2 Peter 1 - Sümi Tiqhelimi Bible

¹ Yesǜ hipau ye Simon Peter, Jisü Khristo qeu eno apostol lakhi no, Khunoqo ningu Lhou eno Xakuluu Jisü Khristo chipiumikucho vechewo ningu toi aküpülü ithuluve no akughupu shi ani keno tipaqo lau yèlu ani:

² Alhou eno ningu Mpeu Jisü kighithi akeu vechewo küpükini eno aloino keu kupukuno shi nonguw shilu peniu.

Kulù eno Kishelu keu lo Shikumto Keu

³ Khuu no ajuküvü eno akivipu lo ningu kulù keno ningu no pa ithi aghí keu kighithi vechewo Alhou küká no ningu no alhou sümsa keu küxü xü nikeu ghenguno avehupu shi akeu kümtsü ningu tsüvae.

⁴ Hipaqo vechewo pa no paw ighono kijè eno akughupu pikiqhi ningu tsüvae, tishi keu lono tipaqo vechewo nongu pelo ayeghiqha shikuchubeve chekeu küsakügha shinishiqhiyi chekeqo lono pokajoluve no Alhou lhoaye gholo küsajelu peniye ke.

⁵ Hipau kimiji vehu ghenguno, thowkha lo pükapütsa azükini shi püzü nongu küpülü gholo akivipu; eno akivipu gholo akighithi;

⁶ eno akighithi gholo alikhi aghasülu keu; eno alikhi aghasülu keu gholo tsükhoi keu; eno tsükhoi keu gholo Alhou sümsa keu;

⁷ eno Alhou sümsa keu gholo lakhi no lakhi lau ivüilai keu; eno lakhi no lakhi lau ivüilai keu gholo kikimiye süküqha lo.

⁸ Kughengu tsalá nongu no ameküa hipaqo kighishe ghi pighi aye, tipaqo no nongu no ni Mpeu Jisü Khristo ithi akeu kighithi pelo shekichile eno mülàphekulupu shimove nikeu lau no nongu putosü pe qhi nani.

⁹ Ikemu khuno no tipaqo küha keno panongu ye jukuchho küha kemi eno anhethi kighichemi ke, panongu ye panonguw wove keu xinéqo lono mitheluvea kepi kümsümave cheni.

¹⁰ Tighenguno, I thiküzümi eno I chelimiqo, thowkha lo pükapütsa no nonguw kukulu eno kishekulu shikumto nike azükini shi alo. Kughengu nongu no hipaqo shi aye, nongu ye khilemu küpüxalumo nani,

¹¹ eno nongu ye ningu Mpeu eno Xakuluu Jisü Khristo’w lhokta kükaphu lo ahukülü shi nongu sasü nani.

Kuchoyesü lo Tungkuptsa

¹² Ike nongu no tipaqo ithi aghí namu eno nongu no itehi kuchou pighi akeu lo ithamo no ngo aghí namu ni ye alhokuthu nongu vilo thime hipaqo ghili pikithe anani.

¹³ I no aphiki phimpi hipau lo xü ake thaqhülo nonguw mlopite ghüthipüxü tsü nikeu ye achipi kepi ni ye kümsülu ani,

¹⁴ kughengu I no ithi akeu no ningu Mpeu Jisü Khristo no I vilo mütsümishei pìyeve ketoi, ni ye ado kushuwa kumo lo hipaqo akou qhive nani.

¹⁵ Eno ni ye thowkha lo pükapütsa azükini shi püzü I no wuve kethiu nongu pelo alhokuthu thime hipaqo kümsülu ache penike pükapütsa nani.

¹⁶ Kughengu kughou ningu no ningu Mpeu Jisü Khristo no aküka lono ighi nikeu ghili pesü nongu vilo pi keno ningu ye amqükini shi akukughu shikeu xüghili papemo ke, ikemu ningu ye ningu nhethi no pa kükanguaghaw thopi shikeqo ke.

¹⁷ Kughou Akükanguagha Juküvü lono pa lau asütsa ighino, “Hiye I Nu, I no kimiye chekeu ke; pa lau I lokiqi acheni,” ishi pi keno tile no pa ye Apù Alhou lau no agigihu eno ajuküvü ithulu ke.

¹⁸ Kughou ningu no akimthe naghuto lo pa gholo ngoa keno ningu ampi no kungugha lono asütsa ighi keu chilu ke.

¹⁹ Ike ningu gholo qhoi pükhükulupu tungkupu kükütsü tsa ghí ani, eno àküzǘ-a lakhi lo aküvü lakhi no vüqai ake toi eno atsala vüipeghi no inaqhe yepu no nongu mlo lo yepüvü moke kutólo nongu ye hipau lo amlotsüqhiyi shi nani ke.

²⁰ Kümtsü nguno alau, Kuchoyesü lo tungkuptsa lakhimu tungkupumi no lhepiye nishi keu gholau no ighi pe püamo kepi nongu ye vethalu moayesae.

²¹ Kughengu tungkuptsa ye khilemu timi pulou lono hukuthu shi ighi püamoe, ikemu tungkupumiqo ghí timi shi anamu Aghungu Kimthe no mijetsü keu vechewo Alhou lau no ighi keu tsape pi cheni ke.