2 Tim. 4 - Sümi Tiqhelimi Bible

¹ Küxümi eno kithimi shou küghathabe niye akeu Lhou eno Khristo Jisü khuu ipeghi niye ani eno pa kükaphu ghenguno I no hipau O pichetsü ani:

² Alhou tsa pesü kütsü alo; azüu no kütüghü keu shi aghina zülile shi aghí namu Alhou tsa pìní keu lo kutò pe alo; kheakulu shi no tsaqütsalei keu shikakütsü vechewo shikithe tsü, alomipi eno shikumto tsü alo.

³ Kughengu timiqo no akǜlü kuchou papemoveni keu do ighi nani. Tishini ke züqhulo, panongu no pano likhi pano ghapiqilu nikeu eno panongu kìní muthomüzai akeu no chilu nishi keu gholau no pipe nike ghenguno kükütsümi kutomo panongu sühomxa pe qhi nani.

⁴ Panongu ye kuchou lau no panongu kìní kughove no küghakiche tsa küdau kughosü wuve nani.

⁵ Ikemu Timothio, no ye atüqhüdo kümtsü lo tsükhutsüvai shilo, aghime lo kutuu lo, tsavipemi lakhi kümlà shi alo, eno O kümlapù pichetsüpüa keu kümtsü shi alo.

⁶ Kughengu ni ye atsaiji leqhipe mülá nikeu lakhi toi ikhiphe pe tsüvae, eno I küxü kishekhave nikeu do ye kupunúvae.

⁷ Ni ye akivishi aghü shivae, ni ye akupo lo ashe tovae, ni ye aküpülü pewo tovae.

⁸ Itehi I ghenguno achipiumikucho kütsükuqho khikhi qhipüani keno achipiu Xaküthau Ampeu no tipau tsalà lono qesaxu I tsü nani. Eno I likhi kumo ikemu pa ikighi khekulhoshi akemiqo ghí kümtsü tsü nani.

Lüthü Kükümsü Kütsü

⁹ Mtazü I lau ighi nikeu pükapütsalo,

¹⁰ kughengu Demas ye hipau yeghi lo thimeqo kimiyeve ke eno I qhive no Thessalonica lo wuvae. Crescens ye Galatia lo wuvea, eno Titus no Dalmatia lo wuvae.

¹¹ Luke likhi no I gholo ani. Mark phuluve no O gholo no I lau sasü ighilo, kughengu pa ye iw pichebekümlàpu lo I kuphulu cheni ke.

¹² I no Tychicus pesü Ephesus lo puwuvea ke.

¹³ Kughou nono ighini keno I no Troas lo Carpus gholo ubephi qhive keu ngò iw liküküzü kakuqo ti akhotoshi yeküsüpu shiyikoqo pesü ighilo.

¹⁴ Ayì kümlàu Alexander no ighono I ghimeqhi ke. Pa no kiu shivea keno Ampeu no pa lochile nani.

¹⁵ No ghí pa lau no kutokughoi alo, kughengu pa ye akumto shi ningu kükütsü sütsa lachile cheni ke.

¹⁶ I likhi I saphu keu tsa kükügha atüghiu lo, timi khumu I saphuni ke ighimoe, ikemu kümtsü no I likhi qhive ke. Alhou pelo panongu shou nguku keu shipemoniu!

¹⁷ Ikemu Ampeu no I küdau puthugho eno aküka I tsüke, tishianguno I vechewo akükütsü sütsa kümtsü asheshulu peniye eno Jewkumomiqo kümtsü pelo chilu peniye ke. Eno abongushuu baxa lono I xapheluve ke.

¹⁸ Ampeu no küsakügha jeli I ghime niye akeu kümtsü lono I xapheluve nani eno I süsho pesü paw kungugha kükaphu lo ilo nani. Pa lau alhokupuju lono alhokupuju kutólo ajuküvü ache pelo! Amen.

Ashekhau Petha

¹⁹ Petha pesü Priscilla ngò Aquila eno Onesiphorus kibolomiqo tsülo.

²⁰ Erastus ye Korinth lo ngove ke, eno Trophimus ye sǜve kehu I no Miletus lo pa qhive ke.

²¹ Süsü züu no hilau ighi nike pükapütsalo. Eubulus no petha O tsü ani, eno Pudens, Linus, Claudia eno athiküzümi ngò achelimiqo kümtsü no petha O tsü ani.

²² Alhou no O gholo ache peniu. Alhou’w küpükini nongu kümtsü gholo apeniu.