Apostolmi 28 - Sümi Tiqhelimi Bible

Paul no Malta Zümükü lo ighi

¹ Ningu no shilusamo no azü mükü lo ighi. Ike tipau-a ye Malta ipikeu züdoyeghi shi aghí.

² Züdoyeghi lo xüküami no thosülo küpüqhiyi shichemo keu ningu lau pephe-piye ke. Ike tiye atsala tsüghua eno muko akehu panongu no ami shiqhe no akivishi ningu kümtsü sasü tsüe.

³ Paul no asükügha kiche kumqo peighi no ami lo vesü akelo pighizü lakhi amikülü no gha keu lono ipeghive no pa u lo hechijeluve.

⁴ Züdoyeghi lo xüküamiqo no pa u lo apighi thuthu pesü akeu ithulu kelo, panongu lakhi no lakhi vilo ishi piae, “Timi hipau ye hekiqhimi shiaghini chenie; kughengu pa ye azüghi lono pokajoluve keghi Achipiu xakütha lhouliu ipikeu no pa püxümo niye shi anie.”

⁵ Ikemu Paul no apighi kilheqhi pesü ami lo sǘve eno kiumu pa shipüsa keu shimoe.

⁶ Pa ye ingughoive nani momu zülile no ikiqi thive nani ipi timiqo ye kümsü ae; ikemu ado kushuwa khejuve kethiu ghí kiula paküta keu pa lau kiumu shikeu ithulumo kehu, panongu no akükümsü kilive eno, “Pa ye alhou lakhi ke,” ipie.

⁷ Tipau-a phivilo züdoyeghi lo ampemi shou atou Publius’w aluche lakhi ae. Pa no pa ki lo ningu sasǘ tsü eno atsala küthü kutólo tsükini-jekini shi ningu lojí tsüe.

⁸ Papù ye aghamiki eno ajiküba no sǜ akeu ghenguno azüa lo dapesü ae. Paul no pa ju nike alou iloe eno akighini shive tsü kethiu pa shou au betsü no pa shipivive.

⁹ Kughou hipau shive keno, züdoyeghi lo akemi kütamiqo kümtsü ighino shipivilue.

¹⁰ Panongu no aghola jeli kutomo lono ningu gihu tsüe; eno kughou ningu no zükilu lono wuve niye akeno ningu no avehupu shi akeu achuqupu kutomo ningu tsüe.

Paul no Rome lo Ighi

¹¹ Süsü dolo aqhi küthü züdoyeghi tipau lo ngove kethiu ningu no Alexandria lono ighi keu zükilu, khikhi agizüu atüna lhou Castor ngò Pollux ipikeu pama julho shisü pepüa keno, tipau lo ikuve.

¹² Ningu no Syracuse lo ighi eno atsala küthü tilehi ngove.

¹³ Ningu ye tilehi no cheve püzü Rhegium lo ighive. Tishiwo thoghiu apéu mülhü no fu iqhoghi, eno tishiwo thoghiu ningu no Puteoli toluve.

¹⁴ Tilehi ningu thiküzümi eno achelimiqo khami sasü kusholu eno panongu no apinedo kupuju ghenguno ningu kusü no panongu gholo ngove. Tisheno ningu ye Rome lo ighi.

¹⁵ Ningu no cheni ipikeu athiküzümi eno achelimi tilehi akemiqo no chilu kelo panongu ye ningu sasü kusholu nike alhikishi ki Appius eno Kicheghüzümi ki Küthü ipikeu kutólo ighi. Timi hipaqo ithulu kelo Paul no Alhou shikimthi eno pa likhi pa shikumtolue.

¹⁶ Kughou ningu no Rome lo ighive keno Paul ye ghüshimi no ngokhe no pa likhi ngolu pe nikeu shive.

Paul no Ghüshimiw Sükusho Qholo no Rome lo Kütsü

¹⁷ Atsala küthü thiu Paul no tipa qhalo Jewmi sakiphemiqo ku kumqoe. Kughou panongu no hekütsü kumqoluve keno, Paul no panongu vilo ishi pi: “I thiküzümiqo, I no niw timiqo zülo kiumu shipimi keu küha momu ningu pù-asüqo no pimhe ighi keu kukhuaye lo kiumu shipimi keu kühamu Jerusalem lono I küghaluve no Rommiqo u lo phesüve tsüe.

¹⁸ Panongu no phukideküdaive no I xapheve niye shike, kughengu I pìthíve küzüpu qhemi ayeza hexave keu kipimí kiumu phulumoe.

¹⁹ Jewmiqo no lachileve, ikehu ni ye Caesar lau qhüiniju moayesa pütsave ke. Ni ye I likhi iw timi lau kiuala akipimí ngukube nikeu ghenguno shimoe.

²⁰ Hipau ghenguno I vilo nongu sasü kusho no nongu pütsa lo pike. Kughengu Israelmi’w lajupu akeu ghenguno ni ye ayikichhe hipau lo ani.”

²¹ Panongu no khochile, “Ningu ye O vehu tsa lo Judea lono akiyéqo kiumu ithumla aphie, eno niw timi tilau no ighi kemi khumu O ghili lhoküsa kiumu pisü ighimoe.

²² Ikemu ningu ye O kükümsü ithinishi ani, kughengu ningu no ithi akeu no aqha kümtsü lo timiqo ye achineye mqo hipau lachile keu tsa piakhani ke.”

²³ Panongu no Paul sasü kusho nike atsala khami kughusüve, eno panongu kutomo hekütsü kithe püzü Paul no khile ngoa keno tipau-a lo ighi. Pa no inaqhe no avelau kutólo panongu vilo Alhou kükaphu ghili hepho-piye tsü, eno Moses no tsü keu Yeza ngo Tungkupumiqo no pikeu tsaqo pesü panongu vilo pi no Jisü ghili pesü panongu pütsaqhi niye shijue.

²⁴ Khami ye pa no kiu pi akeno tipau lo pülübeluve ikemu kütami khamiqo ye pülübemoe.

²⁵ Panongu likhi panongu dolo no pulokile mülave püzü Paul no ashekhau tsa hi pive kethiu, panongu lakhi-khi no wove: “Aghungu Kimthe no Isaiah tungkupuu vechewo nongu pù-asüqo vilo pikeu ye kuchou ke:

²⁶ “ ‘Timi hipaqo lau wu no pilo, “Nongu ye chilu anani ikemu khilemu vethamla nani; nongu ye ithulu anani ikemu khilemu vethalu keu shimo nani.”

²⁷ Kughengu timi hipaqo mlo ye mükamüghaivae; panongu ye panongu kìní lono akushukulu chilu cheni, eno panongu ye panongu nhethi miyiluvae. Tishimo aye panongu nhethi no ithuluni che, panongu kìní no chiluni che, panongu mlo lono vethalu no xaideni che, eno I no panongu shipivi tsüní cheke.’

²⁸ “Tighenguno I no nongu pelo ithi penishi akeu ye Alhou’w xakulu ye Jewkumomiqo lau puwuvae eno panongu no chilu nanie!”

²⁹ Paul no hi pive kethiu Jewmiqo ye panongu dolo aloqhi kütsalasü wuve.

³⁰ Ampe kini kupuju Paul ye pa likhi pa no ame sǘ akeu ki tilehi ngo ache, eno pa sasü kusho niye ighi kemiqo kümtsü sasü kusholu ache.

³¹ Pa no akumto shi Alhou kükaphu ghili pesü asheshu ache eno kiumu lakükha küha no Ampeu Jisü Khristo ghili pesü kütsü ache!