Apostolmi 20 - Sümi Tiqhelimi Bible

Macedonia ngò Greece lo

¹ Muqhumüza akeu tave kethiu, Paul no küpülümiqo ku kumqo no panoqo shikumtove tsü püzü akivishi alo ipive no Macedonia lo wu niye cheve.

² Pa no tipa qhalo kicheghüzü shi wu püzü timiqo lau shikumto keu tsa kutomo pitsü, eno ashekha lo Greece lo ighive no

³ pa ye tilehi aqhi küthü ngove. Pa no zükilu lono Syria lo wu niye kutò akelo Jewmi khami no pa pìthíve niye kuchughu pe aghí keu ghenguno pa ye Macedonia küdau no idewove nike kughuluve.

⁴ Berea lono ighi keu Pyrrhus nu Sopater, Thessalonica lono ighi keu Aristarchus ngò Secundus pama, Derbe lono ighi keu Gaius eno Asia bocho lo ache kemi Timothy, Tychicus ngò Trophimus ishi no Paul gholo wue.

⁵ Timi hipaqo no nizüu no wu no Troas lo nikhe aghí pe ke.

⁶ Ikemu Kholaqhi sümo keu Sho Tiqhitini tsalà tove kethiu ningu ye zükilu lono Philippi lo wuve eno atsala pungu thiu no Troas lo panoqo gholo sülu, eno tilehi ningu atsala tsünì ngove.

Troas lo Eutychus Akithí lono Xüputhuve

⁷ Apine tsalà atüghiu lo ningu no asho süpho chu niye kuhokumqoe. Paul no timiqo sasü küptsa ae, eno pa ye tishiwo thoghiu wuve nikeu shi akehu zübumta kutólo küptsa ae.

⁸ Ningu no kunguu küptsa akeu achebo lo akulu kutomo ae.

⁹ Eutychus ipikeu apumi lakhi ye alashe mütsü lo iqa ake. Paul no ado kushuwa atsapia kehu, Eutychus ye cheyi zühuve. Pa ye züchei akehu aki jolha aküthüu lono ayeghi lo ilu iqive eno pa khapeqhelu kelo thive aghíe.

¹⁰ Paul no aqhou iqi püzü pa no apumi hu valuve, eno pa u pesü pa vape no panoqo vilo pi, “Mubumghu kevilo, pa ye xü aphie!”

¹¹ Tisheno pa no itaghi aki jolha kunguu iku püzü kuposhukulu ghulhu küsaje chuve. Tsüthomo ke kutólo pa no atsapia püzü tisheno pa ye cheve.

¹² Timiqo no apumi hu thayi aki lo sasü wove eno shishe panongu mlokiqi shive.

Paul no Ephesiami Kichimiqo Kinive

¹³ Ningu ye zükilu lo ikuve eno azüu no Assos tove nike ghenguno wuve, tilau no Paul xapuluve niye wuche ke. Pa no hitoi pekithi pepüa, kughengu pa ye apukhu lono alà chesü tilehi ighive niye shi ake.

¹⁴ Kughou pa no ningu sasü Assos lo kusholu keno, ningu no pa xapuluve no Mitylene lo wuve.

¹⁵ Tishiwo thoghiu ningu ye Assos lono wuve eno Chios ghüngü tolu. Eno tipa tsalà thiu ningu ye Samos kathasü wuve eno itaghi tishiwo thoghiu no Miletus tolu.

¹⁶ Paul ye Ephesus vechesü wuve no mighisü Asia yeghi bocho lo ado peve ngomove no tokulupu shi aye Pentecost tsalà tomphi lono Jerusalem toluve niye shi ake.

¹⁷ Paul no Miletus lono Ephesus akukuhou lo kichimiqo pelo ighino pa sasü kusholu penike aghinimi puwu.

¹⁸ Kughou panongu no ighi keno, Paul no panongu vilo pi, “I no Asia bocho lo ighike tsalà atüghiu lono itehi kutólo kíshi nongu gholo xü acheni keno nongu ampi no ithi ani.

¹⁹ I lachile chekemi Jewmi no amqü jeli shi no paküta keu shi I peju ake dolo ghí ni ye anhezü-piji mütshaivü Ampeu qe acheke.

²⁰ Nongu no ithi anike ni ye nongu kuphukulupu ghenguno kütsü nikeu lo kiumu süchilevemo ke ikemu mìshí zülo eno aki-aki lo ilo no nongu shika ke.

²¹ Ni ye Jewmi ngò Greekmiqo kinikujo vilo ghí panongu ye Alhou lau xaideighi no amlo pebideve püzü ningu Mpeu Jisü shou pülübe moayesa kepi shukiphe shive tsüae.

²² “Eno itehi ye I lau kiu shive niye kutò ani keno mtha kemu Aghungu Kimthe no tsükhoi I vilo pikeu kiqi lono tilau Jerusalem lo wucheni.

²³ I no ithi akeu ye mishighüna kümtsü lo akughu shini keu eno shiluküsa chekeu pesü Aghungu Kimthe no I kütüghü anie.

²⁴ Tishimu I ghengu ye I küxü pesü ameküa shi kümsü chemoe, I kimiji ye Alhou’w küpükini tsakiviu pesü ashepe shini keu kümlapù saje khikhi Ampeu Jisü no I tsü keno tipau mülà kupuve no ashetove niye po cheni.

²⁵ “I no ithi anie, nongu khunoqo gholo I no Alhou kükaphu ghili pesü asheshu ache keno, hinguno hilau ye khilemu I ju ithulu kithe müla nani.

²⁶ Tighenguno I no ishí tsalà lono nongu vilo shukiphe shi ani, nongu gholo khukhumu pühave aye I kipimí kiumu kühae.

²⁷ Kughengu ni ye Alhou pulou kümtsü pesü nongu vilo pikülha nikeu lo süchile pe püamoe.

²⁸ Nongu likhi nongu jukuto lo eno Aghungu Kimthe no nongu pelo jukükütsüu shipe nike qhipüa kemiqo kümtsü jukuto lo. Alhou’w akukuhou khemiqo shilo, tiye pa likhi pa jì no qhüpe püani ke.

²⁹ I no ithi akeu ye I no wuve kethiu tüngtügha yiküsaqo no nongu dolo iloghive nani eno küpülümiqo ghüzakhave nani.

³⁰ Nongu likhi nongu gholo no kuchou tuchighiveni kemi ghí ipeghive no küpülümiqo müsü sasü panoqo pape wuve pe nikeu shi nani.

³¹ Ikehu nolikhi nongu jukuto alo! I no anhezü-piji ampe küthü kutólo tamo no putho-pucho nongu lakhi-khi pikichi achekeu kümsülu alo.

³² “Itehi I no nongu pesü Alhou eno paw küpükini tsa lau kulhuqhive tsü ani, tino nongu xaqhelu nani eno shikimtheve kemiqo kümtsü gholo nongu mheghi ighílu pe nani.

³³ Ni ye khuuw ghükayi, ameshoyi momu tiphiminimu jumine pe püamoe.

³⁴ Nongu ampi no ithi anie, I u no mülà itha no I likhi I vehupu eno I gholo chekemiqo vehupu kümtsü shitsü acheke.

³⁵ I no shikeu kümtsü lo shishe aghime shi mülà püzü miqemilei kemi kuphu moayesae ipi nongu pìye ke, eno Ampeu Jisü ampi no hitoi pipüa keu tsa kümsülu akepue, ‘Tsü keu no lu keu nguno akümghapue.’ ”

³⁶ Kughou Paul no atsa pitave keno, pa no panongu kümtsü gholo qhoqhünhe pe akighini shie.

³⁷ Panongu no pa valuve eno pa müma no kümtsü qau khave.

³⁸ Paul no pikeu tsa gholo kütau kümtsü nguno panongu ye pa sasü khilemu kushokilelu mae pikeu hu no panongu mloghime shive. Tisheno, panongu no zükilu kutólo Paul sawo pheve.