3 John 1 - Sümi Tiqhelimi Bible

¹ Ni amchou no, I küsàu Gaius, khuu I no kuchou lono kimiye cheni keno pa lau yèlu ani.

² I no kimiye chekeu I küsàu, no ye thowkha kümtsü alo aghí nani eno O ngulho ngò O shi-aji akivishi aghí nani kepi pülü ani.

³ Kughou küpülümi khami no ighino nono kuchou shou pülübelu akeu eno kíshi kuchou lo xüani keno pesü piakeu lo ni ye alokiqi kijè shi ani.

⁴ Ni ye I nuliqo no kuchou lo xüani ipikeu sütsa chilu keu lokiqi nguno akijeu kühae.

⁵ Kimiye chekeu I küsàu, O ghenguno athiküzümi ngò achelimiqo ye inami shi aghimu nono panongu ghenguno kiu shi ani keno tipau lo pükhübekulu shike.

⁶ Panongu no ow kikimiye ghili pesü akukuhou vilo pivae. Kimiye no Alhou gihu akeu gholau no panongu ghüzüla lo kuphu puwu tsülo.

⁷ Jewkumomiqo lau no kiumu akukuphu ithumla no panongu ye Khristo je ghenguno wuke.

⁸ Tighenguno ningu ye timi hitoi kemi lau sasükini pìye moayesae tishi keu vechewo ningu pelo kuchou ghenguno mülà küqha peniye ke.

⁹ Ni ye akukuhou lau yè puwu ke, ikemu Diotrephes, khuu atüghiu shinishi acheni keno, pa no ningu sasümoe.

¹⁰ Ike kughou I no ighini keno, pa no kiu shi ani keno I no tipau pephe nani, tiye pa no tixe eno akükümsü küküha tsa pesü ningu ghili külha akeu ke. Tipau lo aghaqi müla no, pa ye küpülümi kütamiqo sasǘ pe nikeu kutólo ghí milive ke. Khunoqo no sasǘ nishi ani keno tipaqo pa no lakhave ke eno akukuhou lono hapheve ke.

¹¹ Kimiye chekeu I küsàu, kiu no küsakügha keno tipau kishishi kevilo ikemu kiu no akivi keno tipau kíshi shilo. Khukhumu akivi shikeu ye Alhou lau no ighi kemi ke. Khukhumu kiu no küsakügha keno tipau shikeu ye Alhou ithulu mphie.

¹² Kümtsü no Demetruis ghili kivi pi acheni—eno kuchou hu ghí pa ye akivi ke ipi cheni. Ningu ghí pa ghili akivishi pi cheni, eno ninguw thopi ye kuchou kepi nono ithi ani.

¹³ Ni ye O lau kutomo yè kepu shi ani, ikemu ni ye yèsüta eno akiyezü lono yè keu ye shinishi amoe.

¹⁴ Ni ye pai O sasü kusholu nike lakuju shi ani, eno nikujo agi no agi kinheqhi küptsa kepu shini.

¹⁵ Aloino keu O gholo apeniu. Hilau shompami akemiqo no panonguw petha tsüpuwu ani. Tilau shompamiqo lakhi-khi lau petha tsü ani.