2 Kor. 5 - Sümi Tiqhelimi Bible

Aphimpi Kithé Ngokhe akeu

¹ Kughengu ningu no ithi akeu no ningu no ayeghi lo ngo chekeu ki shipüsave aye ningu ghenguno Alhou lau no ighi keu ki lakhi anie, tiye kungugha lo lhokta ki lakhi ke eno aki tipau ye timi u no mülà keu kumoe.

² Tishi ake dolo ningu ye kungugha phimpi pepu nishi kelau no aküsǜ ghügha igha acheni,

³ kughengu kughou ningu no kungugha phimpi pepu luveni keno ningu ye aphi kümsá shimove nani.

⁴ Ningu no ningu phimpi phiki hipau lo akelo ningu ye amakho kimshi láu no aküsǜ ghügha igha acheni, ningu ye ayeghi küxü phimpi xaqhive nishi keu ghenguno kumo ikemu kungugha lo nikungoki lo auve nishi yé ke, tishianguno thiveniküau hu ye aküxüpu no munove peniye ke.

⁵ Ike Alhou no hipau kimiji ghenguno kutophe ke, eno kiu ighi niye ani keno tiye ighini pütsá ipikeu shi Aghungu Kimthe pesü ningu tsüke.

⁶ Tighenguno ningu no alhokuthu lo pülüqhiyi eno ithi achekeu ye ningu no aphimpi hipau lo xü ake thaqhülo ningu ye Ampeu lau no putosü pe acheni ke.

⁷ Kughengu ningu ye ithulu akeu vechewo kumo no aküpülü vechewo xü cheni.

⁸ I no piakeu eno ningu no pülüqhiyi akeu ye aphimpi qhive no Ampeu gholo aní keu no ningu pulou ke.

⁹ Tighenguno ningu ye ayeghi lo xü aghí na tipau qhive aghí pinamu pa pulou shini keu no ningu kimiji shi cheni.

¹⁰ Ningu lüthü lakhi-khi no ayeghi phimpi hipau lo ache kelo akivi kümlà momu alhoküsa kümlà mülàpüa keu jume ithulu penike ghenguno ningu kümtsü Khristo küghakütha lakhü zülo ighi moayesa nani.

Külakishi Pichebekümlà

¹¹ Ikehu ningu ye Ampeu sümsa keu ye kiu keno ithive ake ghenguno ningu ye kütamiqo pütsaqhi nike pükapütsa acheni. Ningu ye kiu keno Alhou zülo ye mütsümishei ke, eno I no pülü akeu ye nongu lolo kighithi ghí mütsümishei anike.

¹² Ningu ye itaghi nongu lau ningu likhi ningu akishé tsü niye shi anike kumoe, ikemu nongu pelo ningu ju pesü agijivilei apenike adokivi lakhi nongu tsü anike. Tishi keu vechewo nongu pelo khunoqo no amlo lo akeu kumo no ithukulu thime shou pükhü pesü agijivilei acheni keno tipaqo khochilelu peniye ke.

¹³ Timi khami no piche ketoi ningu no “küghüzümi ghola shive,” aghí aye, tiye Alhou ghenguno ke; ikemu ningu kükümsü achipi lo aghí aye tiye nongu ghenguno ke.

¹⁴ Kughengu Khristo kikimiye no ningu tshüpe anie. Timi lakhi no kümtsü ghenguno thive ke, ikehu timi kümtsü aqau küxü lo ye thivae ipi ningu no pülü cheni.

¹⁵ Eno Pa no kümtsü ghenguno thive keu ghenguno xü akemiqo ye panongu likhi panongu ghenguno xü akepu kumoe ikemu panongu ghenguno thive no xülethughive keu ghenguno xü moayesae.

¹⁶ Ikehu ningu ye ayeghilomi gholau no timi khiumu chheju chemovae. Ghuthu lakhi ye ningu no hipau ghola lono Khristo chheju che kemu ningu ye tishi chemovae.

¹⁷ Tighenguno, timi khukhumu Khristo gholo xükimeluve aye pa ye lhoxü kithé shiluvae: Aqau ye wovae eno akitheu ighivae!

¹⁸ Hipaqo kümtsü Alhou lau no ighike, pa no Khristo vechewo pa likhi pa pesü ningu sasü külashiluve püzü külakishi pichebekümlà pesü ningu tsüke.

¹⁹ Ike tiye hike, Alhou no timiqo ghimeqhi nike ghenguno axiné kihikülai tsü keu shimo no Khristo vechewo ayeghilomi sasü külashilu ke. Eno pa no külashilu keu kükütsü sütsa pesü ningu lau pichetsüke.

²⁰ Tighenguno ningu ye Khristo’w lashikamiqo ke. Alhou no ningu vechewo pa ampi no nongu qhüiniju akeu kumlho ke. Ningu no Khristo züqhu shi nongu qhüiniju ani: Alhou lau külashiluve lo.

²¹ Khristo ye axiné kühae, ikemu Alhou no pa pesü ningu ghenguno axinemi kughulhove tsüke, tishi keu lono ningu pelo pa gholo küqha pe akeu vechewo Alhou’w achipiumikucho küsajelu peniye ke.