2 Tim. 1 - Sümi Tiqhelimi Bible

¹ Yèsü hipau ye ni Paul, khuu Alhou pulou lono Khristo Jisü’w apostolmi lakhi shilu eno Khristo Jisü lolo aküxü akeu pikiqhi kiqi lono asheshu penike kishelu keno pa no yè ani.

² I no Kimiye chekeu nu Timothy lau yè ani: Apù Alhou eno ningu Mpeu Khristo Jisü’w küpükini, kimiyekini eno aloino keu O tsü peniu.

Shikimthikütsü

³ Ni ye alolo kighithi mütsümishei shi no I pù-asünoqo no qe chekeu lhou khuu I no qe acheni keno pa shikimthi ani. Ni ye putho-pucho I kighini lo tamo no O kümsülu acheni.

⁴ O nhezü kümsüchilelu no ni ye O sasü kusho nishikütü ani, tishianguno ni ye alokiqi no chhitoilu niye ke.

⁵ Ni ye O mikucho küpülü kümsülu ani. Amikucho küpülü tiye atüghishi opüza Lois gholo ache eno O zá Eunice gholo ache, eno itehi O gholo ghí ani kepi I no pülübe ani.

Paul eno Atsakiviu lau Amikucho shipe nike Qhüiniju keu

⁶ Hi ghenguno I no I u pesü O shou betsü keu vechewo O lolo Alhou no aghò O tsü keu küyiqü kithe penike ni ye O piputo ani.

⁷ Kughengu Alhou no anguagha ningu tsü keu ye ningu pelo msaichive peniye ke kumoe, ikemu aküka, kikimiye eno alikhi aghasükulupu ningu tsü cheni ke.

⁸ Tighenguno ningu Mpeu momu pa ghenguno I no akughu shikeu ghili ashepe shini keu kujo kevilo. Tishini ke züqhulo, Alhou küká vechewo atsakiviu ghenguno ime nike I gholo kutubo lo.

⁹ Pa no ningu xaluvae eno akimthe küxü lo xü penike ningu kulù ke—ningu no kiuala shilu keu ghenguno kumoe ikemu pa kimiji eno küpükini vechewo no ke. Küpükini hipau ye inahuu no Khristo Jisü vechewo ningu tsüvae,

¹⁰ ikemu itehi ye ninguw Xakuluu Khristo Jisü ipeghive keu vechewo pephe-piyevae. Ikehu Khristo Jisü no atsakiviu vechewo akithí kütsakungovae eno khilemu thivemo nikeu eno aküxü hu pesü aküvü lo süghivae.

¹¹ Eno atsakiviu hipau ghenguno ni ye kütüghükütsüu lakhi eno apostol lakhi eno akükütsüu lakhi shi süküsü shike.

¹² I no itehi ime akeu ye tipau ghenguno ke. Ikemu kujo akepu akiqi kiumu kühae, kughengu I no khuu shou pülüluvea keno I no ithi ani, eno tipau tsalà ighimo ke kutólo I no kiu pesü pa pichetsü keno pa ye tipau khekuto kulupu shi nani kepi I no pülü ani.

¹³ Nono I lau no kiu chilu keno tipau no kuchou kükütsü ghola kepi papelo eno tipau gholo aküpülü eno Khristo Jisü kikimiye lono xülo.

¹⁴ O pichetsü keu toi kuchou vehu khekuto lo. Aghungu Kimtheu khuu ningu lolo acheni keno tipau kukuphu vechewo khekuto lo.

Amikucho eno Amikucho kumo Kiche-kipiye

¹⁵ Asia bocho lo timi kümtsü no I qhive keu nono ithi ani. Tipau gholo Phygelus ngò Hermogenes pama ghí I qhive ke.

¹⁶ Ampeu pelo Onesiphorus kibolomi shou kimiyekini pìye tsü peniu, kughengu ado kutomo lono pa no I lopivi tsüke eno I no akughu shi akeu ghenguno kujo keu shimo ke.

¹⁷ Tike kumo no, kughou pa no Rome lo ighi keno pa ye I phulumo ke kutólo aghime shi I phu ke.

¹⁸ Ampeu pelo tsalà tipau lo pa lau kimiyekini pìyelu peniu! Ephesus lo pa no alaghi ajeli kutomo lono I kuphu keu nono akivishi ithi anike.