Apostolmi 1 - Sümi Tiqhelimi Bible

Jisü Kungugha lo Saikuve

¹ O Theophilus, iw kaku atüghiu lo Jisü no mülà keu eno kütsü keu kümtsü I no yekütsü ke,

² tiye Aghungu Kimthe vechewo pa no apostolmi shipe niye kisheluve kemiqo lau mijeve tsü kethiu kungugha lo saikuve keu tsalà tomo ke kutólo ke.

³ Pa kithí ghime thiu, pa no timiqo lau ipeghi pìye eno pa ye xü aphi kepi pülükulupu michipuqo kutomo pìye ke. Pa no atsala lhobidi kutólo panongu lau ipeghi pìye eno Alhou kükaphu ghili pesü pi acheke.

⁴ Ghulo lakhi pa no panongu gholo chuqu-kusho shi akelo pa no azah hipau panongu tsü: “Jerusalem qhi kevilo, ikemu I pù no aghò tsüní ipi piqhipüa keu ngokhe lo. I no aghò tipau ghili piche keu nongu no chiluvea.”

⁵ Kughengu John ye azü lono baptiz shitsü ke, ikemu atsala hami thiu nongu ye Aghungu Kimthe lono baptiz shitsü nani.

⁶ Panongu no pa homüxa pe ngo no pa vilo iniju, “Ampeu, no ye atüqhüdo hipau lono Israel kükaphu sachile süghi niye ani keshea?”

⁷ Pa no panongu vilo pi, “Nongu ye Apù no paw kükagha lono ado momu atsala pekithi pe püakeu ithi moayesa keu kumoe.

⁸ Ikemu kughou Aghungu Kimthe nongu shou ikughini keno nongu no aküka ithulu nani; eno nongu ye Jerusalem lo Judea qha kümtsü lo, Samaria lo eno ayeghi shekichi kutólo iw thopimiqo shi nani.”

⁹ Pa no hi pive kethiu, panongu nhekithe lono pa ye kunguu saikuve, eno khüngküsü amqo lakhi no pa nhaluve püzü panongu ye pa ithumlave.

¹⁰ Panongu no anhesüküqümo no atsütsǘ lo pa no wuche keu ju akelo ye, zülilekhavi lono timi kini aphì kimiyé pepu no panongu phivilo puthugho ngove.

¹¹ Pama no ishi pi, “Galileemiqo, nongu ye kushiye hile puthugho no atsütsǘ lo ju ani kea? Jisü khuu nongu lau no kungugha lo sawuve akeno pa ye nongu no kungugha lo pa sawuve keu ithulu ketoi akiniù ideighi nani.”

Judas Theli lo Matthias Kisheluve

¹² Tithiu Apostolmiqo ye ato lakhi Olive naghuto ipikeu lono Jerusalem lo idechile ighive, tiye mishighüna lono mile tüxa qhalo ke.

¹³ Panongu no ighive kethiu, panongu ye panongu no kunguu ngo chekeu chebo lo ikuve. Tile akemiqo ye: Peter, John, James, eno Andrew; Philip eno Thomas; Bartholomew eno Matthew; Alphaeus nu James eno azá yeghi kimiye kicheu Simon eno James nu Judas.

¹⁴ Apostolmiqo ye tamo no totimiqo eno Jisü pazá Mary ngò pa thiküzümiqo gholo kümtsü küqha no inikhu ache.

¹⁵ Tishiwo kushuwa kumo dolo Peter no küpülümiqo (kümtsü küqha kelo panongu aqhe no muku qhemi ake) dolo puthugho

¹⁶ no pi, “Athiküzümi eno achelimiqo, Kuchoyesü lo pipüa keu shikupu moayesae, tiye khaghi Aghungu Kimthe no David vechewo Judas khuu Jisü küghaluve kemiqo là kiche-kipiyeu shi keno pa ghili pipüa keu ke.

¹⁷ Pa ye ningu gholo kihiküsümi lakhi shi no ningu gholo mülà küqha cheke.”

¹⁸ (Paw küsakügha jume ithulu keu pesü Judas no alu qhü; pa ye akütsü no aqhoshi ikiqi no pa phimpi vepho kighinoli kümtsü ashou vele ipeghive ke.

¹⁹ Jerusalem lo akemi kümtsü no hipau ghili chiluve, tighenguno panongu no alu tipau je pesü pano tsau no Akeldama, ipi kuve tsü, hipau kiqi ye, ajì peleve keu lu.)

²⁰ Peter no pi, “Kughengu Leshele kaku lo ishi yèpüani: “ ‘Pa kungo-a ye pighive pelo; khuu pelomu tile xüpe kevilo,’ eno, “ ‘kütami pelo pa sakiphe-a lo ngove pelo.’

²¹ Tighenguno ningu dolo khuu no Ampeu Jisü no iqho-iqi keu kümtsü lo ningu gholo kutubo ighi keno timi lakhi kishephe moayesa ani,

²² tiye John no baptiz shikeu lono huthu no Jisü ningu lau no saikuve ke kutólo. Hipaqo gholo milakhi ye ningu gholo shi no Jisü no xülethuve keu thopimi lakhi shi moayesae.”

²³ Ikehu panongu no timi kini je shuphe: Barsabbas ipi chekeu Joseph (aje kütau Justus ghí pi cheni) eno Matthias.

²⁴ Tisheno panongu no akighini shi, “Ampeu, nono kümtsü mlo ithi ani, hi pama dolo Judas no apostol kümlà qhive no pa kungo-a lo wuve keu lo

²⁵ khiu pelo pa theli lo mülà peniye kisheluvea keno ningu pìye tsülo.”

²⁶ Panongu no asaqhi kelo Matthias shou qhibelu; ikehu pa pesü apostolmi chighiqhaqhi gholo kihisüluve.