2 Kor. 6 - Sümi Tiqhelimi Bible

¹ Ningu kümtsa Alhou kümlà shi ani kehu ningu no nongu qhüiniju akeu ye Alhou’w küpükini ithulu keu adou shitsü kevilo.

² Kughengu pa no ishi pike, “I no qhuivülai kepu ghuloki lono nongu sütsa chilutsü ke, eno xakulupu tsalà lono I no nongu kuphutsü ke.” Julo! Alhou’w qhuivülai keu ghuloki ye itehi ke, xakulupu tsalà ye itehi ke.

Paul Ghimeqo

³ Ninguw pichebekümlà pipüsa pemo niye ningu ye timi khuu ghengu nomu apukhu küpüsüpu shimoe.

⁴ Tishini ke züqhulo, ningu ye Alhou qemiqo ke ghenguno ningu likhi ningu pesü alaghi thowkha lo kiche-kipiye shi acheni. Tiye aküpünaqo, aghime jeli eno amloküsa sholu kelo shishe kutuukulu shi cheni.

⁵ Ni heqhi püani, akughu shipüani eno mtomushu keu sholu püani, aghime shi mülà püani, aküzǘ kihí eno akhüava shipüani.

⁶ Ningu ye amikucho, vethakulu, kheakulu eno küpüqhiyi keu, Aghungu Kimthe eno amikucho kikimiye vechewo nilikhi ni kimchitsü cheni.

⁷ Ningu ye amikucho shi kuchou kütsü cheni. Alhou küká ye nilo lo mülà ani. Aghüshini ke ghenguno ni-u ajeu achipiumikucho ghünanu pe cheni eno süshoni ke ghenguno ni-u piyiu achipiumikucho ghünanu pe cheni.

⁸ Ningu gihu aghí na gihumove aghí namu, ningu pipivi aghí na pipüsave aghí namu ningu ye Alhou qe acheni. Ningu ye amikuchomi kemu timi ghili kishimi toi kihi acheni.

⁹ Ningu ye aqha no ithi kemi ikemu jupicheve acheni; thiuve cheke toi ikemu xü acheni; ningu heqhi ke ikemu pìthívemoe;

¹⁰ amloghimepu shi anamu alhokuthu alovishe acheni; athokha kemu kutomo pelo kiními shilu pe cheni; kiumu küha kemu thowkha kümtsü pighilu acheni.

¹¹ O Korinthiamiqo! Ningu ye qhaqhilei shi nongu pütsa ke, eno nongu lau ningu mlo kümtsü khaqhi ke.

¹² Ningu ye nongu lau no ninguw kimiyeqhiyi keu süchileve amoe, ikemu nongu ye ningu lau no nonguw kimiyeqhiyi keu süchileve anie.

¹³ I nuliqo vilo pi ake toi ni ye nongu vilo pi anike, ningu toi nongu ghí amlo kümtsü khaqhilo.

Ajulho Lhou Kümlá Vehu lo Pikichi keu

¹⁴ Pülümo kemiqo sasü kuokhasü lakhi shi kevilo. Achipiumikucho ngò küsakügha küma ye kiu lono aqǘ shikepu ani kea? Momu aküvü ye àküzǘ sasü kiu lono kuposhu kepu ani kea?

¹⁵ Khristo ngò Belial küma dolo kiu küqhakulupu ani kea? Momu küpülümi lakhi ye pülümo kemi lakhi sasü kiu lono aqǘ shikepu ani kea?

¹⁶ Alhou’w achineki ngò ajulho lhouqo dolo kiu puloküqha kepu ani kea? Kughengu ningu ye xü akeu Lhou chineki ke. Kughengu Alhou no ishi pivae: “I no panoqo lolo xü nani eno panoqo gholo cheche nani, eno I no panongu Lhou shive nani, eno panongu no iw timi shive nani.”

¹⁷ Tighenguno, “Panoqo lau no ipeghivelo eno kütüta shivelo, ipi Ampeu no pike. Mithekumo thimeqo bu kevilo, eno I no nongu ikhilu nani.”

¹⁸ Eno, “I no nongu papù shive nani, eno nongu no I nu eno I ngaqo shive nani, ipi Akughushuu Ampeu no pike.”