2 Kor. 8 - Sümi Tiqhelimi Bible

Ampeu’w Timiqo ghenguno Pekütsü keu

¹ Athiküzümi eno achelimiqo, ningu ye Alhou no Macedonia kukuhouqo lo küpükini tsü keu ghili nongu pelo ithi penishi ani.

² Ighono paküta keu pekuju sholu anamu panonguw alokiqi yeli keu eno ighono kumlhomi shi anamu panongu ye kupukuno shi pephetsü keu hu no qochili ipeghi ke.

³ Kughengu panongu ye panongu no tsükulupu qhemi eno panonguw shikulupu veche ghi tsüke ipi I no ashepe shi ani. Panongu ye alokümsü shi

⁴ Ampeu’w timiqo lau akümlà hipau shini ke adokivi küsaje peniye ningu lau qhüiniju ke.

⁵ Eno panongu ye ningu no laju akeu vekiye ghi tsüke: Panongu no atüghishi Ampeu lau pano likhi panongu ikhiphe pe tsüke, tisheno Alhou pulou lono ningu lau ghí pano likhi panongu ikhiphe pe tsüke.

⁶ Ikehu Titus no püzüu akümlà huthuphe tsü keu toi, nongu sheamzü lo ghí küpükini kümlà hipau asheho tsüpe niye ningu no nongu qhüiniju ani.

⁷ Ikemu nongu no aküpülü lo, atsapi lo, akighithi lo, pulopiniyi keu lo eno ningu no kikimiye nongu lolo küyiqü tsü keu thowkha kümtsü lo akiqheu shi akeu ghenguno tsükini-jekini kümlà hipau ghí akiqheu shini ke jukuto lo.

⁸ Ni ye nongu vilo azah tsü amoe, ikemu kütamiqow pulopiniyi gholo kimghi keu vechewo ni ye nonguw kikimiye mikucho peju nishi anike.

⁹ Kughengu nongu no ningu Mpeu Jisü Khristo’w küpükini ithi anike. Pa ye kiními shi anamu nongu ghengu kumlhomi shive ke, tishi keu lono pa thokha vechewo nongu pelo kiními shilu peniye ke.

¹⁰ Avehu hipau lo nongu ghenguno kiu no akiviu keno tipau lo iw xakütha ye hike. Wove keu mpe lo nongu ye atüghishi tsü keu likhi kumoe ikemu nongu ye tipau shinishi ake.

¹¹ Ikehu akümlà ashé tovelo, tishianguno nongu no puloniqhiyi mülà nishi akeu gholo nongu no akeu qhemi lono akümlà mülaqhilu peniye ke.

¹² Kughengu timi lakhi no puloniqhiyi tsünishi aye Alhou ye timi tipau no küha keu kumo püzü pa no kiu aghí no tsüní keno tipau ikhilu tsü nani.

¹³ Ningu pulou ye kütamiqo makho kümthüve tsü püzü nongu makho kimshive tsü nikeu kumoe, ikemu achipiu shipe niye ke.

¹⁴ Nongu no itehi pofushi akeu pesü panongu no kiu avehupu shi ani keno tsüpuwu kepue, tishianguno ighi nikeu lo panongu no pofushi akelo nongu no kiu avehupu shini keno tsüpuwu nani ke. Hipau kimiji ye achipiu shi anikeu ke,

¹⁵ kughengu ishi yèpüani: “Timi khuu no kutomo kichekütsülu keno pa ye kutomo kütü aghimoe, eno khuu no kitila kichekütsülu keno pa ye kitila kütü aghimoe.”

Titus pelo Qhakütsü püakeu Süghi penike Puwu

¹⁶ Alhou shikimthi ani, I no nongu ghenguno alomsü akeu toi Alhou no Titus mlo lo ghí alokümsü tipau sǘ tsüke.

¹⁷ Kughengu Titus ye ningu no qhüiniju keu ikhilu tsü keu likhi kumo püzü pa ye shishe pulopiniyi shi no pa likhi pa no alokümsü shi nongu lau cheni.

¹⁸ Eno ningu no pa gholo athiküzüu khuu atsakiviu pikülha keu ghenguno akukuhoqo kümtsü no sheqhe acheni keno tipau puwu ani.

¹⁹ Tinguno alau, ningu no Ampeu ampi gihu eno ningu no kuphu nishiqhiyi akeu pephe-piye nike ghenguno akümlagho pe chekeu lo akukuhoqo no pa pelo ningu gholo aküsa shipe nike kishelu ke.

²⁰ Kümsá ghò hipau peitha keu vehu lo timi pelo ningu pipüsa keu shipemo niye ningu ye kutokupui ani.

²¹ Kughengu ningu ye Alhou zülo likhi kumo no timi nhekithe lo ghí kiu no achipiu keno tipau shini ke aghime shi mülà acheni ke.

²² Hipau gholo küqha ghi ningu no athiküzüu lakhi panongu gholo puwu ani. Pa ye alaghi jeli thowkha lo pulopiniyi achekeu ningu no kimchilu ke, eno pa ye nongu shou pükhükibe kijè akeu ghenguno itaghi alau pulopiniyi keu ani.

²³ Titus shélo ye, pa ye I sasü kuloji ache kemi eno nongu gholo mülà küqha ache kemi ke; eno ningu thiküzümiqo shélo ye, Khristo juküvüpu ghenguno akukuhouqo no panongu kishepuwu kemiqo ke.

²⁴ Tighenguno timi hipaqo lau nonguw kikimiye eno ningu no nongu jupe agijivilei chekeu kiqi mütsüqhei pephe tsülo, tishianguno akukuhouqo pelo tipau ithukulupu shipe nike.