Apostolmi 14 - Sümi Tiqhelimi Bible

Iconium lo

¹ Thosülo toi Paul ngò Barnabas pama ye Iconium lo Jewmi’w synagog lo wu. Tilehi pama kükütsü kivi vechewo Jewmi ngò Greekmiqo kutomo no pülüluve.

² Ikemu Jewmi khunoqo pülüni keu milive keno panongu no Jewkumomi kütamiqo xukuthove eno athiküzümiqo lachile penike panongu kükümsü lo alhoküsa xusüve tsüe.

³ Ike Paul ngò Barnabas pama ye ado kushuwa tilehi ngo no Ampeu ghenguno akumto shi pia, eno pama no küpükini kükütsü tsape shikeu kimchitsü akeu shi Ampeu no pama pelo amichipu eno akümzapu kümlàqo shilu pe.

⁴ Mishighüna lo timiqo ye kijethave: khami no Jewmiqo gholo eno kütamiqo no apostolmiqo gholo küqhave.

⁵ Tile Jewmi ngò Jewkumomiqo no panonguw sakiphemiqo sasü kümqüve no apostolmi pama ghimeqhi püzü atu pesü veqhi nikeu shi püghüe.

⁶ Ikemu pama no ti ithive no Lycaoniamiw mishighünaqo, Lystra ngò Derbe eno tipaqo sükümxa lo pove,

⁷ tisheno pama no atsakiviu pesü tamo no asheshue.

Lystra eno Derbe lo

⁸ Lystra lo apukhu kinitave kemi lakhi iqa ache. Pa ye azá po lo apukhu kinitave püzü punú eno khilemu alà che müla ache.

⁹ Pa ye Paul kükütsü tsa tsaqüi ini ae. Paul no tsaqüi pa ju kelo pa ye shipiviluve kepu küpülü akeu ithulu

¹⁰ kehu asütsa qhemghai shi no pi, “Puthugho lo!” Ikelo ye, timi hu no ilheithughi no alà che thuve.

¹¹ Kughou Aqokitikhi no Paul no mülà keu ithulu keno panongu no Lycaoniami tsau no ishi igha thuve, “alhouqo no timi phimpi ghola lono ningu lau iqighi anie!”

¹² Panongu no Barnabas pesü Zeus ipi ku, eno Paul no atsapitou shi ake ghenguno panongu no pa pesü Hermes kutsü.

¹³ Mishighüna khalau Zeus chineki akeu lo achineu ye aqokitikhi sasü aghakishi kümlagho pe Paul ngò Baranabas pama mülá nishi ake ghenguno amishitsü ngò axamunuqo pesü mishighüna khaghoqo lo ighi.

¹⁴ Ikemu kughou apostol Paul ngò Barnabas pama no ti chilu keno, pama phì süxüve eno aqokitikhi lau poipeghi no ighamuku:

¹⁵ “Aküsàmiqo, nongu ye kushiye hi shi ani kea? Nikujo ghí nongu toi timi ke. Ningu no nongu lau atsakiviu süghi akeu ye nongu pelo ameküha keu thime jeli hipaqo qhive no xü akeu Lhou, khuu no atsütsǘ, ayeghi, azüghi eno tipaqo lo akeu kümtsü lhosü keno, pa lau ideighi peniye ke.

¹⁶ Wove keu lo pa no shiyeqo kümtsü pelo pütüta là lo che pe ke.

¹⁷ Tishimu pa ye xüani ipikeu ashepe qhitsümo keu shimoe: Pa no küpüqhiyi keu pìye akeu michi atsütsǘ lono tsütsüghu eno atusho kiqi lono axa jeli nongu tsü; pa no achuqupu kutomo nongu tsü eno alokivi pesü nongu mlo vepiqi tsüe.”

¹⁸ Atsa hipaqo pive kethiu ghí timiqo no aghakishi kümlagho pesü pama mülá niye shi kelo pama ye akushukulu lakha chilelue.

¹⁹ Tile no Jewmi khami Antioch ngò Iconium lono ighino timiqo mlo zülu khave. Panongu no atu pesü Paul veqhi eno pa ye thivea küghashi kümsüve no mishighüna khalau sünhekiti peve.

²⁰ Ikemu kughou küpülümiqo no pa veho pesü kumqo akeno pa ye ithughive no mishighüna lo chesü idewove. Tishiwo thoghiu Barnabas ngò Paul pama ye Derbe lo wuve.

Syria lono Antioch lo Ideighi

²¹ Pama no mishighüna tipau lo atsakiviu pesü kütsü püzü timi kutomo pelo küpülümi shiluve pe. Tishive no pama ye Lystra ngò Iconium küdau no Antioch lo ideghive,

²² eno hipaqo-a lo küpülümiqo pelo panongu küpülü lo kuchou shi apenike hakite eno shikumto tsü. Pama no pi, “Alhou kükaphu lo ilo nike ghenguno ningu ye shiluküsa kutomo veche moayesae.”

²³ Paul ngò Barnabas pama no akukuho atsütsǜ lo panongu ghenguno kichimiqo süküsü shitsü, eno akighini gholo kümvü keu vechewo panongu no pükhübe chekeu Mpeu lau kulhuqhive tsü.

²⁴ Pisidia vechesü wuve kethiu pama no Pamphylia lo ighi,

²⁵ eno kughou pama no Perga lo atsakiviu kütsüve keno pama ye Attalia lo iqive.

²⁶ Attalia lono pama ye ashuka lono Antioch lo idewove, tile no pama kümlà mülaqhiluve keu ghenguno Alhou’w küpükini lo kulhuqhive tsülu.

²⁷ Tilehi ighi kelo pama no akukuhomiqo aqoshi kukütsü püzü Alhou no pama vechewo kiu mülà tsü eno pa no kíshi Jewkumomiqo lau aküpülü hukikha khaqhive tsü keno ti kümtsü pesü pìthitsü.

²⁸ Eno pama ye tilehi küpülümiqo gholo ado kushuwa ngove.