2 Kor. 7 - Sümi Tiqhelimi Bible

¹ Tighenguno kimiye chekemi shompamiqo, ningu ye pikiqhi hipaqo ani kehu Alhou gihu keu ghenguno thowkha lo akimthe kupukülai shini ke aphimpi ngò aghungu shikuchubeve chekeqo thime kümtsü lau no ningu likhi ningu shikimtheveni nolo.

Akukuhou no Amlo Pebideve keu lo Paul Lokiqi

² Nongu mlo lo ningu ghenguno a-a kutò tsülo. Ningu ye khumu akipimí tsüpe püamo, ningu ye khumu shikuchube pe püamo, ningu ye khumu peithapüsa pe püamoe.

³ I no hi piakeu ye nongu kiléqhive nike ghenguno kumoe; I no püzüu pive keu toi nongu ye ningu mlo lo acheni eno xü kepu shina thive kepu shi namu ningu ye nongu gholo ani.

⁴ Ni ye ighono khaqhilei shi nongu pütsavae; eno ni ye nongu jupe shishe agijivilei acheni. Nongu no aloqhi I shikumtovae; ikehu niw shiluküsaqo kümtsü lo I lokiqi shi acheni.

⁵ Kughengu kughou ningu no Macedonia lo ighi keno, ningu ye akulhoqhimoe, ikemu alaghi jeli thowkha lono ningu pünaqhi ke. Tiye ashou no kichighi eno mlo alou no akümsa ake.

⁶ Ikemu aghithisüve kemi lokughuno tsü chekeu Lhou no Titus ighi keu vechewo ningu lokughuno tsüke,

⁷ eno pa no ighi keu ghengu likhi no kumoe ikemu nongu no pa lokughuno tsü keu ghenguno ghí ke. Nongu no I khelo akeu, nongu mloghuju shi akeu, nongu no aghüiloqhi I ghenguno alomsü akeqo vehu pesü pa no I vilo pike, ikehu ni ye püzüu nguno shishe alokiqishi acheni.

⁸ Tsalá iw yèsü no nongu mloghimeve tsü aghí namu, ni ye tipau kümsüchile amoe. Iw yèsü no nongu ghüza püani kepi I no kümsüchile aghí namu, tiye ado ikhonhei ghenguno ke.

⁹ Tishiaghimu ni ye alovi ani, tiye nongu mloghimeve tsü keu ghenguno kumoe, ikemu nongu mloghimeve tsü keu hu no nongu pelo amlo pebidelu pe ke. Kughengu nongu ye Alhou no shipe nishi akeu toi amloghime shike ikehu ningu vechewo kiu laghi lonomu nongu ghüza püamo ke.

¹⁰ Alhou lau no ighi keu mloghime ye amlo pebidelu keu süghi cheni eno tipau no xakulu laghi lo sawu cheni eno kiumu kümsüchile akepu qhitsü chemoe, ikemu ayeghilomi ghola mloghime ye akithí süghi cheni.

¹¹ Alhou lau no ighi keu mloghime no nongu lolo kiu lhophetsü keno julo: tiye pulopiniyilu pe, achipi kumomi lau no putosülu pe, achipikumo shive keu lo aghaidelu pe, msàqhiyilu pe, kusholu nishiqhiyilu pe, alomsülu pe, achipiu shipe nike jukutokughoilu pe. Hipau vehu lo nongu ye nolikhi nongu ye pimi püamo kepi alaghi thowkha lono mütsüqhei pìyevae.

¹² Ikehu I no nongu lau yèsü yè kemu tiye khuu no achipikumo shi keno pa ghenguno yèmoe momu izave kemi loji ghenguno yèmoe, ikemu nongu ye kíshi ningu lau alokiqishi acheni keno Alhou zülo nolikhi nongu no ithulu kepu shilu peniye ke.

¹³ Hipaqo kümtsü vechewo ningu shikumtove tsüae. Nilikhi ningu shikumtolu keu gholo no ningu ye akhotoshi nongu kümtsü no Titus ngulho ghüthipüxü tsü keu vechewo pa no alokivishi akeu ithulu no alokiqishi ani.

¹⁴ Ni ye nongu jupe I kijuvilei akeu pesü pa vilo pike eno nongu ye I shikukujovemo ke. Ike ningu no nongu vilo pikeu kümtsü kuchou ketoi ningu no nongu ghenguno Titus lau agijivileilu keu ghí kuchou kepi kimichitsülu ke.

¹⁵ Kughou nongu kümtsü no aghokulu shikeu, akümsa eno khokhoshi pa ikhilu keu kümsüchilelu keno pa ye nongu ghenguno alau ivüilai auvae.

¹⁶ Ni ye nongu shou pükhübekulu mütsümishei akeu lo alokivishi ani.