Apostolmi 24 - Sümi Tiqhelimi Bible

Felix Zülo Paul tsa Kügha

¹ Atsala pungu thiu achinetou Ananias no kichimiqo khami ngò atsa küküghau Tertullus ishi sasü Caesarea lo iqi no panongu no Paul lachile ghi nguku keu pe angh zülo ighi.

² Kughou Paul kusü keno, Tertullus no Paul nguku keu Felix zülo peighi no pi, “O qholo no ningu ye ado kushuwa alokughuno shi ighivea, eno ow jukuchho hu no aghakhu hipau lo akikili süghitsüe.

³ Akiqheu Felix, aqha kümtsü eno alaghi jeli kümtsü ningu no hipau ikhilu akeu gholo shishe O shikimthi ani.

⁴ Ikemu hinguno alau O shipünamo nike ghenguno I no qhüiniju akeu ye O pelo kimiye no ikhonhei ningu tsa iniju tsüpe nishi ani.

⁵ “Ningu no phulu keu no timi hipau ye aküpüna shikichemi, ayeghiqha kümtsü lo Jewmiqo dolo heküpüsa xukutho chekemi lakhi ke. Pa ye Nazarene mqo gholo atou sakipheu ke

⁶ eno achineki kutólo shipixive niye shiju ke ghenguno ningu no pa küghaluve ke. Ningu no ni yeza kiqi lono pa shou küghathaveni cheke,

⁷ ikemu zatsüu Lysias no ighino ighono muqhumüzai shi püzü ningu lau no pa sasü wuve ke.

⁸ Eno pa no Paul ngukube akemi vilo O zülo ighilo pike. No ampi no pa vilo inijukideküdai aye ningu no pa nguku keu süghi akeu kümtsü kuchou kepi nono ithive nani.”

⁹ Jewmi kütamiqo ghí ngukube akeu lo küqha ghi hipaqo kümtsü kuchou ke ipi.

¹⁰ Kughou angh no Paul kiche no piju lo pi keno, Paul no khochile: “I no ithi akeu ye no ye ampe kushuwa shiye hipau shou küghaküthau shi ighivea; ikehu I lokivi shi I likhi I süsho keu tsa pìní.

¹¹ Nono mülalei phuluve nani ke, hi atsala chighí kinia shi ani, I no Alhou mülá niye Jerusalem lo iqho ke.

¹² I nguku akemiqo ye I no achineki lo khuala sasü kütsala aghí keu, momu synagog lo momu mishighüna lo khilela timiqo xukutho aghí keu ithumlae.

¹³ Eno panongu no I shou ngukube akeu mütsümishei hi kepi O pìye müla nani.

¹⁴ Tishimu, panongu no akumou ke ipi chekeu Laghi hu I no püla chekemi lakhi shi püzü ningu pù-asüqo Lhou mülá cheni kepi ni ye ikhilu ani. I no pülü akeu ye hi kümtsü Ayeza eno Tungkupumiqo kaku lo yèpüa keu kiqi lono ke,

¹⁵ timi hipaqo no Alhou lau lakuju ake toi ni ghí lakuju acheni, ike tiye amikuchomi eno alhoküsami kinikujo akithí lono xüputhuve nani.

¹⁶ Ikehu ni ye Alhou eno timi zülo I lolo kighithi akeu mütsümishei qhini ke pükapütsa acheni.

¹⁷ “Ampe hami thikhau ni ye Jerusalem lo ighi, tiye niw timiqo no aghò tsü keu pesü kumlhomiqo tsü eno akümlaghoqo mülá niye ighike.

¹⁸ Panongu no I no achineki khala lo hipau shi aghí keu ithulu kelo ni ye chine-chini ye kiqi lono I shikimtheve no ake. Tilehi timi aqokitikhimu I gholo küha momu ni ye khiuala aküpüna lomu chhosümoe.

¹⁹ Ikemu tile Jewmiqo khami Asia bocho lono ighi kemi ake, panongu ampi no hile O zülo aghí kepu shia eno I shou kiula ngukube kepu aghí aye süghi kepu shi ake.

²⁰ Momu hile ngo akemi no I no Jewmi Hoho zülo puthugho kelo panongu ye I no ayeza heküxá kümlà kiu shipe püaghi keu ithulu keno piju pelo,

²¹ thime hipau ghenguno kumo kena pi aye, I no panongu gholo puthugho kelo asheshu chekeu, ‘tiye, kithimi ye xüputhuve nani pikeu ghenguno ni ye ishí nongu zülo atsa kükügha lo ani.’ ”

²² Ikelo Felix, khuu Ampeu Là püla chekemi ghili akivishi ithi akeno pa no atsa kügha akeu tukiqhe puwuve. Eno panoqo vilo ishi pi, “Kughou zatsüu Lysias no ighini keno tile no I no O tsa xatha tsüní ipive.”

²³ Pa no aqhe shou zatsüu vilo Paul khekuto lo pi azah tsüve, tishimu Paul lakhamo no kiu shikepu keno shilu pe eno pa küsàmiqo pelo pa vehupu jeliqo jukuto penike puloza tsüve.

²⁴ Atsala hami thiu Felix no pa nipu Drusilla sasü ighi, li ye Jewmi ke. Pa no Paul ku puwu eno Paul no Khristo Jisü pülü akeu ghili kütsü kelo inia.

²⁵ Paul no achipiumikucho, alikhi aghasükulu eno küghakütha ighi niye akeu ghili pi akelo Felix ye msàve eno pi, “Itehi ghengu ye tino taveni! No ye wuluve nani. I no kughou no ado shiluni keno I no O kupuwuni.”

²⁶ Tishi akelo Felix ye Paul no kulugho pesü pa tsü nani küghashi lakuju shi ake, tighenguno pa ye müamzü Paul ku puwu no pütsa acheke.

²⁷ Kughou ampe kini wove keno, Porcius Festus no Felix theli lo Angh shiluve, ikemu Felix ye Jewmiqo lopu shitsü niye Paul pesü akughu shipe qhive ke.