Apostolmi 2 - Sümi Tiqhelimi Bible

Pentecost lo Aghungu Kimthe Ighi

¹ Kughou Pentecost tsalà tove keno panongu kümtsü amqo shi a-a lakhi lo ngoa.

² Zülile no amlhü kijè no fu keu sütsa toi kunguu no ighino panongu no iqa akeu ki kümtsü shepichhive.

³ Panongu no ithulu keu no ami mili kütüta shikeu toi keu no tile akemi kümtsü shou ngoluve.

⁴ Panongu kümtsü Aghungu Kimthe no chhitoive eno Aghungu no panongu pelo pilu pe kehu amili kütau no atsa pithuve.

⁵ Tishi akelo Jewmi Alhou sümsa chekemi shiye jeli kümtsü ighino Jerusalem lo ngo ae.

⁶ Kughou panongu no amlhü sütsa hu chilu keno, ighino amqo shi hekütsü pesü ngove no akümzaqhiyive, kughengu panongu kümtsü pano tsau no piakeu pütüta no chilukha ke.

⁷ Panongu no akichiqhiyi iniju: “Timi hipaqo ye Galileemi ke kumo keshea?

⁸ Tishiaye kíshi no ningu ye panongu no nizá tsau no piakeu chilu ani kea?

⁹ Parthiami, Mediami, eno Elamitemi, Mesopotamia lo kungomi, Judeami eno Cappadociami, Pontus eno Asia,

¹⁰ Phrygia eno Pamphylia, Egypt eno Cyrene phivilo Libya lono ighi kemi; Rome lono xukujumi

¹¹ (Jewmi eno Jewmi chineye luve kemi) Cretemi eno Arabmi panongu no Alhou no akümzapu mülà keu tsa piakeu nizá tsa lono ningu no chilue!”

¹² Akümzaqhiyi eno avehu küghüzü shi panongu lakhi no lakhi vilo, “Hiye kiu kiqi kea?” ipi iniju ae.

¹³ Ikemu khami ye panongu junu ghi pi, “Hipaqo ye aji chilo shove no anie.”

Peter no Aqokitikhi lau Asheshu

¹⁴ Tisheno Peter no Apostolmi chighiqhaqhi gholo puthugho no asütsa müghachhoi keu lono aqokitikhi lau asheshu, “Aküsàmi Jewmi eno nongu khunoqo Jerusalem lo xü acheni keno, I no hipau vehu nongu vilo hepho-piye nike I no pikeu tsaqüi iniju lo.

¹⁵ Nongu no kümsü ake toi timi hipaqo ye shomzüpu amoe. Hiye inaqhe ayì tokú he aphie!

¹⁶ Moe, hiye tungkupu Joel no piqhipüa keu ke:

¹⁷ “ ‘Alhou no pi, ashekha tsalaqo lo I no I Ghungu pesü timi kümtsü shou lepuku nani. Nongu nu eno angáqo no tungkupu tsa pi nani, nonguw lhothemiqo no kungunhetsü ithulu nani, nonguw muchomiqo no asamo jeli pumó nani.

¹⁸ Tipaqo tsalà lo I no I qemi kipitimi eno totimiqo kinikujo, shou I no I Ghungu lepuku tsü nani, eno panongu no tungkupu tsa pi nani.

¹⁹ I no kunguu atsütsǘ lo akichiqhipu shi pìye nani eno aqhou ayeghi lo amichipu shi pìye nani, ajì ngò ami eno amichhi phoboi nani.

²⁰ Ampeu tsalà shishe kijè eno ajuküvü ighi nike zülo khetsünhe no zümoive nani eno aqhi no ajì toi huchuhuyive nani.

²¹ Eno Ampeu jeku kemi kümtsü xaluve nani.’

²² “Aküsàmi Israelmiqo, hi inilo: Nazareth nó ghami Jisü ye Alhou no akümzapu, akichiqhipu eno amichipuqo vechewo nongu lau kishe pesü tsüke, tiye nongu no ithi ake toi Alhou no pa vechewo nongu gholo mülà keu ke.

²³ Alhou no azünatha ghi ithithai püghüpe qhive keu vechewo Jisü pesü nongu u lo phesüve ke. Eno nongu no küsaküghamiqo kukuphu lu püzü kros lo Jisü yeda pìthíve ke.

²⁴ Ikemu Alhou no akithí lono pa xüputhuve no akithí kushuküqha lono pa kuqhopheve ke, kughengu akithí ye pa küghape qhipüaveni keu kushokütsüpu shive ke.

²⁵ David no Ampeu ghili ishi pi: “ ‘Ampeu no alhokuthu I züu akeu I no ithulue. Kughengu pa ye I u ajeu ani, I süküghütha müla nani.

²⁶ Hi ghenguno I mlou no alokivishi eno I tsapi lo alovishelu ke; I phimpi ghí lajupu akeu lo aloino nani.

²⁷ kughengu no ye kithigha lo I kughuchope qhivemo nani, No ye ow akimtheu pelo tsümave pemo nani.

²⁸ Nono I pelo aküxüpu laqo ithi pe ke, O gizü lono nono alokivi pe I shepichhi tsüke.’

²⁹ “Aküsàmi Israelmiqo, I no mutotoi nongu vilo pilu akeu ye nisü David ye thive eno qhove, eno pa thigho ye ishi kutólo hile anie.

³⁰ Ikemu pa ye tungkupumi lakhi eno Alhou no pa lau tushoqhi pe püakeu toi pa tikughukomi lakhi pelo pa küká lakhü lo iqa pe nani ipi ithi ake.

³¹ Kiu ighi niye kutò ani keno ithulu no pa no Messiah xülekuthu ghili pi, tiye pa ye kithigha lo kughuchope qhivemo, momu pa phimpi ye tsümavemo keu ghili ke.

³² Alhou no Jisü hipau pe xüputhuvae eno ningu kümtsü tipauw thopimiqo ke.

³³ Pa süqhe pesü Alhou u ajeu qhi eno Apù lau no tushoqhi püakeu toi Aghungu Kimthe ithulu püzü nongu no itehi ithulu eno chilu akeu toi lepuku tsüke.

³⁴ Kughengu David ye kungugha lo ikumoe, eno tishimu pa no ishi pipüani, “ ‘Ampeu no I mpeu vilo pi: “I no O ghümi pesü

³⁵ O pukhu kibepu shitsümo ke kutólo I u ajeu küdau iqalo.” ’

³⁶ “Tighenguno Israelmi kümtsü no hipau mütsüqheilu lo: Jisü khuu nongu no yedave keno, Alhou no pa pesü Ampeu eno Messiah kinikujo shive tsüae.”

³⁷ Kughou timiqo no hi chilu keno, panongu mlo itapiniyive püzü Peter ngò apostolmi kütamiqo vilo pi, “Athiküzümiqo, ningu ye kíshive kepu kea?”

³⁸ Peter no khochile, “Nongu kümtsü nongu xinéqo qhivetsü penike ghenguno amlo pebideve no Jisü Khristo je lono baptiz shiluve lo. Eno nongu no Aghungu Kimthe ghò ithulu nani.

³⁹ Ashoqhi hu ye O ghenguno eno O tianuliqo ngò putosü lo akemiqo ghenguno ke—tiye Ampeu ningu Lhou no khunoqo kuni keno tipaqo ghenguno ke.”

⁴⁰ Pa no atsa kütau kutomo pesü panoqo pikichive: eno panoqo qhüiniju ghi pi, “Amikucho kumo tiqheli hipau lau no nongu likhi nongu xalulo.”

⁴¹ Pa kükütsü sütsa ikhilu kemiqo ye baptiz shiluve, eno tipau tsalà lo timi 3,000 qhalo panongu gholo kihiküsü shiluve.

Küpülümiqo Kuposhukulu

⁴² Küpülümiqo no pulopiniyi shi apostolmi no kütsü keu pape, kuposhu, asho süpho kijé chu, eno akighini shie.

⁴³ Apostolmiqo no akümzapu eno amichipuqo kümlà kutomo shikeu kümtsü no ithulu püzü akümzaqhiyi keu no chhitoive.

⁴⁴ Küpülümi kümtsü kumqo ngo eno thowkha kümtsü aqǘ shiae.

⁴⁵ Panongu no aki-alu eno kiniküa jeliqo je pesü avehupu shi akemiqo lau küsaje ke.

^46-47 Tsalà kipetsü panongu aqoshi achineki khala lo tamo no kusholu ae. Panongu no panongu ki lo kümtsa asho mülà no amlo kuchou lono Alhou sheqhe eno timi kümtsü lopu shilu keu lo alokivishi asho kijé chue. Eno tsalà kipetsü khunoqo xakulu ithulu keno Ampeu no tipaqo pesü panongu mqo lo sülupe ke.