Apostolmi 11 - Sümi Tiqhelimi Bible

Peter no pa Kümlà Ghili Hepho-piye

¹ Judea qha kümtsü lo Jewkumomi ghí Alhou tsa ikhiluvae ipikeu apostolmi ngò küpülümiqo no chilu.

² Ike kughou Peter no Jerusalem lo iqho keno Jewmi küpülümiqo no pa pipüsa

³ no ishi pi, “No ye aphighüyiko ghamo kemi ki lo ilo no panongu gholo chu-shoke.”

⁴ Peter no panongu vilo abothu lono huthu no thowkha ishi lhepe pìye:

⁵ “Ni ye Joppa mishighüna lo akighini shiae, eno züxo lono kungunhetsü lakhi ithulue. Kungugha lono apa kijè toi keu lakhi ako bidí kughujupiqi, eno tiye I no akeu-a lo iqighie.

⁶ I no tipau lo jusü eno ayeghi lo achekeu apukhu bidí kupù lhoxü, tüghashi, itikiche lhoxü eno aghauqo ithulue.

⁷ Tisheno asütsa lakhi no I vilo ishi pikeu I no chilue, ‘Peter, ithuve püzü hi heqhi no chulo.’

⁸ “I no ishi khochile, ‘Ampeu, tishimlae! Kitiqeve keu momu mithemo keu chuqu kiumu I kichí lo süju mphie.’

⁹ “Kungugha lono asütsa hu no akiniù pi, ‘Alhou no shikimtheve keqo lakhimu kitiqevea ipi kevilo.’

¹⁰ Ghuthu aküthüu hitoi shie, eno tithiu ye kümtsü kungugha lo sünhe chile saikuve.

¹¹ “Tipa mtsa timi küthü Caesarea lono I lau puwu kemiqo no I no ngo akeu ki lo ighi.

¹² Aghungu Kimthe no I vilo panongu gholo wuni keu künacho kevilo ipi. Joppami athiküzümi pano tsügho ghí I gholo wue, eno ningu Cornelius ki lo ilo.

¹³ Kungumi lakhi no pa ki lo ighino pa vilo kíshi pi keno tipau pesü ningu vilo ishi pi, ‘Joppa lo timi puwu no Simon khuu Peter ipi ku cheni keno pa kuwu pelo.

¹⁴ Pa no akükütsü sütsa lakhi pesü O lau süghi nani eno tipau vechewo no eno O kibolomi kümtsü xaluve nani.’

¹⁵ “Kughou I no atsa pithuve keno, Aghungu Kimthe hu no inahuu ningu shou ighi keu hutoi panoqo shou iqighie.

¹⁶ Tile no I no Ampeu no pikeu tsa hipau kümsüchilelu: ‘John ye azü pesü baptiz shitsüe, ikemu nongu ye Aghungu Kimthe lono baptiz shitsü nani.’

¹⁷ Ike Alhou no aghò pesü ningu tsü keu toi Ampeu Jisü Khristo pülüluve kemiqo ghí tsü aye, ni ye khuu keno I no Alhou lakha kulupu kea?”

¹⁸ Kughou panongu no hi chilu keno, panongu ye kiumu lachilelu keu shimove eno Alhou sheqhe ghi ishi pi, “Tishiaye, Alhou ye Jewkumomiqo kutólo ghí amlo pebide keu vechewo aküxüpu shilu penike puloza tsüvae.”

Antioch lo Akukuhou

¹⁹ Stephen pìthíve keu lono pishi-puju ipeghi keu vechewo küpülümi apanaghave kemiqo no Phoenicia, Cyprus eno Antioch kutólo wu no Jewmiqo dolo likhi Alhou tsa pesü külha wove.

²⁰ Ikemu panongu gholo khami ye Cyprus eno Cyrene lono Antioch lo wu no Ampeu Jisü tsakiviu ghili pesü panongu vilo likhi kumo no Greekmiqo vilo ghí pithuve.

²¹ Ampeu küká panongu gholo ae, eno timi kutomo no pülüluve püzü Ampeu lau xaideghiluve.

²² Hipau sütsa Jerusalem lo akukuhou tove, ikehu panongu no Antioch lo Barnabas puwu.

²³ Kughou pa no Antioch tove püzü Alhou’w küpükini no kiu mülave tsü akeno ithulu kelo, pa ye amlokiqi shive eno amlo kümtsü pesü Ampeu ghokulu shi alo ipi panongu shikumto tsüe.

²⁴ Barnabas ye timi kivimi lakhi, aküpülü eno Aghungu Kimthe no chhitoi akemi, eno pa no Ampeu lau timi kutomo saighike.

²⁵ Tisheno Barnabas ye Saul phu nike ghenguno Tarsus lo wuve,

²⁶ eno kughou pa no Saul phuluve keno pa sasü Antioch lo ighi. Ike Barnabas ngò Saul pama no ampe kupuju akukuhomi sasü kusholu eno timi kutomo kütsüe. Küpülümiqo ye Khristomi ipi Antioch lono atüghiu shi kulù.

²⁷ Hipa ghuloki lo Jerusalem lono tungkupumi khami Antioch lo iqighi.

²⁸ Ike panoqo gholo timi lakhi Agabus ipikeu no puthugho püzü Aghungu vechewo püqümiye kijè lakhi Rome yeghiqha kümtsü shou ighi nani ipi kütüghü tsüe. (Hiye Claudius no akükau shi ake ghuloki lono shikupuve.)

²⁹ Küpülümiqo no pütüta no shilu keu qhemi pesü Judea lo xü akemi athiküzümi eno achelimiqo kuphuni keu shi xathalu.

³⁰ Panongu no titoi shi no Barnabas ngò Saul pama gholo no akukuho lo kichimiqo lau akukuphu ghò tsüpuwue.