Apostolmi 19 - Sümi Tiqhelimi Bible

Paul no Ephesus lo Wu keu

¹ Kughou Apollos no Korinth lo akeno Paul ye alaghi akushuu küdau lono Ephesus lo ighi. Tile pa no küpülümiqo khami kusholu

² eno pa no panongu vilo ishi iniju, “Kughou nongu no pülüluve keno nongu ye Aghungu Kimthe ithulu kema?” Panongu no khochile pi, “Moe, ningu ye Aghungu Kimthe ani ipikeu ghí chimla aphie.”

³ Ikehu Paul no iniju, “Tishiaye nongu ye kiu baptiz ikhilu kea?” “John’w baptiz,” ipi panongu no khochile.

⁴ Paul no pi, “John’w baptiz ye amlo pebideve kemiw baptiz ke. John no timiqo vilo timi lakhi pa thiu ighi nani ke pa shou pülübe lo ipi ke, tiye Jisü ke.”

⁵ Hipau tsa chilu kelo panongu ye Ampeu Jisü je lono baptiz shiluve.

⁶ Eno kughou Paul no pa u pesü panongu shou be keno Aghungu Kimthe no panongu shou ighi, eno panongu no amili kithe lono atsa pi eno tungkupu tsa pie.

⁷ Tilehi panongu kümtsü aqó lo timi chighikini toi keu ae.

⁸ Paul no synagog lo ilo no aqhi küthü kutólo amlo kumto shi timiqo pütsa, kütsalaju eno tamo no Alhou kükaphu ghili pesü pikülha ae.

⁹ Ikemu panoqo gholo khami ye amlo kuthò shiauve no pülütsümo eno aqha zülo no Ampeu là püla chekemi ghili lhoküsa piae. Ikehu Paul ye panoqo qhive no wuve. Pa no pa gholo küpülümiqo sasü wu no tsalà kipetsü akükütsü ki Tyrannus lo kumqo no küptsa ache.

¹⁰ Ampe kini kutólo Paul no hitoi shi ache, tishi keu vechewo Asia bocho lo xü akemi Jewmiqo ngò Greekmiqo kümtsü pelo Ampeu tsa chilu peniye ke.

¹¹ Alhou no Paul vechewo müzamghalei kepu amichipu kümlàqo shie,

¹² tiye pa bulu keu tiphimini eno aküghüsüpu phì kutólo pesü wu no küsükinimi eno tüghaküsa ghawu akemi lau peighi aye aküsǜ jeliqo viluve eno tüghaküsaqo no panongu qhive no pove ke.

¹³ Jewmiqo khami iqho-iqi tüghaküsa ghawu haphe chekeqo no Ampeu Jisü je pesü tüghaküsa ghungu akeqo shou peitha ju niye shi. Panongu no ishi piche, “Paul no pikülha chekeu Jisü je lono O pelo ipeghive penike I no azah O tsü ani.”

¹⁴ Jewmi gholo achinetou Sceva ipikeu nuli tsünì no hitoi shiche ke.

¹⁵ Ghulo lakhi tüghaküsa ghawu hu no panoqo vilo ishi khochile, “Ni ye Jisü ithi ani eno Paul ghí ithi ani, ikemu nongu ye khunoqo kea?”

¹⁶ Tisheno timi khuu phi lo tüghaküsa ghawu akeno tipau hu no panoqo shou ilhe ikughi no kümtsü qhasüluve. Pa no aloqhi panoqo heqhive kehu panongu ye aphiminimu pepumo püzü aghüzaku lo ajì ipeghi ghi aki lono poipeve.

¹⁷ Kughou Ephesus lo küami Jewmi ngò Greekmiqo no hipau tsa chilu keno panongu kümtsü akümsa no chhive, eno Ampeu Jisü je pesü akiqheu lo qhi no agigihu tsüe.

¹⁸ Khunoqo anileshi pülüluve keno kutomo no ighi püzü panongu no kiu mülà che keno aqha zülo no piphe.

¹⁹ Tumu chekemi mqo khami no panonguw liküküzü kakuqo aqoshi pesü ighino aqha zülo no pitileve. Panongu no liküküzü kakuqo me kihikülai ju kelo ghükayi 50,000 me kutólo shi aghí.

²⁰ Hitoi shi no Ampeu tsa alau akumto shi thuwu eno veküpha wove.

²¹ Hipaqo kümtsü shive kethiu Paul ye Macedonia ngò Achaia vechesü Jerusalem lo kicheghüzü shini keu vehu kughuluve. Pa no ishi pia, “I no tilau wuve kethiu ni ye Rome ghí xuju moayesa anie.”

²² Pa no pa kuphu chekemi Timothy ngò Erastus pama Macedonia lo puwuve püzü pa ye Asia bocho lo ado khami ngove.

Ephesus lo Mutomushu keu

²³ Tipau dolo tilehi Ampeu là püla chekeu vehu lo aküpüna kijè ipeghive.

²⁴ Ghükayi kiyiqimi lakhi Demetrius ipikeu no ghükayi pesü Artemis chineki kimihi lhophe che eno pa no hipau lhidi shikeu lono tilehi külalú kümlamìqo ghí kutomo alá shilu che.

²⁵ Ikehu Demetrius no akümlàmi eno tipau lhidi shi chekemiqo kümtsü ku kumqo püzü ishi pi, “I küsàmiqo, nongu no ithi anike, ningu ye lhidi hipau lono kutomo alá shilu achenie.

²⁶ Nongu ampi no ithulu eno chiluvea ke, hilau Ephesus lo likhi kumo no kuchou lo ye Asia bocho kuchopu lo Paul ipikeu hipau no timi kutomo müsüluvea eno sà küghüzüvae. Pa no pikeu no timi u no mülà keu lhou ye khilemu alhou kumoe ipie.

²⁷ Ike akümsapu akeu ye, ninguw lhidi hipau lo aju-aje küsa sholu nikeu likhi kumo no akiqheu lhouliu Artemis chineki hu ghí aju-aje küsa shiveni cheni, eno lhouliu khuu Asia bocho lo eno ayeghiqha kümtsü no mülá cheni keno li küká jekipi ghí shipühave tsüní chenie.”

²⁸ Kughou panongu no hi chilu keno, panongu ye muqhumüzaive no ishi igha thuve: “Ephesiami’w Artemis no Akughushuu ke!”

²⁹ Paikhavi no aphughi kuchopu lo muqhumüza igha thuve. Timiqo no Paul gholo Macedonia lono kicheghüzü shi ighi keu Gaius ngò Aristarchus pama tsüqüluve eno panongu kümtsü aqoshi züphu-zügha ghiliqa lo kohakive ilove.

³⁰ Paul ye pa ampi no timiqo zülo wu niye shi, ikemu akhopemiqo no pa pelo wupemoe.

³¹ Tipau bocho lo Paul küsàmiqo kijemi khami ghí pa pelo züphu-zügha ghiliqa lo wutsü pemo nike qhüiniju keu tsa pi puwu.

³² Timi kumqo pe akemiqo ye kübangüve: khami no hiu ke ipi aye, kütami no huu ke ipi igha akhae. Timiqo akichiù no panongu ye kushiye tilehi kumqo pe ani keno ti ghí mtha no ae.

³³ Timi dolo no Jewmiqo khami no Alexander tuhape agizüu puwu, eno pa ye kíshi pi moayesa keno panongu no ighamuku pa vilo pi. Timiqo zülo pa likhi pa shokha keu tsa pinike ghenguno pa u kihí püzü iqünheive lo ipi.

³⁴ Ikemu kughou panongu no pa ye Jewmi kepi ithive keno, panongu kümtsa qhai shi püzü ayì kihedo kinia kutólo igha: “Ephesiami’w Artemis ye Akughushuu ke!”

³⁵ Mishighüna lo kijemi lakhi no timiqo hasüve püzü ishi pi: “Aküsàmi Ephesiamiqo, ayeghiqha kümtsü no Ephesus phughi ye akughushuu Artemis chineki kheu, eno li julho ye atsütsǘ lono iqighi keu ke ipi ithi anike kumo keshea?

³⁶ Hipaqo ye kuchou eno lachile müla keu ke, tighenguno nongu ye iqünhei kepu eno kiumu chho-chhoshi kepu kumoe.

³⁷ Timi hipaqo ye achineki lo pükapüamoe momu ningu lhouliu thaigha keu tsa pipe püamoe, ikeghi nongu no panongu hilehi saighike.

³⁸ Tsalá tishimu, Demetrius ngò pa kümlamìqo no khuala shou akipimí pi kepu aghí aye küghaki ye alhokuthu khaqhipe acheni eno tile anghqo akhanie. Panongu no akipimíqo pesü ngukubelu nani.

³⁹ Tsalá nongu no tinguno alau kiuala peighi kepu aghí aye, ayeza xaküthami no kumqo ake lono pekithiluve moayesae.

⁴⁰ Ishí kiu shivea keno hipau vechewo ningu ye muqhumüza ani ipikeu lono ningu akipimí tsüve kepu kümsapu lo auvea. Tipau kiqi lo, ningu ye mubumghu akepu kiumu akiqi kühae, eno ningu ye kiu ghenguno keno kiumu piluni chemoe.”

⁴¹ Hi pive kethiu, pa no timi kumqo akeqo puwove.