Apostolmi 18 - Sümi Tiqhelimi Bible

Corinth lo

¹ Hipathiu Paul ye Athens qhive no Korinth lo wuve.

² Tilehi Paul no Pontus nó ghami Aquila ipikeu Jewmi lakhi sasü kusholu. Aquila ghí tipau dolo no pa nipu Priscilla sasü Italy lono ighi ae, kughengu Qhasükükau Claudius no Jewmi kümtsü vilo Rome phughi qhive no chevelo pi azah tsüke. Paul no pama pütsa niye wu,

³ eno pama gholo akümlà shi ghi ngove, kughengu pama hutoi pa ghí aphiki tsüghǘ no qechu chekemi ke.

⁴ Sabbath tsalà kümtsü synagog lo wu no Jewmi eno Greekmi pütsaqhi niye küptsa-kiqiju ache.

⁵ Kughou Silas ngò Timothy pama no Macedonia lono ighive keno, Paul ye ado kümtsü ikhiphe no kütsü eno Jewmiqo vilo Jisü ye Messiah kepi ashepe shiae.

⁶ Ikemu kughou Jewmi no pa lachile eno pipütha keno, Paul no alomishi pa phimini kuthó pìye püzü panoqo vilo ishi pi, “Nongu kithí ye nolikhi nongu makho ke! Tiye I makho kumoe! Hinguno hilau ni ye Jewkumomiqo lau wuni ae.”

⁷ Ikehu pa no synagog lono cheve, tisheno tipau phivilo Alhou mülá chekemi Titius Justus ipikeu ki lo ilove.

⁸ Tipathiu, synagog lo sakipheu Crispus ipikeu ye pa kibolomi kümtsü sasü Ampeu pülüluve: eno Paul no pikeu tsa chilu püzü pülülu kemi Korinthiami kutomo no baptiz shilue.

⁹ Kijili lakhi Ampeu no kungunhetsü lono ishi Paul pütsae: “Msà kevilo; tamo no pialo, inaqhoi ngove kevilo.

¹⁰ Kughengu I no O gholo ani, eno khunomu O ghüzamo nani, kughengu mishighüna hipau lo iw timi kutomo anike.”

¹¹ Ike Paul ye ampe lakhi no tüxa tile ngove, eno Alhou tsa pesü timiqo shika ghi ae.

¹² Kughou Gallio no Achaia qhalo Rommiw Angh shi akeno, Corinth lo Jewmiqo küqha no Paul kügha pesü küghaki lo sasü ighi.

¹³ Panongu no Paul ngukube ghi ishi pi, “Timi hipau ye ayeza hebide ghi timiqo pelo Alhou mülá penike pütsaqhi anie.”

¹⁴ Paul no atsa pi niye kemtsa, Gallio no panonguqo vilo ishi pi, “Tsalá nongu Jewmiqo no kiuala akumou kümlà momu ayeza heküxá zapuzaghi tsa vehu muchho aghí kena pi aye, I no tsaqütsalei nongu tsa iniju tsüní cheke.

¹⁵ Ikemu hiye atsa, aje eno nongu likhi nongu yeza ghili iniju kilé akeu vehu ke nongu likhi nongu no xathaluve lo. Ni ye hikithipu vehu küghatha tsümlae!”

¹⁶ Tisheno pa no küghaki lono panongu hapheve.

¹⁷ Ikelo panongu no synagog lo Jewmi sakipheu Sosthenes tsüqüluve eno küghaki zülo no pa heqhi; ikemu Gallio no tipau lo kitilamu alomsü tsümoe.

Priscilla, Aquila eno Apollos

¹⁸ Paul ye ado hami ghenguno Corinth lo ache. Tisheno pa ye athiküzümi ngò achelimiqo qhive no Priscilla ngò Aquila pama sasü Syria lo wu niye zükilu lono cheve. Ashuka lo iku mphi lono, Cenchreae ipikeu-a lono pa no ashoqhi shipüa keu kiqi lono pa kütsüsa miyeve.

¹⁹ Panongu no Ephesus lo ighi eno Paul ye Priscilla ngò Aquila pama tile qhive no wuve. Paul ampi ye synagog lo ilo no Jewmiqo sasü küptsa-kiqiju ae.

²⁰ Panongu no pa vilo panongu gholo ado hami ngo aghí tsülo pi kemu pa no milive.

²¹ Ikemu wuve niye akelo Paul no ashoqhi shi ghi panoqo vilo pi, “Alhou pulou shi aghí aye, ni ye nongu lau ideighi nani.” Tisheno zükilu lono Ephesus lo wuve.

²² Kughou pa no Caesarea tolu keno, Jerusalem lo chesü iqho püzü akukuhomiqo sasü kusholu eno tithiu Antioch lo iqive.

²³ Paul ye Antioch lo ado hami ngove kethiu Galatia ngò Phrygia qhalo a-a lakhi lono lakhi lo kicheghüzü shi wu no küpülümiqo kümtsü shikumto tsüe.

²⁴ Tishi akelo Alexandria lo xüküami Jewmi lakhi Apollos ipikeu ghí Ephesus lo ighi. Timi hipau ye akighithimi eno Kuchoyesü tsaqütsalei ithi akemi ke.

²⁵ Pa ye Alhou sükümsa laghi lo akivishi shika puthu püa kemi, eno pa ye John baptiz likhi ithi akemi kemu ighono pulopiniyi shi Jisü ghili pikülha eno piküqümo no kütsü pìye chekemi ke.

²⁶ Pa no amlo kumto shi synagog lo atsa pithuve. Priscilla ngò Aquila pama no Apollos tsa chilu kelo pama no pama ki lo pa kusü eno Alhou laghi pesü Apollos vilo aghileshi hepho-piye.

²⁷ Kughou Apollos no Achaia lo wu nishi akeno, athiküzümi eno achelimiqo no pa shikumto eno akhopemiqo vilo pa sasǘ tsülo ipi akiyé yètsü. Kughou pa no Achaia tolu keno, Alhou’w küpükini lono küpülümi shiluve keqo lau pa ye akukuphu kijè shilu.

²⁸ Kughengu pa no aqha zülo kighe kelo akumto shi Jewmi pa lachile akeqo gheqhilu, eno Jisü ye Messiah kepi Kuchoyesü lono kimchi tsüke.