2 Thes. 2 - Sümi Tiqhelimi Bible

Aye Kümthau

¹ Athiküzümi eno achelimiqo, ningu Mpeu Jisü Khristo ighi nikeu eno ningu no pa gholo kuhokumqo nikeu vehu lo ningu no nongu qhüiniju akeu ye

² timi khunoqo no ningu kükütsü ke ipi pükha püzü Ampeu tsalà ye ighivae ipi tungkuptsa momu akichi tsa momu yèsü vechewo asheshu cheni keno tipaqo pelo mülalei nongu mlo shiküpüna momu shikümsa pe kevilo.

³ Khuu pelomu kiu laghi lonomu nongu pishiqhive pe kevilo, kughengu hekibide ipeghimo ke kutólo eno aye kümthau, khuu ashekha tsalà lo kütsakungove nani keno, pa pephe-piyemo ke kutólo Ampeu tsalà ye ighimo nani.

⁴ Pa no Alhou ipikeu jeli momu mülá chekeu thime jeli kümtsü lachile eno pa likhi pa pesü thime kümtsü shou süqhe nani. Pa no Alhou chineki lo iqave püzü pa likhi pa pesü Alhou ke ipi piwuve nani.

⁵ Kughou I no nongu gholo ache keno I no hipaqo vehu pesü nongu vilo piche keu nongu ye kümsüchilelu anima?

⁶ Eno itehi nongu ye kiu no ayeza hekibideu lakhape püani keno ithi anie. Tiye ado achipi lono pa pephe-piye nikeu ghenguno ke.

⁷ Kughengu aye kümthau tuqhou küká ye akümlà shiauvae; ikemu itehi khuu lakhape püani keno pa ikhivemoke kutólo tuqhou shi anani.

⁸ Tishive no ayeza hekibideu pephe-piye nani. Ikelo Ampeu Jisü no pa kichí tuthu no ayeza hekibideu hu pìthíve nani eno pa no qhivütsüni ighi keu vechewo ayeza hekibideu kütsakungove nani.

⁹ Ayeza hekibideu ye Satan no kíshi mülà cheni keno tipau ghola lono ighi nani. Pa no aküka jeli kümtsü peitha no akümzapu kümlà eno akichiqhipu kichileu michipu kutomo shipe pìye nani

¹⁰ Eno pühave niye shi akemiqo pishiqhive nike ghenguno küsakügha laghi kümtsü peitha nani. Panongu ye pühave nani kughengu panongu no kuchou kimiye no xalu nikeu milive ke.

¹¹ Hi ghenguno panongu pelo akimiki pülüve penike ghenguno Alhou no pishikiqhi kumto lakhi panongu lau puwu tsüke

¹² eno tishi keu vechewo kuchou pülümo no küsakügha kümlà shini keu lo alokiqishi chekemi kümtsü kiléqhive niye ke.

Ithamo no Puthugho lo

¹³ Ampeu no kimiye chekemi athiküzümi eno achelimiqo, ningu ye nongu ghenguno alhokuthu Alhou shikimthi acheni pütsá ke, kughengu Alhou no Aghungu vechewo kishekimthe keu kümlà eno kuchou lo aküpülü akeu vechewo amsüu xathi toi nongu pelo xaluve peniye kishelu ke.

¹⁴ Ningu no atsakiviu küsaje keu hipau lo pa no nongu kulù ke, tishi keu lono nongu ghí ningu Mpeu Jisü Khristo juküvü gholo küsajelu peniye ke.

¹⁵ Tishiaye, athiküzümi eno achelimiqo, ithamo no puthugho lo eno ningu no akichi tsa lono momu yèsü vechewo akükütsü tsaqo nongu tsü keqo mutotoi tsüqülulo.

¹⁶ Ningu Mpeu Jisü Khristo ampi no eno ningu Papù Alhou khuu ningu kimiye eno paw küpükini vechewo lhokta shikumtokütsü eno lajupu kivi ningu tsü keno,

¹⁷ pa pelo nongu kümlà kivi eno atsa kivi pikeu kümtsü lo nongu mlo shikumto eno nongu iqhikithe tsü peniu.