2 Peter 2 - Sümi Tiqhelimi Bible

Kichileu Kükütsümi eno Panonguw Kütsakungo Keu

¹ Ikemu timiqo gholo ghí kichileu tungkupumiqo acheke, tihutoi nongu gholo ghí kichileu kükütsümiqo anani ke. Panongu no tuqhou no achineye hekibide kütsakungo keu kilethi nani, panongu ye panongu xachilelu keu Akughushu Mpeu kutólo milive nani—eno tipau no panongu likhi panongu shou paikhavi kütsakungo keu süghive cheni.

² Kutomo no panonguw shiküpsa süqeghili pape nani eno aju-aje küküha pesü kuchou laghi lo süghi nani.

³ Kükütsümi hipaqo no panongu lakimine ghenguno alaphasü keu xüghiliqo pesü nongu peithaqhi nani. Panongu kiléqhive keu ye püzüu no panongu shou pufu pe ani, eno panongu kütsakungo kepu shi akeu ye zü anike kumoe.

⁴ Kughengu kughou kungumiqo no axiné shive keno Alhou ye panongu kipimí qhitsümo no amiyizü lo sǘve eno küghathabe nike ghenguno àküzǘ yikichhe pesü panongu tshüpe qhive cheni aye;

⁵ kughou pa no alhou kümthamiqo lau atshünazü kuqo süghi püzü khaghi yeghilomiqo kipimí qhitsümo no Noah, achipiumikucho kükütsüu lakhi, eno kütami tsüní süsholu aye;

⁶ pa no Sodom ngò Gomorrah mishighüna küma piti pesü ayevǜ kughulhove no kiléqhive eno alhou kümthami lau kiu shive nani keno panongu vechewo kiche-kipiye shi aye;

⁷ eno pa no Lot, amikuchomi lakhi, khuu ayeza hekibidemiw süqeghili ghenguno aghime kitikhi shive keno pa xalu aye

⁸ (kughengu amikuchomi timi tipau ye ayeza pemo kemi gholo tsalà kipetsü xü no pa no ayeza pemo keu kümlàqo ithulu eno chilu keu no pa mikucho ngulho ghimeqhi ke)

⁹ tsalá ishi aghí aye, Ampeu ye kíshi no peju keu lono alhou sükümsami xalu nani keno ithi ani eno kíshi no küghakütha tsalà lo amikucho kumomi ghimeqhi nani keno ithi ani.

¹⁰ Hiye akhotoshi khunoqo no ashi lo shikuchubeve keu shinishiqhiyi eno thaigha keu kükagha pape cheni keno panongu ghenguno ke. Panongu ye amlo kumto eno akuchhoma ke, panongu ye kungugha lo küamiqo shou pipütha puku nikeu lo msà chemoe;

¹¹ tishiaghimu kungumiqo ye panongu nguno akumtou eno aküka küau keghi kughou panongu shou küghakütha süghini keno Ampeu zülo panongu shou thaigha keu tsa pesü pipuku chemoe.

¹² Ikemu kichileu kükütsümi hipaqo ye panongu no vethamla keu vehuqo pipütha cheni. Panongu ye kiqiju chemo keu lhoxüqo toi ke, panongu ye akutoshikighithi lhoxüqo toi ke, lhoxü tipaqo ye küghaluve no ghiqhive nikeu ghenguno lhosü ke, eno lhoxüqo toi panongu ghí pühave nani.

¹³ Panongu ye panongu no shiküpüsa kümlà shive keu ghenguno shiküpüsa pesü lochile nani. Atsala küvü lono aji kushoki lo ngo keu no panongu lopivilu cheni. Panongu ye aju-aje küsa eno tukutiye akemiqo ke, eno panongu ye nongu gholo aghulhu shi ake lono panonguw pishikiqhi lo alovilu cheni.

¹⁴ Shupu nikeu kükümsü no panongu nhethi chhitoi eno panongu ye axiné shini keu khilemu tave chemoe; panongu ye a-a shimo kemi saküghüzü cheni; panongu ye alakimine lo shitsa ke—müsüini keu tiqo ke!

¹⁵ Panongu ye müzüchoi keu laghi qhive no Balaam nu Bezer, khuu küsakügha jume kimiye cheni keno, pa laghi pape niye kawuvae.

¹⁶ Ikemu pa ye paw achipikumo kümlà ghenguno khurha no alomipi ke—atsa pichemo keu lhoxü no timi sütsa lono atsa pi no tungkupuu ghüzünikha lakhave ke.

¹⁷ Timi hipaqo ye azü küha keu züpuki ke eno pasapagha no akimhi fupe wuve ketoi ke. Panongu ghenguno àküzǘ kuthò ghüpe püani.

¹⁸ Kughengu panongu kichí ye abokümsa ngò aqheküza tsaqo likhi ke eno ashi lakimine kükümsü ghenguno khunoqo no shikipimi küxü lo xüache püzü tipau lono akushukulu pokajosü wucheni keno tipaqo müsü cheni.

¹⁹ Panongu no timiqo vilo khaqhiphe tsüní keu piqhi cheni, ikemu panongu ampi ye küsakügha qüaxemiqo ke—kughengu “timi ye kiu no panongu mpeu shivea keno tipau qüaxeu ke.”

²⁰ Panongu no ningu Mpeu eno Xakuluu Jisü Khristo ithi akeu vechewo shikuchubeve keu yeghiqha lono pokajoluve aghí no itaghi tipau lo kitimeve no tipau no panongu qhasüve aghí aye, panongu ye hukuthu lo kiutoi akeno ashekha lo ye tinguno vimokitheuve anike.

²¹ Panongu ghengu ye achipiumikucho laghi ithive no panongu zübo pe panongu lau kiye ighi keu akimthe zakütsü tsü nike züqhulo panongu ye achipiumikucho laghi mtha keu pavini cheke.

²² Panongu ghenguno aholetsa hipaqo ye kuchou ke: “Atsǜ lakhi ye pa no mughuve keu idechile wo chu cheni,” eno, “Awoqu lakhi ye azü kuchhuve no aniba lo idewo ihiwuve cheni.”