2 Thes. 3 - Sümi Tiqhelimi Bible

Akighini Qhüiniju keu

¹ Athiküzümi eno achelimiqo, Ampeu kükütsü sütsa nongu gholo toi papashi külhalu eno gihukulupu shilu penike ningu ghenguno inikhu tsü alo.

² Eno küsakügha ngò küsaküghamiqo lau no ningu xaphelu penike inikhu tsülo, kughengu timi kümtsü küpülümi kumo ke.

³ Ikemu Ampeu ye pükhübekulu ke, eno pa no nongu shikumto tsü nani eno küsaküghau lau no nongu süsho nani.

⁴ Ningu no azah nongu tsü keu thimeqo gholu aghí nani eno gholu ache nani kepi ningu ye Ampeu lono pükhübe ani.

⁵ Ampeu pelo nongu mlo kiche sasü Alhou kikimiye eno Khristo’w tsükhoi keu lo wulu peniu.

Akipichi Vehu lo Pikichi keu

⁶ Athiküzümi eno achelimiqo, Ampeu Jisü Khristo je lono küpülümi khunoqo no akipichi shi xü acheni eno nongu no ningu lau no akükütsü ithulu keu ghola lono xü chemo keno panongu lau no putosü apenike ningu no azah nongu tsü ani.

⁷ Kughengu nongu ye ningu no xüpe pìyeve keu pape moayesa kepi nolikhi nongu no ithi ani. Ningu ye nongu gholo ache kelo akipichi shimoe,

⁸ momu ningu ye ame tsümo no khiu chuqupumu chupüamo ke. Tishini ke züqhulo, ningu ghenguno nongu khiu makhomu shipemo nike ghenguno ningu ye aghime shi putho-pucho akümlà shi acheke.

⁹ Ningu ye akukuphu ithulu küzüpu kumo ke ghenguno hitoi shike kumoe, ikemu ningu vechewo akühapu lakhi shi no nongu pelo tipau kishishi shipe nikeu ghenguno ke.

¹⁰ Kughengu ningu no nongu gholo akelo nomu ningu no ayeza hipau nongu tsüke: “Timi khuu no mülà nishi chemo keno pa ye chu kepu kumoe.”

¹¹ Nongu dolo khami ye akipichi shi xü acheni eno aküküpüna süghi acheni kepi ningu no chilu ani. Panongu ye pano kümlà ghenguno mighì acheni ke kumoe; panongu ye kütami kümlà lo chhosu keu no mighì acheni.

¹² Timi hitoi keqo ye kithikiyi xüwuve no panongu no chu kepu chuqupu ghenguno mülà moayesa kepi ningu no Ampeu Jisü Khristo lono hakite ghi azah tsü ani.

¹³ Athiküzümi eno achelimiqo, nongu ye kiu no akivi keno tipau shini keu khilemu lhove kelo.

¹⁴ Khunoqo no yèsü hipau lo ninguw shikakütsü gholumo nike no tipaqo amichi shipe qhilo. Panongu pelo kujove penike panongu gholo kuloji kevilo.

¹⁵ Tishi namu aghümi lakhi toi panongu kihi kevilo, ikemu küpülümi aküsàmi lakhi vilo piakeu toi panongu vilo pikichi lo.

Kishekha Petha

¹⁶ Itehi ye alokughuno-kütsüu Ampeu pelo pa ampi no ado aghuloki kümtsü lo eno alaghi kümtsü lo aloino keu nongu tsü peniu. Ampeu no nongu kümtsü gholo apeniu.

¹⁷ Ni Paul ampi no petha hipau yè ani, eno hiye iw yèsü kümtsü lo akimchi michipu ke. Ni ye hitoi yè acheni ke.

¹⁸ Ningu Mpeu Jisü Khristo’w küpükini no nongu kümtsü gholo apeniu.