jukivi ipikeu-a lo wuche, pa ye tsalà kipetsü xapu ighino achineki khala lo wuche kemi vilo khuchu penike qhiche.

³ Kughou pa no Peter ngò John pama iloghi niye akeu ithulu keno pama vilo pisa khu.

⁴ Peter no thüghüi pa ju eno titoi John ghí pa ju. Tisheno Peter no pi, “Ningu julo!”

⁵ Ikehu timi hu no kiuala pama lau no ithulu nani kepi lakuju shi no amlotsüqhiyi pama ju ae.

⁶ Tisheno Peter no pi, “Ni ye ghükayi momu ameshoyi kiumu kühae, ikemu I no kiu ani keno ti O tsüní. Nazareth nó ghami Jisü Khristo je lono alà chelo.”

⁷ Peter no timi u ajeu ikhilu no pa sünheputhu, eno paikhavi no timi tipau pukhu eno alaunhe ye mutotoive.

⁸ Pa no ilhe ithuve no alà che thuve. Tisheno pa ye alà che, ilhe, eno Alhou sheqhe ghi pama gholo achineki khala lo wu.

⁹ Kughou timi kümtsü no pa no alà che eno Alhou sheqhe keu ithulu keno,

¹⁰ panongu no pa ye achineki khagho Jukivi ipikeu-a lo iqa no khuchu chekeu kepi kimchiluve, eno pa lau kiu shive keno ti ithulu pe akichiqhi eno akümza keu no chhitoive.

Peter no Sühope Ju Akemiqo Pütsa

¹¹ Timi hu no Peter ngò John pama sünhepe akelo tile timi kümtsü no akichiqhive no Solomon Ki sheqho ipi chekeu-a lo panongu lau posü ighi.

¹² Kughou Peter no hi ithulu keno pa no panongu vilo pi: “Aküsàmi Israelmiqo, kushiye hino nongu kichiqhive pe ani kea? Kushiye nongu ye ni küká momu ni mikucho lono timi hipau pelo alachelu pe ake toi qheghüi ningu ju ani kea?

¹³ Abraham, Isaac eno Jacob Lhou, nipù-asü Lhou no pa qeu Jisü jekipipu shive tsüae. Nongu no pa heqhipithíve penike ikhiphe pe tsüve, eno Pilate no pa phe puwuve nike xathave kemu, nongu no Pilate zülo no pa milive ke.

¹⁴ Nongu no Akimtheu eno Amikuchou milive no timi hekiqhiu nongu lau kuqhophe tsülo pi khuke.

¹⁵ Nongu no aküxü mpeu heqhipithíve, ikemu Alhou no akithí lono pa xüputhuveke. Ningu ye hipau thopimiqo ke.

¹⁶ Jisü je lo pülübe keu lono timi khuu nongu no ithulu eno ithi ani keno pa ye mutotoivae. Hiye Jisü je lono eno pa lau aküpülü akeu vechewo nongu no ithulu ake toi timi hipau ye kupukülai shipivivae.

¹⁷ “Tishiaye, aküsàmi Israelmiqo, I no ithi anike, nongu ghí now sakiphemiqo toi mtha kelau no shike.

¹⁸ Ikemu hipau gholau no Alhou no tungkupumiqo kümtsü vechewo azünatha ghi Messiah ye ghichhe-ghime shi nani ipi pipüa keu shikupuvae.

¹⁹ Tishiaye amlo pebideve lo, eno Alhou lau xaide ighilo, tishianguno nongu xinéqo nuxave tsü penike eno aghüthipüxü keu do tipau ye Ampeu lau no ighi peniye ke,

²⁰ eno tishi keu lono pa no Messiah, khuu nongu ghenguno süküsü shipe püani keno puwu nani—tiye Jisü ke.

²¹ Alhou no khaghi no akimthemi tungkupumiqo vechewo piqhipüa keu toi Alhou no thowkha akithé shikitheve keu do ighi mphi kutólo pa ye kungugha lo ngo aghí moayesae.

²² Kughengu Moses no pivae, ‘Ampeu nongu Lhou no nongu ghenguno tungkupu I toi ke lakhi nonguw timiqo dolo no ipeghi pe nani: nongu ye pa no pikeu kümtsü ini moayesa nani.

²³ Khukhumu pa tsa inimo keu ye panow timiqo lau no kütüta shive pe nani.’

²⁴ “Kuchou no, Samuel lono huthu no tungkupumi ashe-azü tsa pi kemi kümtsü no hipaqo tsalà ghili pipüakhanie.

²⁵ Alhou no tungkupumi vechewo nongu pù-asü lau puloshoqhi shipepüa keu ye nongu ghí küsaje akemi ke. Pa no Abraham vilo ishi pi, ‘O nuli-kughuko vechewo ayeghi lo timi kümtsü mügha nani.’

²⁶ Kughou Alhou no pa qeu xüputhuve keno, pa no atüghishi nongu lau puwu keu ye nongu pelo alhoküsa laghi jeliqo lono xaideghive no kükümgha ithulu peniye ke.”