Apostolmi 12 - Sümi Tiqhelimi Bible

Peter no Akughuki lono Akümzapushi Pokajolu keu

¹ Hipau ghuloki lo Akükau Herod no pishi-puju nikeu kimiji lono akukuhomi khami küghaluve.

² Pa no John thiküzüu James kügha pesü akihizüta no ghiqhi pìthíve.

³ Kughou hi shikeu lo Jewmiqo lopu shive keu pa no ithive keno, pa ye Peter ghí küghaluve niye kutove. Hipau shikeu ye Kholaqhi Sümo keu Sho pesü Aghulhu shi akeu ghuloki lono ke.

⁴ Peter küghaluve kethiu Herod no pa pesü akughuki lo sǘve, eno ghüshimi bidi-di no amqo bidí shi no aghükheu shipe nike picheve. Herod ye Hechekulu ghulhu thiu timi aqha zülo no Peter shou atsa kügha nikeu shie.

⁵ Ikehu Peter ye akughuki lo khathapüa, ikemu akukuhou no pa ghenguno pulopiniyi Alhou vilo inikhu ae.

⁶ Herod no atsa kügha nike thoghiu Peter sawu niye shi ake jì lo Peter ye ghüshimi kini dolo ayikichhe kighi kini no tshü pesü züae, eno akughuki hukikha lo aghükhemi no khea.

⁷ Paikhavi lono Ampeu’w kungumi lakhi ipeghi eno aküvü no achebo lo yepüvü pe ngove. Pa no Peter bighi lo tukütha no pa küdaputhu. Pa no ishi pi, “Mtazü, ithuvelo!” eno Peter u lono ayikichhe kighi iko ikiqive.

⁸ Tisheno kungumi hu no pa vilo pi, “O phiküzü eno apukhuqho pepuluvelo.” Eno Peter no tishive. Kungumi hu no itaghi ishi pi, “Ow ubephi uluve no I papelo.”

⁹ Peter no pa papesü akughuki khalau ipeghive, ikemu pa ye kungumi hu no kiu shi akeno tiye kuchou no tishi ani kepi kitilamu mtha no ae; pa ye kungunhetsü ithulu ani küghashi kümsü ae.

¹⁰ Pama no ghükhemi no khe akeu atüghiu ngò akiniù veche ipeve püzü mishighüna küdau wuche keu yì khagho lo ighie. Khagho hukikha hu no pa kutoshi no pama ghenguno khaqhi tsüe, eno pama no tipau lono ipeghive. Kughou pama no alaghila lakhi kupuju alà cheve keno, kungumi hu ye paikhavi lono Peter qhive no wuve.

¹¹ Tipathiu Peter ye atsüveshe ipeghino pi, “Itehi ni ye lipimo no Ampeu no paw kungumi hapuwu püzü Herod no tsüqü pesü akeu lono eno Jewmi no shini kepi kümsü akeu kümtsü lono I xapheluve keu I no ithivae.”

¹² Kughou pa no ti ithive keno pa ye John, khuu Mark ipi ku cheni keno, pazá Mary ki lo wuve, tilehi timi kutomo kumqo no akighini shiae.

¹³ Peter no khalau hukikha lo kukhu, eno aqeu lakhi je Rhoda ipikeu no khaqhi niye ipeghi.

¹⁴ Kughou li no Peter tsapi michiluve keno, li ye shishe alovi kelau no ahukikhamu khaqhimo no pochilesü ilo no ishi igha pi, “Peter ye ahukikha lo anie!”

¹⁵ Panongu no li vilo pi, “No ye izü anie.” Kughou li no kuchou kepi pikichichi auve keno panongu no ishi pi, “Tiye paw kungumi keniae.”

¹⁶ Ikemu Peter no ahukikha kukhu tamove, eno panongu no ahukikha khaqhi püzü pa ithulu kelo panongu ye shishe akichiqhive.

¹⁷ Panongu pelo inaqhoive penike ghenguno Peter no pa u kihí pe pìyeve püzü Ampeu no kíshi akughuki lono pa saipeghi keno kishékulu shi lhepiye. “Hipau pesü James ngò athiküzümi eno achelimi kütamiqo vilo pilo,” ipi pa no pi, eno tipathiu pa ye a-a kütau wuve.

¹⁸ Inaqhe shive kelo, ghüshimiqo dolo Peter ye kiu shivea kela ipi shishe mubumghu thuve.

¹⁹ Herod no tsaqütsalei Peter phuju pe, ikemu pa phumlave kethiu pa no ghükhemiqo dolo iniju kideküdaju püzü panoqo pìthíve pe nikeu azah tsüve. Tishive no Herod ye Judea lono Caesarea lo wuve no tilau ngove.

Herod Kithí

²⁰ Pa ye Tyremi ngò Sidonmiqo sasü kichighi ache; ikemu panongu küqhave no hekütsü pe pa gholo amqo lakhi shini ke ighi. Panongu no akükau no lüthü shi pükhübelu chekeu Blastus mlo züluve kethiu, külakishi shini ke qhüinijue, kughengu panongu ye achuqupu ghenguno akükau chebo shou pükhü pe acheke.

²¹ Kughupe püakeu tsalani, Herod no paw chijeboboi keu kükaphi pepu no pa küká lakhü lo iqa eno paw timiqo vilo asheshu.

²² Timiqo no ighamuku, “Hiye alhou lakhi tsapi thono timi tsapi kumoe,” ipi.

²³ Zülile no, Ampeu’w kungumi lakhi no Herod hekuluqhive, eno pa ye apithe no tsaqhi pìthíve, kughengu pa no akishé Alhou tsümo ke.

²⁴ Ikemu Alhou tsa ye tamo no veküpha eno alau shi iko wove.

Barnabas ngò Saul Pama Puwuve

²⁵ Barnabas ngò Saul pama ye kughou pama puwu keu kümlà shitave keno Jerusalem lono ideghive, eno pama gholo Mark ipi ku chekeu John ghí sasü ighive.