2 Thes. 1 - Sümi Tiqhelimi Bible

¹ Yesǜ hipau ye Paul, Silas eno Timothy no, Ningu Papù Alhou eno Ampeu Jisü Khristo lono Thessaloniami kukuhou lau yèlu ani:

² Apù Alhou eno Ampeu Jisü Khristo lau no küpükini eno aloino keu nongu tsü peniu.

Shikimthikütsü eno Akighini

³ Athiküzümi eno achelimiqo, ningu ye nongu ghenguno alhokuthu Alhou shikimthi ani pütsá ke, eno hiye achipi ke, kughengu nongu küpülü ye alau shi thuwukithe anie, eno nongu kümtsü no lakhi no lakhi kimiye akeu lo alau iko-ishe anie.

⁴ Tighenguno, nongu no pishi-puju keu eno peju keu kümtsü sholu akeu dolo tsükhoi shi no kutuukulu eno aküpülü pighi akeu ghenguno ningu ye Alhou kukuhou dolo ghí nongu jupe agijivilei acheni.

⁵ Hipaqo kümtsü vechewo Alhou’w küghakütha ye achipi kepi kimichitsü ani, tishi keu vechewo nongu ye Alhou kükaphu lo ilo küzüpu kepi kihitsü nani, eno tighenguno nongu ye ime anike.

⁶ Alhou ye achipiu shi cheni ke: Khunoqo no nongu ghimeqhi ani keno pa no panoqo ghime lochile nani

⁷ eno nongu ghimeqhi akemi lau no nongu likhi kumo no ningu ghí ghulu tsü nani. Hiye kughou kungugha lono vüqalei keu ami eno Ampeu’w kungumiqo kumto gholo no Ampeu Jisü pephe-piye nike no tipau tsalà lono shi nani.

⁸ Khunoqo no Alhou mtha eno ningu Mpeu Jisü tsakiviu gholumoni keno Ampeu no panoqo ghimeqhi nani.

⁹ Panongu ye alhokupuju kütsakungoi nikeu pesü ghimeqhi nani eno Ampeu gizü lono eno pa juküvü kumto lono khathapheve nani.

¹⁰ Tipau tsalà lo Ampeu’w akimthemiqo no pa juküvü shi nani eno pa pülüluve kemiqo kümtsü no pa sümsa ghi sheqhe nani. Nongu ghí hilehi kihisü ani, kughengu nongu no ningu küxü shepe nongu tsü keu pülü ke.

¹¹ Hipau amlo lo qhi no ningu ye tamo no nongu ghenguno inikhu acheni. Tishianguno ningu Lhou pelo pa no nongu kulù keu lo aküzüpu shilu, eno pa no pa küká kumto pesü nongu kivipu eno aküpülü lono akümlà shikeu kümtsü shikupulu peniye ke.

¹² Ningu no hitoi inikhu akeu ye nongu gholo Ampeu Jisü je juküvü shilu eno ningu Lhou eno Ampeu Jisü Khristo’w küpükini gholo no nongu jekipi shilu peniye ke.