Apostolmi 10 - Sümi Tiqhelimi Bible

Cornelius no Peter Ku

¹ Caesarea lo timi lakhi Cornelius ipikeu ache, pa ye Italymi Ghüshimi ipi chekeu lo aqhe shou zatsüu lakhi ke.

² Cornelius eno pa kibolomi kümtsü Alhou lau amlo kütsümi eno Alhou sümsa chekemi; pa ye kümsá no shishe kumlhomiqo kuphu eno pa ye tamo no Alhou vilo inikhu ache.

³ Ghulo lakhi avelau ayì küthü ghuloki lo pa ye kungunhetsü lakhi ithulu. Pa no mütsümishei Alhou’w kungumi lakhi ithulu, kungumi hu no pa lau ighino ishi pi, “Cornelius!”

⁴ Cornelius no akümsa lau no thüghüi pa ju. Pa no, “Kiu kea, Ampeu?” ipi iniju. Kungumi hu no khochile, “O kighini eno nono kümsá no kumlhomiqo kuphu chekeu ye Alhou gizülo kümsüma müla keu kümlagho shi ikughivae.

⁵ No ye Joppa lo timi puwulo. Panongu pelo tilau timi lakhi pa je Simon khuu Peter ipi ku cheni keno pa kuwu pelo.

⁶ Pa ye Simon ashiyiko kümlàu ipikeu gholo ani, eno pa ki ye azüghi phivilo anike.”

⁷ Kughou kungumi pa pütsa akeu no pa qhive no wuve keno, Cornelius no pa qemi kini eno pa ghinikishiu ghüshimi lakhi Alhou lau amlo kütsümi ishi kue.

⁸ Pa no kiu shive keno thowkha panoqo vilo lhepe pive eno Joppa lo panongu puwuve.

Peter’w Kungunhetsü

⁹ Tishiwo thoghiu kughou puchou ghuloki lo panongu no kicheghüzü shisü wo Joppa kupunúve keno, Peter ye akighini shi niye aki kütsüqa lo ikuve.

¹⁰ Pa ye müzüthive eno kiuala chuni shiqhiyive, eno alibe kutò ake dolo no, pa ye piyeküsü lakhi ithulu.

¹¹ Atsütsǘ kijeve no kiu kela lakhi apa kijè toi keu tipau ako bidí shi no ayeghi küdau kughujupiqi keu pa no ithulu.

¹² Tipau lo apukhu bidí kupù lhoxü, itikiche lhoxü eno aghau jeli kümtsü ae.

¹³ Tisheno asütsa lakhi no pa vilo pi, “Peter, ithuve püzü hi heqhi no chulo.”

¹⁴ Ikemu Peter no khochile, “Ampeu, tishimlae, ni ye khilemu mithemo keu momu kitiqeve keu chuqu chuju mphie.”

¹⁵ Asütsa hu no ghuthu akiniù pa vilo pi: “Alhou no shikimtheve keqo lakhimu kitiqevea ipi kevilo.”

¹⁶ Ghuthu aküthüu kutólo hitoi pi püzü, ako bidí akeu apa tipau hu ye kungugha lo paikhavi ikhipesü ikuve.

¹⁷ Kughou Peter no kungunhetsü kiqi ye kiu kea ipi avehuizüa kelo, Cornelius no timi puwu keqo hu ye Simon ki phuluve no khagho lo puthugho aghíe.

¹⁸ Panongu no ku püzü, Simon Peter ipikeu anima pi inijue.

¹⁹ Peter ye ti kutólo kungunhetsü ghili kümsükutoju ae, tishi akelo Aghungu no pa vilo ishi pi, “Simon, timi küthü no O phu cheni.

²⁰ Ike ithulo eno aki aqhou iqilo. Panoqo gholo wuni keu künacho kevilo, kughengu I no panoqo puwu anike.”

²¹ Ikehu Peter no iqighi püzü timiqo vilo pi, “Nongu no phu chekeu timi hu ni ke. Nongu ye kiu shi ighi ani kea?”

²² Panongu no ishi khochile, “Ningu ye aqhe shou zatsüu Cornelius lau no ighi anie. Pa ye amikuchomi, Alhou sümsa chekemi eno Jewmi kümtsü no pa gihu chekemi lakhi ke. Akimthe kungumi lakhi no pa vilo pikeu no O pelo pa ki lo ighino nono kiu pi kepu ani keno pa no ini kepu shini ke ighino pilo pie.”

²³ Ike Peter no pa ki lo inami shi ghi panongu sasüe. Thoghiu Peter ye panongu gholo wuve, eno Joppa lono küpülümiqo khami ghí pa gholo wue.

Peter no Cornelius Ki lo wu

²⁴ Tishiwo thoghiu pa ye Caesarea lo ighi. Cornelius ye pa bolomi ngò paw shompamiqo ku kumqo no panoqo huqhe khe aghí.

²⁵ Kughou Peter no aki lo iloghi keno Cornelius no pa sasü kusho eno gihu keu michi shi Peter pukhuphi lo itsaqi.

²⁶ Ikemu Peter no pa sünheputhu no pi, “Puthughove lo, ni ghí timi lakhi ke.”

²⁷ Peter no Cornelius pütsa ghi aki alou iloghi kelo timi kutomo kumqo aghí.

²⁸ Pa no timiqo vilo pi: “Nongu kümtsü no akivishi ithi anike ni yeza kiqi lo ye Jewmi lakhi ye Jewkumomi ki lo iloghi kepu kumo momu Jewkumomi gholo kutubo kepu kumoe. Ikemu ni ye timi khumu pesü mithemo momu kitiqevea ke ipi kepu kumoe pi Alhou no I piyesüvae.

²⁹ Ike kughou I ku ighi keno ni ye kiumu lachile keu shimo no ighivae. Nongu ye kiu ghenguno I ku puwu keno I vilo pitsünima?”

³⁰ Cornelius no khochile: “Atsala küthü züu hipau tüqhüdo lo ni ye avelau ayì küthü kihe lo I ki lo akighini shiae. Paikhavi timi lakhi no phuphui keu tiphimini pepu no I zülo puthugho

³¹ püzü ishi pi, ‘Cornelius, Alhou no O kighini chiluvetsüa eno nono aghòqo pesü kumlhomi kuphu chekeu hu Alhou no kümsüluve tsüae.

³² Joppa lo timi puwu püzü Simon khuu Peter ipi ku cheni keno pa kuwu pelo. Pa ye azüghi phivilo Simon ashiyiko kümlàu ipikeu ki lo inami shi ngo anike.’

³³ Ikehu I no akimighi shi O kuwu peniye timi puwu ke, nono ighive keu no alovae. Itehi ningu kümtsü hilehi Alhou zülo ani, eno ningu ye Ampeu no O vilo ningu lau kiu pilo pi azah tsü keno chilu nike ngokhe anie.”

³⁴ Tile Peter no ishi pithu: “I no itehi no vethalu akeu ye Alhou ye timi kümtsü aphiphi shi peitha acheni ipikeu ye kiutoi kuchou

³⁵ eno shiye jeli kümtsü lono pa sümsa chekemi eno kiu no achipi keno tipau shi chekemi ikhilu cheni.

³⁶ Nongu ye Alhou no Israelmi lau akükütsü sütsa tsü keu hu ithi ani, tiye Jisü Khristo khuu kümtsü shou Ampeu keno pa vechewo alokughuno tsakiviu piputo tsüke.

³⁷ Nongu ye Judea bocho lo kiu shive keno ithi ani, tiye John no Galilee lo baptiz ghili kütsü keu lono huthuke.

³⁸ Nongu ye Alhou no kíshi Nazareth nó ghami Jisü shou Aghungu Kimthe eno aküka vechewo nukishelu keno ithi ani. Jisü no akümlà kivi shisü iqho-iqi eno tüghami küká lo qhasü pe akemi kümtsü shipivi ke, kughengu Alhou no pa gholo ae.

³⁹ “Jewmi ghakhu ngò Jerusalem lo pa no mülà keu kümtsü ninguqo no thopimi ke. Panongu no kros lo pa tshüqhi no heqhipithíve ke.

⁴⁰ Ikemu Alhou no aküthüni no akithí lono pa xüputhuve no timi lau pephe-piye ke.

⁴¹ Timi kümtsü no pa ithumlae, ikemu Alhou no thopimi kishe pe qhiluve keqo likhi no eno ningu khunoqo pa no akithí lono xüthuve kethiu pa gholo chu eno sho keno tipaqo no ithulu ke.

⁴² Pa no ningu vilo atsakiviu timiqo lau kütsü lo ipi azah tsü eno küxümi ngò kithimi shou küghaküthau shipe niye Alhou no süküsü shikeu hu ye pa ke ipi ashepe shilo pike.

⁴³ Timi khuu no pa pülüni keno pa je vechewo axiné qhikütsü ithulu nani ipi Tungkupumi kümtsü no pa shepe shitsü.”

⁴⁴ Peter no atsa hipaqo piaphi lono akükütsü sütsa inilu kemi kümtsü shou Aghungu Kimthe ikughive.

⁴⁵ Jewmi küpülümi Peter gholo ighi kemiqo ye Jewkumomiqo shou ghí Aghungu Kimthe lepuku tsü aghí keu ithulu no akichiqhive.

⁴⁶ Kughengu panongu mili lono pi aghí keu eno Alhou sheqhe aghí keu panongu no chilu ke. Tile Peter no pi,

⁴⁷ “Kuchou no khunomu azü pesü no panongu baptiz shini keu lo lakhave mülae. Ningu no Aghungu Kimthe ithulu ketoi panongu ghí ithuluvae.”

⁴⁸ Ike Peter no Ampeu Jisü Khristo je lono panoqo baptiz shilu penike azah tsü. Tithiu panongu no Peter vilo atsala hami panongu gholo ngo aghí tsülo pi qhüiniju.