Apostolmi 16 - Sümi Tiqhelimi Bible

Timothy ye Paul ngò Silas Gholo Wuve

¹ Paul no Derbe lo ighi, eno tisheno Lystra lo küpülümi lakhi Timothy ipikeu ki lo ighi, pazá ye Jewmi eno küpülümi lakhi, ikemu papù ye Greekmi ke.

² Lystra ngò Iconium lo küpülümiqo kümtsü no Timothy ghili pipivi che.

³ Ike Paul ye Timothy sasü kicheghüzü lo wu niye shia, ikemu Jewmi tipa qhalo xü akemi kümtsü no Timothy papù ye Greekmi ipi ithi akeu ghenguno pa pelo aphighüyiko ghave pe.

⁴ Pama no kicheghüzü shisü mishighüna lakhi lono lakhi lo wu, tisheno apostolmi ngò kichimiqo no Jerusalem lo kiu xakütha shilu keno tipaqo pesü küpülümiqo pelo pelu penike pitsüe.

⁵ Ikehu akukuhomiqo ye aküpülü lo shikumtolu eno tsalà kipetsü kihiküsümi kutomo iko wove.

Paul’w Kungunhetsü

⁶ Asia bocho lo atsakiviu kütsü pemo nike Aghungu Kimthe vechewo lakhave kehu Paul ngò pa küsàmiqo ye kicheghüzü shisü Phrygia eno Galatia ko-aqha kümtsü lo wue.

⁷ Kughou Mysia ghuthú lo ighi keno panongu no Bithynia lo ilo niye shijue, ikemu Ampeu Jisü Ghungu no panongu pelo wupemove.

⁸ Ikehu panongu no Mysia vechesü wuve eno apéu Troas lo iqive.

⁹ Putho shi ake dolo kungunhetsü lono Paul lau Macedonia lono timi lakhi puthugho no pa qhüiniju, “Macedonia lo ighino ningu kuphu tsülo.”

¹⁰ Paul no kungunhetsü ithuluve kethiu Alhou no panongu lau atsakiviu pesü pipe nike ningu kulùvea kepi ithive no paikhavi Macedonia lo wuve nike aghili kutoluve.

Philippi lo Lydia no Xükithelu

¹¹ Troas lono ningu azüghi lo wu eno ashuka lono vejoi Samothrace lo wuve, eno thoghiu ningu ye Neapolis lo wue.

¹² Tile no ningu ye kicheghüzü shisü Rommi no qhasü pe akeu eno Macedonia tokukujo lo mishighüna atüghiu Philippi ipikeu lo wue.

¹³ Sabbath tsalà lo ningu no mishighüna khagho vechesü akighini shi nikeu-a aghí nani kepi phusü aghoki lo wue. Ningu no tilehi iqa no totimi kumqo aghikemiqo sasü küptsae.

¹⁴ Ningu tsa ini akemi gholo totimi lakhi je ye Lydia, li ye huzüi keu tiphimini lhidi shi chekemi eno Thyatira mishighüna lono ighi kemi ke. Li ye Alhou mülá chekemi. Ike Paul kükütsü tsa lo amlotsüqhiyilu penike Ampeu no li mlo khaqhi tsüe.

¹⁵ Kughou li no akibolomiqo sasü baptiz shiluve keno, li ki lo ningu kusüe. Li no pi, “Nongu no ni ye Ampeu lono küpülümi lakhi ipi ikhilu tsü aghí aye I ki lo ighino ngo lo.” Eno li no puloniqhiyi ningu sasüe.

Paul ngò Silas Akughuki lo Süve

¹⁶ Ghulo lakhi ningu no akighini shi chekeu-a lo wuche kelo aqüaxeu totimi lakhi aghawu no li phi lo ngo no ighi nikeu ghili pilu chekeu ningu no sasü kusholue. Li no angukuju shikeu vechewo li mpeunoqo ye pisa kutomo qelu che.

¹⁷ Totimi hipau no Paul ngò ninguqo pape no ighamuku ishi pi, “Timi hipaqo ye Akiqheu Alhou qemiqoe, panongu ye nongu vilo xakulupu laghi pitsü akemie.”

¹⁸ Li no ghulo atsütsǜ hitoi shiauve. Ikehu Paul ye azüzüve no tsüghüwo aghawu vilo pi, “Jisü Khristo je lono O pelo li qhive no ipeve penike I no azah O tsü anie!” Tipa mtsa aghawu no li qhive no wuve.

¹⁹ Kughou li no qelu chekeu lajupu kühave keu li mpeunoqo no ithive keno panongu no Paul ngò Silas pama tsüqüluve no pama sünhepe aqó lhikishi-a lo ayekipemiqo zülo sasü wue.

²⁰ Panongu no pama sasü yezapemiqo lau süghi no pi, “Timi hi pama ye Jewmi ke, eno ninguw mishighüna lo aküpüna vesü ani,

²¹ eno ningu Rommiqo no shimo kepu ngò ayeza lo shichemo keu kukhuaye kütau pesü asheshu anie.”

²² Tile timi aqokitikhi akeqo ghí Paul ngò Silas shou nguku akeu lo küqhave tsü, eno yezapemiqo no pama phimini xave no akihepuyi pesü heqhi penike aqokitikhi azah tsüve.

²³ Panongu no aloqhi pama heqhive kethiu akughuki lo khathave eno akughuki jukükütsüu vilo kutokughoi pama khe penike azah tsüve.

²⁴ Ayeza hipau ithulu kelo akughuki jukükütsüu no pama pesü akughu chebo akuthou lo sǘve püzü asülu kimshi dolo pama pukhu tshüve tsü.

²⁵ Putho-mta ghuloki lo Paul ngò Silas pama ye akighini shi eno akishé le phe ghi Alhou sheqhea, eno akughumi kütamiqo no pama tsa ini ae.

²⁶ Zülile no ayeghi küghütha ighono paküta keu shi ighi püzü akughuki tsükucho kümtsü tuküghüthae. Ghuthukhavi no akughuki hukikhaqo khaqhi khave, eno akughumi tshüpe püakeu yikichhe kümtsü ikole iqi khave.

²⁷ Akughuki jukükütsüu no idaithughi, eno kughou akughumi hukikhaqo khaqhive aghí keu pa no ithulu keno pa ye akughumi kümtsü pokajovea küghashi kümsüve püzü pa kihizüta pesü pa likhi pa ghiqhive niye kutove.

²⁸ Ikemu Paul no ighamuku pi, “O likhi O ghüza kevilo! Ningu kümtsü hilau aphike!”

²⁹ Akughuki jukükütsüu no akulu süghi penike ku, eno akimighi shi posü Paul ngò Silas pama gizülo qhoqhünhe pe ikiqi ngove.

³⁰ Tisheno pa no pama khalau sasü ipeghino iniju, “Akijeu nokujo, ni ye xaluve nike ghenguno kiu shi moayesa kea?”

³¹ Pama no khochile, “Ampeu Jisü shou pülübe lo, tishiaye no eno O kibolomi kümtsü xaluve nanie.”

³² Tisheno pama no Ampeu tsa pesü pa eno pa ki lo akemi kütami kümtsü vilo pie.

³³ Putho tipau tüqhüdo lono akughuki jukükütsüu no pama zakuqo qhuvetsü; tisheno mtazü pa no pa kibolomiqo kümtsü sasü baptiz shiluve.

³⁴ Akughuki jukükütsüu no pama sasü pa ki lo ighi eno pama ghenguno alibe kutotsü; pa ye alokivi no chhitoive kughengu pa eno pa kibolomi kümtsü Alhou shou pülübeluve ke.

³⁵ Kughou atsala vüqai ipeghive keno yezapemiqo no panonguw hiyampemiqo akughuki jukükütsüu lau puwu no ishi azah tsü: “Timi hupaqo khaqhipheve lo.”

³⁶ Akughuki jukükütsüu no Paul vilo pi, “Yezapemiqo no Silas nokujo khaqhipheve penike azah tsüvae. Itehi nokujo ye wulu nanie. Aloino wolo.”

³⁷ Ikemu Paul no hiyampemiqo vilo pi: “Ningu ye Rommi aghakütsamiqo keghi panongu ye ningu tsa küghajumo no timi zülo no ningu hepüani eno akughuki lo ningu khathave ke. Itehi panongu ye küsüu no ningu phe puwuve niye ani keshea? Tishimlae! Panongu ampi no ighino ningu khe sasü ikhiphe pelo.”

³⁸ Hiyampemiqo no hipa tsa pewo yezapemiqo vilo pive, eno kughou panongu no Paul eno Silas ye Rommi aghakütsami kepi chiluve keno, panongu ye shishe msàve.

³⁹ Ikehu panongu no akipimí khuni ke ighi eno akughuki lono pama khe sasü ipeghive tisheno pama pelo mishighüna qhive no wuve tsü penike qhüiniju.

⁴⁰ Paul ngò Silas pama ye akughuki lono ipeghive kethiu pama no Lydia ki lo wue, eno tilehi athiküzümi eno achelimiqo sasü kusholu no panongu shikumto tsülue. Tisheno pama ye wuve.