2 Tim. 2 - Sümi Tiqhelimi Bible

Qhüiniju Kithe keu

¹ Tishiaye, I nu, no ye Khristo Jisü vechewo küpükini akeu lono akumto shilo.

² Eno thopimi kutomo gizü lono I no kütsü keu thimeqo nono ithitoiluve keu hu pesü no pükhübekulumi khunoqo no kütami kütsülu nani keno tipaqo ghí pichetsülo.

³ Khristo Jisü’w ghüshimi kivi lakhi toi I ghime gholo küsaje alo.

⁴ Ghüshimi lakhi ye ghüshimi kümlà shi akelo aqha küxü lo chhosü chemoe, ikemu tishini ke züqhulo paw zatsüu pulou shini ke pükapütsa acheni.

⁵ Tihutoi, aghilimi khukhumu akukuxu lo ilo kemi ye ayeza kiqi lono kuxumo ke thaqhülo ye tokulu kütsükuqho ithulu chemoe.

⁶ Alukichimi khuu no ichhe-ime mülà acheni keno ghile ghuloki lo asaje atüghiu ithulu moayesae.

⁷ I no kiu piani keno tipau kümsükutoju lo, kughengu Ampeu no hipaqo kümtsü lo juchholu kepu O tsü nani ke.

⁸ Jisü Khristo ye akithí lono xüputhuve eno David polokughukomi kepi kümsülulo. I no piche keu tsakiviu ye hike,

⁹ hi ghenguno ni ye ayeza heküxami lakhi toi aghime shi ayikichhe no tshüpe anie. Ikemu Alhou tsa ye ayikichhe pe tshüve mülae.

¹⁰ Tighenguno ni ye kisheluve kemiqo ghenguno thime kümtsü puqheluve acheni, tishianguno panongu ghí Khristo Jisü lolo xakulu gholo lhokta juküvüpu akeu ithulu peniye ke.

¹¹ Pükhübekulu küghakiche tsa lakhi ishi ani: Ningu no pa gholo thive aye, ningu ghí pa gholo xülu nani;

¹² ningu no puqhekulu shi aye, ningu ghí pa gholo ka nani. Ningu no pa milive aye, pa ghí ningu milive nani;

¹³ ningu no aküpülüpu shimla namu pa ye aküpülüpu shi acheni kughengu pa ye pa likhi pa milive mülae.

Kichileu Kükütsümiqo Vehu lo

¹⁴ Alhou’w timiqo vilo hipaqo vehu pesü pikithe alo. Alhou zülo no panongu vilo atsa ghenguno kütsala keu vehu lo pikichi lo; tiye ameküha ke, eno chilu akemi ghüza keu likhi ke.

¹⁵ Tolukivi thaqhü O likhi O pesü Alhou lau ikhikulupu shini ke pükapütsalo. Akümlàmi lakhi ye kuchou tsa pesü achipi shi hepho-piye keu ghenguno kujove kepu kumoe.

¹⁶ Alhou sümsamo keu tsa za chekemi lau no putosüvelo, kughengu khunoqo no tishi cheni keno panongu ye alau shi Alhou sümsamo keu lo xüwuve nani.

¹⁷ Panongu kükütsü ye ayiko küsǜ pithe toi qhasü wove nani. Hymenaeus ngò Philetus pama ye tipaqo lojimiqo ke,

¹⁸ eno pama ye kuchou lau no povae. Panongu ye xülekuthu hu ye hechevae ipi cheni eno panongu no hami küpülü kütsave tsü cheni.

¹⁹ Tishiaghi namu, Alhou kumto boqha ye ithamo no athoshi aphi eno atsa hipau mekhave no hitoi küxüpuku pe püani: “Ampeu ye khunoqo no paw timi keno ithi ani,” eno, “Ampeu je pipheluve kemi kümtsü küsakügha lau no tsüghüve moayesae.”

²⁰ Aki kijè lakhi lo ye ameshoyi ngò ghükayi nhemügha likhi anike kumoe, ikemu asǜ ngò aghani pesü mülà keu ghí ani; khami no paküta keu kimiji ghenguno eno khami no inapügha peitha nikeu ghenguno ke.

²¹ Khunoqo no pano likhi pano pesü inapügha peitha nikeu lono shikimthe pe qhini keno panongu ye paküta keu kimiji ghenguno küghaküsü shi peitha nani. Panongu ye akimthe shive tsü nani eno Ampeu ghenguno peithakulupu shi nani eno akümlà kivi shini keu ghenguno kutokughoi pe qhive nani.

²² Lhothemi shi akelo küsakügha kümlà shinishi chekeu lono pove lo eno amlo kimthe shi no Ampeu vilo khu chekemiqo gholo küqha no achipiumikucho, aküpülü, kikimiye eno aloino keu phulo.

²³ Nikhanigha eno anikha kikigheqo lo chhosü kevilo, kughengu tipaqo no kiyi-muto keu süghive cheni kepi nono ithi anie.

²⁴ Eno Ampeu qemi ye kiyi-muto kepu kumoe ikemu timi kümtsü lau akümtsha shi moayesa, kütsülu kemi shi moayesa eno kutuukulumi shi moayesae.

²⁵ Mujochile chekemi vilo agholau no shika moayesae. Alhou no panongu mlo pebide tsü no kuchou ithikulupu laghi lo sawu nani kepi lajupu qhi moayesae,

²⁶ eno tishilu aye panongu ye alotsüluve no tüghami khuu no pa pulou shipe niye panongu pesü akughu shive keno pa lichhe lono pokajoluve nani.