2 Peter 3 - Sümi Tiqhelimi Bible

Ampeu Tsalá

¹ Kimiye chekemi shompamiqo, hiye nongu lau iw yèsü akiniù ke. Ni ye nongu pelo akükümsü akivipu lo kümsüpuku peniye nongu lau shikumto ghi pikithe akeu shi yèsü kinikujo yè ke.

² Ni ye nongu pelo wove keu lo akimthe tungkupumiqo no atsa pikeqo ngò ningu Mpeu eno Xakuluu no nonguw apostolmiqo vechewo azakütsü tsü keqo kümsüchilelu penishi ani.

³ Kümtsü nguno akhotoshi, ashekha tsalaqo lo jukünatha chekemiqo no jukünatha ghi pano likhi panow küsakügha kükümsüqo pape ghi ighi nani kepi nongu ye ithi moayesae.

⁴ Panongu no ishi pi nani, “Pa no ‘cheni’ ipi piqhipüa keu khilehi ani kea? Ningu pù-asüqo no thive kethiu, abothu lo pulhosü keu toi thowkha kümtsü titoi aphike.”

⁵ Ikemu panongu ye ithithai no khaghi Alhou tsa vechewo atsütsǘ lo akeqo lhosü eno ayeghi ye azü lono eno azü vechewo lhophe kepi kümsümave cheni.

⁶ Azü hipaqo vechewo tipau ghuloki lo ayeghiqha ghí yimive no kütsakungove ke.

⁷ Pulhosü keu tsa atho tipau vechewo itehi atsütsǘ lo akeqo ngò ayeghi ye ami ghenguno ghüpe püani, tiye küghakütha tsalà lo alhou mtha kemi kütsakungo nikeu ghenguno qhipe püani ke.

⁸ Kimiye chekemi shompamiqo, ikemu thime lakhi hipau kümsüma kevilo: Ampeu gholo atsala lakhi ye ampe 1,000 toi ke, eno ampe 1,000 ye atsala lakhi toi ke.

⁹ Timi khami no asheshi keu vethalu chekeu kiqi lono Ampeu ye pa no piqhive keu pape nike asheshive cheni küghashi kemu tishimoe. Tishini ke züqhulo pa ye nongu lau kutuukulu shi acheni, pa ye nongu khuu pelomu pühave penishimo ke, ikemu kümtsü pelo amlo pebideve penishi anike.

¹⁰ Ikemu Ampeu tsalá ye küpkami lakhi toi ighi nani. Atsütsǘ lo akeqo ye asütsa kuloghi lakhi igha no hauve nani; lhokejeli ye ami lono pitipühave nani, eno ayeghi ngò tilehi mülasüpüa keu thimeqo ye kümtsü pitipühave nani.

^11-12 Thime kümtsü hipau ghola lono kütsakungove nani ke ghenguno, nongu ye kiutoi kemi timi shi aghí moayesa kea? Nongu no khekulhoshi Alhou tsalà ighi niye akeu khe ake dolo nongu ye akimthe eno Alhou sümsa keu küxü xü moayesa ke. Atsala tipau lo ye ami no atsütsǘ lo akeqo pitive no shipühave nani, eno thime jeliqo ye akülǘ no pitikümlave nani.

¹³ Ikemu Alhou no piqhipepüa keu toi ningu ye kungugha kithé eno ayeghi kithé khile achipiu mikuchomi no ngo cheni keno tipau khekulhoshi ani.

¹⁴ Tishiaye, kimiye chekemi shompamiqo, nongu no hipau khekulhoshi anike ghenguno thowkha lo pükapütsa püzü tukutiye küha keu, nguku kepu küha keu eno pa gholo külakishi akeu phulu pelo.

¹⁵ Ningu no kimiye chekeu athiküzüu Paul no Alhou no alokütsü pa tsü keu vechewo nongu lau yè keu toi, ningu Mpeu’w kheakulu kiqi ghí xakulu kepi amlo lo qhilo.

¹⁶ Pa ye paw yèsüqo kümtsü lo hipau tho ghola lono panoqo vilo hipaqo vehu ghili pi ghi yè ke. Paw yèsüqo lo thime hami akeqo ye vethalu nikeu lo ighono kushokütsü ke, tipau ye kümthami ngò a-a shimo kemiqo no Kuchoyesü kütauqo lau shiche ketoi panongu likhi panongu kütsakungo ghi tuchighi cheni ke.

¹⁷ Tighenguno, kimiye chekemi shompamiqo, nongu ye azüu no pikichivea ke ghenguno, nongu likhi nongu khekuto lo tishianguno ayeza hekibidemiw shikipimi pelo nongu müsü sasü wuve pemo eno nonguw mutotoi keu-a lono ikiqive pemo niye ke.

¹⁸ Ikemu ningu Mpeu eno Xakuluu Jisü Khristo’w küpükini eno pa kighithi lono thuwu alo. Itehi eno alhokupuju lo pa juküvü shilo! Amen.