2 Kor. 3 - Sümi Tiqhelimi Bible

¹ Ningu ye itaghi nilikhi ni sheqhe thuvea keshea? Momu timi kütami toi ningu ye nongu lau no momu no küdau no ashepe kütsü yèsüqo avehupu shi ani keshea?

² Nongu ampi no ninguw yèsü ke. Yesǜ hipau ye ningu mlo lo yèpüani püzü kümtsü no ithi ani eno philuvae.

³ Nongu ye ninguw pichebekümlàw visavili ke eno Khristo lau no ighi keu yèsü lakhi kepi pìye ani. Yèsü tiye akiyezü no yèpüamoe ikemu xü akeu Lhou Ghungu no yèpüani eno tiye atu lipha shou kumo no timi mlo liphaqo lo yèpüani ke.

⁴ Ningu no hitoi pilu akeu ye Khristo vechewo Alhou zülo pülükibe akeu ghenguno ke.

⁵ Nilikhi ni sala kiu-kiumu pükhalu nike ghenguno nilo lo shikulupu anike kumoe, ikemu niw shikulupu ye Alhou lau no ighike.

⁶ Pa no puloshoqhi akitheu lo ningu pesü pichebekümlà shikulupumi shipeke—tiye yèsü lo yèpüa keu lono kumoe ikemu Aghungu lono ke; kughengu aqau puloshoqhi yèsü hu ye akithipu tsü cheni, ikemu akitheu puloshoqhi lo ye Aghungu no aküxüpu tsü cheni.

Puloshoqhi Akitheuw Akiqheu Juküvü

⁷ Pichebekümlà akithí süghi keu khikhi atu lo küxüsü no yèpuku keno tino ado ikhonhei shiaghi namu ajuküvü shi ighino Israelmiqo pelo Moses gi lo tsaqüi jupukulupemo aye,

⁸ Aghunguw pichebekümlà ye tinguno alau ajuküvüpu shimo nani keshea?

⁹ Kiléqhive keu pichebekümlà no ajuküvü süghi aye, achipiumikucho süghi chekeu pichebekümlà ye tinguno alau kiutoi ajuküvü kea!

¹⁰ Kughengu akiqheu juküvü gholo kimghi aye kiu no ajuküvü shiche keno itehi tipau ye ajuküvü kühavae.

¹¹ Eno ado ikhonhei aní keu ghenguno ghí ajuküvü lono ighi aye, ado kushuwa aní keu juküvü ye kiutoi akiqheu kea!

¹² Ningu ye hitoi keu lajupu lakhi akeu ghenguno shishe ningu mlo mto anike.

¹³ Ningu ye Moses toimo ke. Pa ye Israelmiqo pelo ajuküvü ashekha shi hailove akeu ithulu pemo niye agikünha phì pesü pa gi küzüluve ke.

¹⁴ Ikemu panongu kükümsü ye izüvüvüive ke, kughengu ishi kutólo kughou panongu no puloshoqhi aqau phini keno agikünha pesü küzüluve cheni. Tiye ikhive mphi, kughengu Khristo vechewo likhi no tipau ikhivelu cheni ke.

¹⁵ Ishi kutólo kughou Moses yeza phini keno agikünha phi hu no panongu mlo küzüluve cheni.

¹⁶ Ikemu kugho-kughomu timi lakhi no Ampeu lau tsüghǜ ighi aye, agikünha phi hu ye ikhive cheni.

¹⁷ Ampeu ye Aghungu ke, eno khilehi Ampeu Ghungu ani keno, tilehi kuqhokiphe anie.

¹⁸ Eno ningu khunoqo agi küzümo no Ampeu juküvü kümsükütü acheni keno, ningu pesü alhokuthu thuwu chekeu juküvü lono pa jukimihi shive tsü ani, eno tiye Ampeu khuu Aghungu keno pa lau no ighike.