Apostolmi 27 - Sümi Tiqhelimi Bible

Paul no Zükilu lono Rome lo Wuve

¹ Kughou ningu Italy lo wuve nikeu shi kughuve keno, Paul ngò akughumi kütami khamiqo ye aqhe shou zatsüu Julius ipikeu, khuu Rome Kükaqha kükau ghüshimi mqo lo achekeu pelo sawu pe nikeu shive.

² Ningu ye Adramyttium lono ighi keu zükilu lo ikuve eno tiye Asia bocho lo wu niye shi akehu ningu ye azüghi lono cheve. Aristarchus khuu Thessalonica lono ighi eno Macedoniami keno pa ghí ningu gholo cheke.

³ Tishiwo thoghiu ningu ye Sidon toluve; ikelo Julius no Paul küpüqhiyi kehu, pa no avehupu shi akeqo tsüpe niye pa küsàmiqo lau wulu pe.

⁴ Tile no ningu ye itaghi cheve eno Cyprus züdoyeghi vechesü wuve, kughengu amlhü no shishe ningu fuchile ake.

⁵ Kughou ningu no Cilicia ngò Pamphylia küma ghüngü lono azüghi kathasü wu keno, Lycia lo Myra ipikeu-a toluve.

⁶ Tilehi aqhe shou zatsüu no Alexandriamiw zükilu Italy lo wuche keu phulu kehu ningu pelo tilehi ikuvepe.

⁷ Ningu ye aveküsa shiche no atsala kutomo thiu no akushukulu Cnidus mishighüna kupunú lo ighilu. Kughou amlhü kümka ghenguno tilehi ngo mülave keno ningu ye Salmone ghüngü lo Crete züdoyeghi küdau wuve.

⁸ Ningu ye aveküsa shi azüghi mükü küdau no chesü mishiphu lakhi Lasea ipikeu phivilo zükilu kungo-a lo ighilu.

⁹ Ado kutomo puwove eno zükilu sasü wuni keu ighono kümsapu shive kughengu tiye Aghakishi Tsalà shio thoghiu shi ake. Ikehu Paul no panongu pikichive ghi ishi pi,

¹⁰ “Aküsàmiqo, I no ithulu akeu ye ningu kicheghüzü lo amhekiqipu kijè sholuni cheni, eno ninguw zükilu ngò anhemgha pù chekeu likhi kumo no ningu küxüu ghí pühave kepu shiveni chenie.”

¹¹ Ikemu aqhe shou zatsüu no Paul no pikeu tsa ini tsümo no zükilu küsàu ngò zükilu mpeu pama no mijetsü keu tsa inive.

¹² Zükilu kungo-a tipau ye süsü tusho ghenguno alomoe, ikehu ningu gholo chekemiqo akichiù no ningu ye Phoenix ipikeu-a lo wuve püzü tisheno süsü tusho tilau no puwove moayesa ke ipi xakütha shie. Phoenix hipau ye Crete lo zükilu kungo-a lakhi eno tiye ahuu eno apéu pishipuwo ithukulupu-a ke.

Pasapagha Sholu keu

¹³ Kughou apéu mülhü no asheshi no fu thuve keno panongu no adokivi lu ghi akütshüpu yì süjo pukuluve no Crete kupunú lo azüghi mükü lono wuve.

¹⁴ Kushuwa wu mphi dolo no pasapagha lakhi ahuukipela mülhü ipikeu no paküta keu shi züdoyeghi kuchopu fudaqhi ighi.

¹⁵ Ninguw zükilu ye amlhü no fuchile pesü ngove eno azüu wumlave; ikehu ningu ye amlhü no fu keu gholau no wuche.

¹⁶ Ningu no züdoyeghi kitila Cauda ipikeu kathasü wuche kelo ningu ye akushukulu ashukati akeu sünhekideluve,

¹⁷ ikehu tilehi akemiqo no zükilu pukuluve. Tisheno akighí pesü zükilu gholo alou aqoshi mutotoi tshüdape qhiluve. Kughengu panongu ye Syrtis zümükü lo asàye küdau posü wu no anibakutho lo meve nikeu msà akehu, akütshüpu yì aqhou piqive no amlhü gholau no zükilu fu pesü wuche.

¹⁸ Pasapagha kijè no ningu sükuchoqhi kehu, thoghiu ye panongu no anhemgha xapu chekeqo pesü azü lo vesü thuve.

¹⁹ Atsala aküthüniu panongu no zükilu nhemghaqo hami azü lo vesüve.

²⁰ Kughou khetsünhe momu ayepuqo atsala kutomo ithumlave eno pasapagha no tamo no ighi auve keno, ningu ye xülu nani ipikeu lajupu kiumu kühave ke.

²¹ Ningu ye achuqupu kühave no ado kushuwa chumove kethiu, Paul no ningu zülo puthugho no pi: “Aküsàmiqo, nongu no I tsa inive no Crete züdoyeghi lono wumove ke aye ningu ye hitoi amhekiqi eno shiküpsa sholumoni cheke.

²² Ikemu itehi ye I no nongu qhüiniju ani eno mtolu penike shikumto ani, kughengu nongu lakhimu pühavemo nani; ikemu zükilu likhi kütsave nani.

²³ I no qe chekeu Lhou eno I Mpeu’w kungumi lakhi no ìji inaputhou no I phivilo puthugho

²⁴ püzü ishi pi, ‘Msà kevilo, Paul. No ye Caesar zülo puthugho no O tsa kügha moayesa nani; eno Alhou no paw küpükini vechewo O gholo zükilu lo chekemi kümtsü pesü O tsüvae.’

²⁵ Tighenguno aküsàmiqo, akumto shilulo, kughengu ni ye Alhou lau pülükibe ani eno pa no I vilo pikeu toi tishi nani ke.

²⁶ Tishi namu, ningu ye posü züdoyeghi hami lo ayeghi shou iku ngoluve moayesae.”

Zükilu Kuboleve keu

²⁷ Atsala chighí abidiu kutólo ningu ye amlhü no fu pesü Adriatic züghi lo che, eno kughou zübumta shi akeno, zükilu küsàmiqo ye ayeghi kupunú lo ighilu akeu ghola ithive.

²⁸ Ikehu panongu no akimighipu pesü piqiju kelo azü kuthò ye aunhekipishe aqhe no muku aghí. Ado hami thiu panongu no itaghi mighiju kelo aunhekipishe lhotoku aghí keu phulu.

²⁹ Ningu ye atuqo lo shopukuve nikeu msàve kehu panongu no zükilu athikhau küdau no akütshüpu yì bidí aqhou piqive no atsala küvü ipeghi penike inikhu kheauve.

³⁰ Zükilu lono itshüsü pokajove nike ghenguno zükilu küsàmiqo no akütshüpu yì aqhou piqi ke ghili shi püzü tshüpüa keu lono ashukati kuqho pesü azü lo piqive.

³¹ Ikehu Paul no aqhe shou zatsüu eno ghüshimiqo vilo pi, “Timi hipaqo no zükilu gholo ngomo kelo nongu ye xü müla nani.”

³² Ikehu ghüshimiqo no tshü pesü akeu akighíqo ghithave kelo, ashukati ye azü no qopesü wuve.

³³ Inaqhe vüipeghi nike zülo Paul no panongu kümtsü pelo achuqu chu penike hakite. Pa no pi, “Ishí atsala chighí abidiu kutólo nongu ye amlo kichipüha ighivea eno achuqupu kühave kehu kiumu chumovea ke.

³⁴ Itehi ye I no nongu pelo achuqu hami likhimu chu penike hakite ani. Nongu ye xülu nike ghenguno chu moayesae. Nongu khumu akütsü lono asà lakhimu pühavemo nani.”

³⁵ Pa no hi pive kethiu, asho hami ikhilu eno panongu kümtsü gizü lono pa no Alhou shikimthi tsü. Tisheno pa no asho süpho no chu thuve.

³⁶ Panongu kümtsü shikumtoluve eno panongu kutoshi no achuqupu hami chuve.

³⁷ Zükilu lo ningu kümtsü aqó lo timi 276 cheke.

³⁸ Kughou panongu no chunishi ke thaqhü chuve keno, zükilu kümthüve niye athikishi xapu chekeu pesü azüghi lo pele sǘve.

³⁹ Kughou atsala vü ipeghive keno panongu ye ayeghi kimchi mülave, ikemu azü no vehoilo keu cheku gholo aniba mükü akeu lakhi ithulue, ikehu tokulupu shi aye posü wo tilehi zükilu qhini ke kughue.

⁴⁰ Ikehu akütshüpu yìqo ghitha pe azüghi alou pheqhisüve eno tipa mtsa no zükilu tutsüghü chekeu lo akighí tsüghapüa keqo kuqhove. Tisheno panongu no amlhü no fupuku sasü wu kepu phì süqhepuku no amükü küdau saipeghive.

⁴¹ Ikemu zükilu ye posü wo anibakutho lo meluve püzü ayeghi lo shosü pe ngove. Zükilu agizüu no paikhavi meluve kehu ithamlave eno azü kighide no zükilu athikhau küdau ye shopho piniyive.

⁴² Tishi akelo ghüshimiqo ye akughumiqo pelo azü mihisü pove pemo niye pìthíve nikeu shi püghüve.

⁴³ Ikemu aqhe shou zatsüu ye Paul küxü pükhatsü nishi akehu, panongu no kiu shi niye püghü akeno tipau shipemo nike lakhave. Pa no khunoqo azümihi ithi ani keno zükilu lono atüghiu shi ilhe iqive no ayeghi küdau wuve penike azah tsü.

⁴⁴ Kütamiqo ye zükilu kubove keu asüluqo momu akughupo kütauqo khamgho pesü wuni keu shie. Hipau gholau no kümtsü shilusamo no azü mükü lo ayeghi toluve.