2 Kor. 9 - Sümi Tiqhelimi Bible

¹ Ampeu’w timiqo lau tsükini kümlà hipau shi moayesa keu vehu lo ni ye nongu lau yè akepu kühae.

² Kughengu nongu no kuphu nishiqhiyi achekeu I no ithi ani, eno wove keu mpe lono nongu Achaia lo akemi no tsü nikeu kutò pe akeu pesü Macedoniamiqo vilo pi no I kijuvilei shi acheni ke; eno nonguw pulopiniyi keu hu no tsü nikeu lo timi kutomo hakutholuvae.

³ Ningu no nongu ghenguno agijivilei achekeu vehu hipau lo kümsá shiva kepi pipemo no panongu vilo pikeu toi nongu pelo kutokughoiluve penike ghenguno I no athiküzümiqo nongu lau puwu ani.

⁴ Kughengu Macedoniamiqo khiuala I gholo ighi püzü nongu no kutokughoimove aghí keu ithulu aye ningu ye kiumu pi kepu kühave nani eno ningu no nongu shou pülükibe kijè achekeu ghenguno nongu nguno alau ningu no akukujopu shive nani ke.

⁵ Ikehu I no hipau akhotoshi kümsülu keu no athiküzümiqo pelo azüu no nongu xuju no nongu no tsükini ghò piqhipüa keu kutokughoive aghí penike I no panoqo hakite ke. Tishianguno nhenheshimo no tsünishiqhiyi tsü keu vechewo aghò kutope püaghi peniye ke.

Tsükini shini keu Shikumto

⁶ Hipau kümsülulo: Khuno no aghulo xusüni keno aghulo likhi xolu cheni, khuno no kutomo xusüni keno kutomo xolu cheni.

⁷ Pulomoqhiyi keu momu tsümomo tsülo pikeu ghenguno kumo no nongu lakhi-khi no kiu tsüní kepi nongu mlo lo xathavea keno tipau tsülo, kughengu Alhou ye amloqiqhiyi tsü kemi kimiye cheni.

⁸ Eno Alhou ye kupukuno shi nongu kümgha tsülu nani, tishianguno thowkha kümtsü lo eno ado aghuloki kümtsü lo nongu no avehupu shikeu kümtsü aghílu pe nani eno nongu ye akümlà kivipu kümtsü lo kupukuno shi küsajelu nani.

⁹ Hitoi yèpüani: “Panongu no kümsá lono panonguw aghòqo pesü kumlhomiqo lau küsaje tsüke; pano chipiumikucho ye alhokupuju ache nani.”

¹⁰ Alhou khuu no apitì yisü kemi lau apitì tsü cheni eno achuqupu ghenguno asho tsü cheni keno pa no nongu lau ghí tsü nani eno nongu pitì pekütsüpüa keu thuwulu eno kighishelu pe nani eno nongu chipiumikucho hu kupukuno shi ghile hulu pe nani.

¹¹ Nongu pelo alaghi jeli thowkha lo alá shilu pe nani eno tishi keu vechewo atüqhüdo kümtsü lo nongu ye tsükinimi shilu pe nani, eno ningu vechewo nonguw tsükini hu no Alhou lau shikimthi tsü keu shilu nani.

¹² Nongu no akümlà hipau shi akeu ye Ampeu’w timiqo no avehupu shi akeu lo likhi tsüpuwu anike kumoe, ikemu panongu pelo ajeli kutomo lono Alhou lau alokivishi shikimthi tsü keu qochili ipeghilu pe anike.

¹³ Kughengu nongu no akümlà hipau vechewo nongu likhi nongu kimchive tsü ake, eno nongu no Khristo tsakiviu ikhilu keu gholo aghokulu shikeu eno nongu no tsükini shikeu vechewo panongu sasü eno kütami kümtsü sasü küsaje keu ghenguno kütamiqo no Alhou sheqhe tsü nani.

¹⁴ Eno panongu no nongu ghenguno akighini shi kelo Alhou no küpükini vekiye ghi nongu tsüpüa keu ghenguno panongu mlo kuchou no inikhu nani.

¹⁵ Alhou no paw pikhakümlapu ghò tsü keu ghenguno pa shikimthi ani nolo.