2 Tim. 3 - Sümi Tiqhelimi Bible

¹ Ikemu hipau ithi achelo: Ashekha tsalà lo kümsapu ghuloki anani.

² Timiqo ye alikhi ampi eno pisa kimiyeuve nani, alikhi ajekipi eno aqheküza shi nani eno timi phimo-gihumo nani. Panongu pù-aza hebide nani, shikimthi keu küha nani, Alhou pülümo nani,

³ kikimiye küha nani, akipimí qhitsümo nani, timi pipüsa nani, alikhi aghasükulu küha nani, ayiküsa shi nani, akivi kimiyemo nani,

⁴ pishikiqhi shi nani, chho-chhoshi nani, alikhi apülü pivi nani, Alhou kimiye kemi shini ke züqhulo aghakiqipu kimiye kemi shiuve nani.

⁵ Panongu ye Alhou sümsa ke ghili shi nani ikemu Alhou küká milive anani. Timi hitoi kemiqo lau no putosü alo.

⁶ Panongu toi kemi ye müqümgha shi püzü timi ki lo ilo no miqemilei kemi totimiqo züluve cheni. Totimi tipaqo ye axiné no qhasü pesü acheni eno küsakügha kümlà jeli kümtsü shinishi keu no müsü sawuve cheni.

⁷ Panongu ye alhokuthu shika acheni ikemu khilemu kuchou kighithi ithiluve chemoe.

⁸ Jannes ngò Jambres pama no Moses lachile ketoi, kükütsümi hipaqo ghí kuchou lachile cheni. Panongu ye shipüsa keu kükümsü xapu chekemi timiqo eno Aküpülü vehu lo kiumu ameküha ke.

⁹ Ikemu timi hipaqo shélo ye kushuwa wumo nani kughengu panongu ghüzünikha ye timi kümtsü no mütsümishei ithive nani ke.

Ashekha shi Timothy Pichetsü

¹⁰ Ikemu Timothio, no ye I kükütsü, I küxü ghola eno I kimiji kümtsü ithi ani. No ye I küpülü, iw kheakulu, iw kikimiye, iw kutuukulu ithi ani.

¹¹ I no khijehi pishi-puju eno aghimeqo sholu, eno Antioch, Iconium eno Lystra lo I lau kiu shive eno I no pishi-puju sholu kelo kutuuluve keu nono ithi anike. Tishimu Ampeu no tipaqo kümtsü lono I xaphe tsüke.

¹² Kuchou lo ye, khukhumu Khristo Jisü vechewo Alhou sümsa keu küxü xü nishi kemi ye pishi-puju nani,

¹³ eno küsaküghami ngò timi ghili kishimiqo ye alomo keu lono alomokitheuve nani, eno kütami pishiqhive keu likhi kumo no pano likhi pano pishiqhive nani.

¹⁴ Ikemu O ghengu ye nono kiu ithivea eno pülübeluvea keno tipau pape chelo kughengu no ye khunoqo lau tipaqo shikalu keno nono ti ithi anike,

¹⁵ eno no ye ití lono Kuchoyesü ithi anike eno tipau hu no O pelo Khristo Jisü shou pülü keu vechewo xakulu ithulu pe nikeu lokütsü O tsüke.

¹⁶ Kuchoyesü kümtsü Alhou no müzüsütsü keu ke eno kütsü nikeu, alomipi nikeu, shikithe tsü nikeu eno achipiumikucho lo qophe nikeu ghenguno peithakulupu ke,

¹⁷ tishianguno Alhou qe akemi pelo akümlà kivi jeli shini keu ghenguno ananu kupukülai pepulu peniye ke.